سايير حركتلر

ناظيم حيکمتين آذربايجان سفری + شکیللر

گؤرکملي تورکیه شاعيري ناظيم حيکمتين آذربايجان سفري حاقيندا 

ديلقم احمد 


nazim hikmetگئجه واختي، زيل قارانليقدا
اولدوزسوز، آغير دنيزه قدر 
گونشلي بوغدا زميسيدير باکي شهري 
تپه‌ده يم. 


اوووج-اوووج چارپار اوزومه ايشيق دنه‌لري، 
هاوادا "راست" موغامي بوسفورون سولاري کيمي آخار. 
تپه‌ده يم. 
اوزاقلاشير اوجسوز-بوجاقسيز آيريليقدا 
بير سال کيمي اورگيم، 
گئدر خاطيره‌لرين گئريسين، 
اولدوزسوز، آغير دنيزه قدر 
زيل قارانليقدا... 
"واختيله کاتيبي اولدوغوم "معاريف و مدنيت" ژورنالينا شئعيرلر گؤندريردي. اونونلا مکتوبلاشيرديق. اونو باکييا دعوت ائتديم. 1927-جي ايلين ياييندا ايلک دفعه باکييا گليب، خالقيميزين سوسياليزم قوروجولوغو ساحه سينده الده ائتديگي مووففقيتلرين جانلي شاهيدي اولوب". – سولئيمان روستم. 


...باکي. ناظيم حيکمت آذربايجان يازيچيلارينين بيرينين ماشينيندادير. ماشين آز چالخالاسين دئيه شوفئرين يانيندا اَيلشيب. بو آن ماشينين گونشليگيندن شاعيرين ديزلرينه بير شئعير کيتابي دوشور. هئنريخ هئينئنين. بو ناظيم حيکمت اوچون تعجوبلو اولمور: 
"شوفئرلرين هئينئني اوخومالاري، کيتاب هوسکاري اولمالاري سووئت آداملاري اوچون تعجوبلو بير شئي دئييل...اينگيلتره‌ده شئعير اوخويان، کيتاب سئون شوفئر زومرود قوشو کيمي چوخ نادير بير شئيدير. تورکيه‌ده 24 ميليون اهالي وار، آما اورادا ان مشهور شاعيرين شئعير کيتابي 5 مين نوسخه‌دن آرتيق نشر ائديلرسه، بو، ادبيات دونياسيندا بير حاديثه اولار. اوچ ميليوندان بير قدر آرتيق اهاليسي اولان آذربايجاندا ايسه شئعير کيتابلاري اورتا حسابلا 10 مين نوسخه تيراژلا نشر ائديلير".


آذربايجان...ناظيم حيکمت اؤلکه‌نين بير چوخ يئرلريني گزير. بو يئرلرده ايسه او هر دفعه بير اينسانا راست گلير. هانسي کي، سونرالار اونون اؤلومونه شئعير يازاجاقدي. 
"بوردا، من هارا گئتديمسه صمده راست گلديم. هر شهرده، هر کندده، هر مکتبده، هر کلوبدا، نئفت بوروقلارينين يانيندا، پامبيق تارلالاريندا، هر ائوده صمدله اوز-اوزه گلديم. هر سوفره‌ده قدحيمي اونون قدحي ايله توققوشدوردوم..." 


آذرابايجان-آنادولو کندلرينين موقاييسه‌سي 
"کيرووآباد-قازاخ يولوندا پامبيق ييغان کولخوزچولارلا صؤحبت ائديرديک. بير بريقادير باجي ائله گومان ائتدي کي، بيز مسئول پارتييا، ياخود دؤولت ايشچيسييک. او، بيزه دئدي: "کندده وور-توت بير حکيم و بير ماما وار. بئش يوز آدام ياشايان بير کنده بير حکيمله بير ماما چاتارمي؟ بير ماما دا گؤندرمک لازيمدير". قولاقلاريما اينانماديم. آذربايجاندا بئش يوز نوفوسو اولان کندده بير حکيمله بير ماما آز حساب اولونور. منيم اؤلکمده، تورکيه‌ده ايسه 500 کنده بير حکيم دوشمور...آنادولو کندليسيني خاطيرلاديم، اورگيم آغريدي". 


