سايير حركتلر

تهمینه میلانی: من دئمه‌میشم فئمینیستم


-
بیر سینماچی کیمی ایران سینماسینین و سینماچی‌لارینین حاضیرکی دورومونو نئجه قیمتلن‌دیریرسینیز؟

- ایران سینماسی رئگیوندا و دونیادا مؤوقئ یاخشی ایدی، لاکین تأسف‌لر اولسون کی، سون ایکی-اوچ ایل عرضینده بو مؤوقئ ضعیفله‌ییب. بونا سبب اؤلکه داخیلینده صلاحیت‌لی شخص‌لرین موستقیل فیلم ایستئهسال‌چی‌لارینا دقت‌سیزلیگی‌دیر. یعنی ایندی دونیایا تقدیم اولونا بیله‌جک چوخ آز فیلم تاپی‌لار. من موختلیف بئین الخالق فئستیوال‌لاردا ژوری اولموشام و ایران سینماسینین مؤوجود وضعیتی‌نین پئرسپئکتیوینی داها یاخشی گؤرورم. مثال اوچون ژوری اولدوغوم سون بیر نئچه فئستیوالدا ایران‌دان بیر دنه ده فیلم ایشتیراک ائتممیشدی. لاکین ایکی-اوچ ایل اؤنجه موختلیف اؤلکه‌لرده کئچیریلن فیلم فئستیوال‌لاری ایران سینماسینین ایشتیراکی اوچون بیر-بیری‌لری ایله رقابت آپاریردی‌لار. بو، اونو گؤستریر کی، ایراندا یا فیلم‌لر چکیلمیر، یا دا اونلارین اؤلکه‌دن کناردا نوماییش اولونماسینا ایجازه وئریلمیر. بونون زیانی تکجه یؤنتمنلره دئییل، بلکه حقیقتده ائله ایرانین اؤزونه دییر.
فیکریمجه، فیلم ساحه‌سینده چالیشان صلاحیت‌لی شخص‌لر بیر آز گئنیش اورک‌لی اولما‌لی‌دیرلار و ایجازه وئرمه‌لی‌دیرلر کی، تنقیدی فیلم‌لر چکیلسین. سینمانین ماهیتی ائله بوندا‌دیر. لاکین بئله گؤرونور کی، اونلار بونو ایستمیرلر و تنقیدی دوشونن هر کسه نظارت ائدیرلر. بو نظارت ایران مدنیتی‌نین زیانینا‌دیر.

 

 

- سایت‌لاردا دفعه‌لرله سیزین اؤزونوزو فئمینیست آدلاندیردیغینیزا دایر معلومات‌لار گئدیب. حقیقتن سیز فئمینیستسینیزمی؟

- من دئممیشم کی، فئمینیستم. بو آدی منه “کئیهان” قزئتی (حکومته یاخین قزئت) وئریب. من قادین‌لارلا باغ‌لی فیلملرچکیرم. اونا گؤره کی، بالانسین اولماسینین طرفدارییام. فیکریمجه، عائله‌نین ساغلام و نورمال اولماسی اوچون قادین و کیشی‌نین برابر حقوق‌لاری اولما‌لی‌دیر. یوخسا او عائله‌ده راحت‌لیق اولا بیلمز. منیم اوچون نه کیشی‌نین و نه ده قادینین اوستون‌لوگو وار. منیم ده حیات یولداشیم، اوشاغیم وار، ائو ایشلری گؤرورم، یئمک بیشیریرم و بون‌لارین هئچ بیرینی ده پیس حساب ائتمیرم. حیات یولداشیم منه یاردیم ائدیر. هم ائوده، هم ده ایشده. حیات یولداشیملا بیرلیکده معمارلیق ایشلری گؤروروک. چالیشیرام فیلم‌لریمده عائله‌لرله باغ‌لی مسئله‌لره توخونماقلا بالانسین قورونماسینا کؤمک ائدیم. قادین‌لارین کیشی‌لردن اوستون اولدوق‌لارینی دوشونمورم و بو جور مقصدیم ده یوخ‌دور. من اینسان‌لیغی دوشونورم، اونا گؤره منه فئمینیست آدینین قویولماسینی دوزگون حساب ائتمیرم. لاکین اگر منیم ایرانین اورتا طبقه قادین‌لاری ایله باغ‌لی سیاسی، اجتماعی و پیسخولوژی فیلم‌لر چکمییمین و جمعیتده بالانسین یارانماسینا چالیشماغیمین آدی فئمینیست‌لیک‌دیرسه، اوندا بلی، من فئمینیستم. چونکی فئمینیزم دیگر آدلار کیمی موختلیف معنا‌لاردا ایشلنیلیر. کوممونیزم ده بئله‌دیر. شوروی-ده اولان کومونیزم له چین‌دکی بیر-بیرین‌دن فرق‌لی‌دیر. فئمینیزم ده آمئریکادا باشقا، ایراندا باشقا، سعودی عربیستاندا باشقا معنا‌لاردا ایشلنیلیر.

