سیستان و بلوچیستاندا یارالانان پولیس قوهلرینه گولن بیر نفر حبس ائدیلیب
سیستان و بلوچیستان پولیس کوماندیری سیب و سوراندا جیشالعدلین هوجوموندان سونرا یارالی پولیسلره گولن بیر نفرین حبس ائدیلدیگینی آچیقلاییب. اوخشار خبرده ده ایکی گون اؤنجه اصفهاندا پولیس قوهلری دمشقده ایران کونسوللوغوندا اؤلنلره تحقیر و اهانت ائتمک اتهامی ایله بیر شخصی حبس ائدیب.
سیستان و بلوچیستانین پولیس رئیسی دونن، ۲۳ فروردینده بیلدیریب: ایکی پولیس ماشینینا ائدیلن تررور آکتیندان سونرا گولرکن فوتوسو چکیلن و قامو اویونو اینجیمهسینه سبب اولان شخص حبس ائدیلیب.
سیستان و بلوچیستان پولیس کوماندیری دوستعلی جلیلیان “سیب و سوران تررور هوجوملارینین شهیدلرینی تحقیر ائدن شخصین حبس اولوندوغونو اعلان ائدیب ” و دئییب: “سیب و سوران شهرینده تؤرهدیلن تررور عملیاتی یئرینده شهیدین جسدی ایله شوخلوق ائدن قئیری-قانونی اقامتی اولان شخصین کیملیگی بللی ائدیلدیکدن سونرا حبس ائدیلیب”.
ایران مئدیاسینین وئردیگی بیلگیلره گؤره، بو شخص اهانت ائتمک، پولیس قوهلرینی تحقیر ائتمک و قامو اویونو تحریک ائتمک اتهامی ایله حبس ائدیلیب. جلیلیانین سؤزلرینه گؤره، همین شخص حبس ائدیلیب و “آراشدیرما باشا چاتدیقدان سونرا قانونی ایشلری اوچون محکمه اورقانلارینا تحویل وئریلهجک”.
چارشنبه آخشامی گونورتادان سونرا جیشالعدل حربی قروپلاشماسینین سیب و سوراندا ایکی پولیس ماشینینا هوجومو سونوجوند ۶ پولیس اؤلوب. سون هفتهلرده جیشالعدل هوجوملاری اونلارلا اینسانین اؤلومونه و یارالانماسینا سبب اولوب.
ایکی گون اؤنجه اصفهان ایالتینین پولیس کوماندانلیغینین اطلاعات تشکیلاتی دا ایرانین دمشقدهکی کونسوللوغونون اؤلموش اینسانلاری تحقیر ائدن شخصین حبس ائدیلدیگینی آچیقلاییب. بو بارهده اصفهان پولیس کوماندانلیغینین اطلاعاتی دئییب: “اطلاعاتی و تئکنیکی تدبیرلرله اصفهانین کوچهلریندن بیرینده ایرانین سوریهدهکی کونسوللوغوندا باش وئرمیش تررور حادثهسی زامانی شهید اولانلار حاقیندا تحقیرائدیجی کلیپ حاضرلایان و اونو دوشمن مئدیایا گؤندرن شخص بللی ائدیلهرک حبس ائدیلیب .”
