منیم آنام! / حمید احمدزاده(تیلیمخانلی)
سن شاهلاردان تاج آلمیسان،
نامردلردن باج آلمیسان؛
عؤمور سوروب قوجالمیسان
منیم آنام سید خانیم!
گرپیچ کسیب، توتون دوزدون،
آجلیغا ، یوخلوغا دؤزدون؛
مارال کیمی داغدا سوزدون
منیم آنام سید خانیم!
سنسن آنام، سنسن آتام،
محالدیر من سنی آتام؛
یادا سنسیز راحات یاتام
منیم آنام سید خانیم!
شرفله یادلانیب یادین-
کوچهمیزده گؤزهل آدین؛
چوخ اوجادیر آدین قادین
منیم آنام سید خانیم!
فخر ائدیرم دؤنه-دؤنه،
سن دایاق اولموسان منه؛
قوربان اوللام اؤزوم سنه
منیم آنام سید خانیم!
تورک ائلی فخر ائدیر سنه،
سنی وئریب آلله منه؛
بنزهییرسن سن وطنه
منیم آنام سیدخانیم!
«آغاخانیم» بیاض تئللی،
«تیلیمخانلی» بیزیم ائللی؛
تورکو سؤزلو، تورکو دیللی
منیم آنام سید خانیم!