 

- ۲۰۱۲-جی ایل سیزین اوچون نئجه کئچدی و هانسی ایشلری گؤردونوز؟ گلن ایله هانسی لاییحه‌لرله گئدیرسینیز؟

- تاسسوف کی، اوچ ایله یاخین‌دیر یئنی فیلم چکممیشم. سونونجو پرئزیدئنت سئچکی‌لرین‌دن و باش وئرن حادثه‌لردن سونرا اینجه صنعت خادیم‌لرینه نظارت گوجلندیریلمیشدی. لاکین آخیر واخت‌لاردا منه یئنی بیر فیلمین چکیلمه‌سی ایله باغ‌لی مجوز وئریلیب و بو، او دئمک‌دیر کی، یاخین گله‌جکده یئنی فیلمین چکیلیش‌لرینه باشلایاجاغام. اؤتن ایل منیم اوچون ثمره‌لی ایل ایدی. اونا گؤره کی، بیر چوخ اؤلکه‌لرده کئچیریلن فئستیوال‌لارا ژوری کیمی دعوت‌لر آلدیم، مدنی ایشلرله مشغول اولدوم، بیر نئچه سناریو یازدیم و معمارلیق ایشلری ایله مشغول اولدوم. یئنی فیلمیم وطن‌پرورلیک موضوسوندا‌دیر و بؤیوک وسایت حسابینا عرصه‌یه گله‌جک. اومید ائدیرم گلن ایل تکجه ایرانا یوخ، هم ده دونیایا گؤزل بیر فیلم وئره بیله‌جه‌یم. یئنی فیلمیمین آدی “سس-کوی‌لو تنها‌لیق‌دیر” (“تنهایی پر هیاهو”). بو فیلم ده قادین‌لارلا باغ‌لی‌دیر. فیلمده خیاط ایشله‌ین گنج قیزین محاربه‌یه (ایران-عراق محاربه‌سی) باخیش‌لارینی ائکرانلاش‌دیراجام.

 

- دیگر اؤلکه‌لرده فیلم چکمک باره‌ده دوشونورسونوزمو؟ آذربایجاندا فیلم چکمک ایستردینیزمی؟

- آذربایجاندا فیلم چکمک ایستردیم و اومید ائدیرم بو، باش توتا‌جاق. آذربایجان مدنیتی منیم اوچون دوغما‌دیر. آذربایجان موسیقی‌سینی دینلییرم، آزربایجانین کؤهنه فیلملرینی دفعه‌لرله عائلمله بیرلیکده ایزلمیشم و ایزلییرم. حقیقتن اؤزومو آذربایجاندا ائویم‌دکی کیمی حیسس ائدیرم، ائله بیلیرم باشقا بیر تبریزه گلمیشم. بو هیس‌لر منه چوخ دوغما‌دیر. دونیانین موختلیف یئرلرین‌دن منه فیلم چکمک اوچون تکلیف‌لر ائدیلیر، او جمله‌دن هالی‌وود‌دان تکلیف‌لر آلمیشام. لاکین منه تکلیف اولونان‌لار منیم چکمک ایستدیگیم فیلم‌لر اولماییب. من ایستییرم فیلم‌لریمده اؤز فیکیرلریمی گؤستریم. حاضردا تورکییه‌ده بیر فیلمین چکیلیشی ایله باغ‌لی دانیشیق‌لار آپاریریق، موثبت نتیجلنرسه، اورادا فیلم چکه‌جه‌یم.

 

- ایرانین ان بؤیوک سینماچی‌لار بیرلیگی اولان “سینئما ائوی”نین فعالیتی اؤلکه‌نین مدنیت ناظرلییی (وزارت فرهنگ) طرفین‌دن قانون‌سوز اعلان اولوندو و همین بیرلیگین دفتری باغلاندی. بو، ایران‌لی سینماچی‌لارین ایشینه نئجه تأثیر گؤستردی؟

- فیکریمجه، سینماچی‌لار اتفاقینین باغلانماسی دؤولتین مدنیت ساحه‌سینده آتدیغی ان سهو آددیم‌لاردان بیری‌دیر. دؤولت بو ایشی گؤرمکله حقیقتده اؤزونه دوشمن حساب ائلدیگی اؤلکه‌لره دستک وئردی. چونکی اونلارین سینماسی هر گون اینکیشاف ائدیر، لاکین سینماچی‌لار اتفاقینین باغلانماسی و حددن زیاده نظارتله ایراندا سینمانین اینکیشافینا زیان وورولور. دوزدور، یؤنتمن‌لر و سئناریست‌لر اؤز ایشلرینی گؤرورلر، لاکین آکتورلار قوجالیرلار. اوچ ایل فیلم‌ده رول اوینامایان آکتورا چوخ زیان دییر. بیر آی، اوچ آی، آلتی آیدان سونرا، گئج-تئز سینماچی‌لار اتفاقی فعالیتینی برپا ائده‌جک. اونا گؤره کی، اورا بیزیم ائویمیزدیر، سینماچی‌لارین ائوی‌دیر، دؤولتین ائوی دئییل.

---------------

نقل از سایت آنلام

http://www.anlam.biz/blog/2013/01/12/%D8%AA%D9%87%D9%85%DB%8C%D9%86%D9%87-%D9%85%DB%8C%D9%84%D8%A7%D9%86%DB%8C-%D9%85%D9%86-%D8%AF%D8%A6%D9%85%D9%87%E2%80%8C%D9%85%DB%8C%D8%B4%D9%85-%D9%81%D8%A6%D9%85%DB%8C%D9%86%DB%8C%D8%B3%D8%AA%D9%85/