تبریز حبسخاناسیندا ساخلانیلان آرمیتا پاویر تک آداملیق هوجرهیه کؤچورولوب
اینسان حاقلاری قایناقلاری تبریز حبسخاناسیندا ساخلانیلان تورک اؤیرنجی فعال آرمیتا پاویرین ۳۰ مرداد ۱۴۰۳-ده عومومی بنددن تک آداملیق هوجرهیه کؤچورولدویونو و اونونلا بوتون ایلهتیشیمین کسیلدیگینی آچیقلاییب.
دادبان سایتینین آچیقلاماسیندا بیلدیریلیر کی، او، ۱۴۰۲-جی ایل شهریور آییندان بری تبریز زیندانیندا روحی ایشگنجهلره معروض قالیب و ان آغیر قاداغالارلا حبس ائدیلیب.
خانیم پاویر ۳۰ شهریور ۱۴۰۲-ده حبس ائدیلهرک تبریز مرکزی حبسخاناسینا کؤچورولوب.
آذربایجان شهید مدنی بیلیمیوردونون قووولموش اؤیرنجیسی و مدنی و اؤیرنجی فعال آرمیتا پاویر توپلام ۲۲ آی ۱۷ گون حبس جزاسینا محکوم ائدیلیب.
بو آذربایجانلی اؤیرنجی فعال “رهبری تحقیر ائتمک” اتهامی ایله ۱۵ آی ۱ گون، “رژیمه قارشی تبلیغات” اتهامی ایله ایسه ۷ آی ۱۶ گون مدتینه آزادلیقدان محروم ائدیلیب.
آذربایجان شهید مدنی بیلیمیوردونون قووولموش اؤیرنجیسی و مدنی و اؤیرنجی فعال آرمیتا پاویر ۹ آبان ۱۴۰۱-ده کئچیردیگی اعتراض آکسییالاری زامانی بو بیلیمیوردو قارشیسیندا گوونلیک گوجلری ظرفیندن حبس ائدیلمیش و عینی ایلین ۱۷ آذر گونو ۲۵۰ میلیون تومن گیروو قارشیلیغیندا تبریز حبسخاناسیندان سربست بوراخیلمیشدی.