ناظيم حيکمت باکيدا اولدوغو مودتده بولبولون ايفاسيندا "کوراوغلو"نو ايزله‌يير، "يئددي گؤزل"دن ذؤوق آلديغيني يازير، فيلارمونييادا خالق ماهنيلارينا، موغاملارينا قولاق آسديغيني بيلديرير. اَن بَينديیي ايسه موسيقيلي کومئدييا تئاتري اولور.


"مشهدي عيباد"ي، او اؤلمز اثري، سونرا سيد روستم اوولا سولئيمان روستمين "دورنا"سيني گؤردوم. عؤمرومون ان نشئه‌لي ايکي گئجه‌سيني کئچيرديم. رئژيسور شمسي بدل بَيليي، آرتيست لطفعلي یه و قافارلييا، آرتيستکا نصيبه زئينالووايا پرستيش ائدنلرين ايچينده ايندي من ده وارام..." 
اَن ماراقلي حاللاردان بيري ده ناظيم حيکمتين "ايلديريملي يوللارلا" بالئتيني ايزله‌مه‌سي اوچون لئنينقرادا گئتمه‌سيدير.
ناظيم حيکمت آذربايجان ادبياتيني ياخشي بيليردي. هم نيظامي، فوضولي، م. ف. آخوندوو، صابير حاقيندا، هم ده موعاصيرلري صمد وورغون، سولئيمان روستم، احمد جميل، رسول ريضا، ميکاييل رفعيلي حاقيندا مقاله‌لر تقديم ائديردي. عئيني زاماندا باکينين گؤزلليگي حاقيندا موقاييسه‌لي يازيلار يازيردي.
1957-جي ايل 15 اوکتيابر تاريخلي "ويشکا" قزئتينه وئرديگي موصاحيبه‌سينده ناظيم دئييردي: 
"باکي ايله مني کؤهنه دوستلوق علاقه لري باغلايير. آخي بو شهرده 1927-جي ايلده منيم ايلک کيتابيم نشر اولونوب. يالنيز بوندان ايکي ايل سونرا اونو منيم وطنيم تورکيه‌ده آز تيراژلا بوراخيبلار...سيزين شهرده دوز 30 ايل بوندان اول اولموشام...1937-جي ايلده خزر دنيزينده تکجه باليق توتولوردو، ايندي نئفت ده چيخاريلير..." 
همين ايلين 20 اوکتيابر تاريخلي "آذربايجان گنجلري" قزئتينده ناظيم ايستانبولدا قاداغان اولونان، باکيدا تاماشايا قويولان اثريندن دانيشير:
"باکيدا منيم "غريبه آدام" اثريمي تاماشايا قويموشلار. لاکين عئينيله دنيزين ساحيلينده باشقا بير شهر ده وار. بو شهر منيم دوغما ايستانبولومدور. بو شهرده منيم اثرلريمي تاماشايا قويمورلار، اونلاري ياساق ائديرلر... من بئله حساب ائديرم کي، بو گونکو گنجلر منيم ياشيما چاتمازدان اول اونلاري من ايستانبولدا قارشيلاياجاغام".

 
ناظيم حيکمتين آذربايجان حاقيندا بير نئچه شئعیري وار. او شئعيرلردن بعضيلري آذربايجانا، خوصوصن باکييا، بعضيلري ايسه آذربايجانلي شاعير دوستلارينا يازيليب.

آذربايجان حاقيندا يازديغي شئعيرلر ايچينده "نئفته دوغرو" ،"نئفتين جاوابي" ،"آرپا چايينين ايکي ياني" ،"خزر دنيزي" ،"باکييا گئديرم" ،"اوتوز ايل سونرا" ،"گئجه واختي باکي" (بو شئعير ايکي ايل اؤنجه لوندوندا اوليمپيادا عرفه سينده مئترودا واقونلارا وورولموشدو) آذربايجانلي يازيچي-شاعيرلر اوچون يازديقلاري ايچينده ايسه "صمد وورغونا" ،"م. رفعيلييه" شئعيرلريني قئيد ائتمک اولار.


...سونرا گون گله‌جک، 
سنين باشيندان کئچن ايش 
منيم ده باشيمدان کئچه‌جک، صمد!... 


صمد وورغونون اؤلومونه بو جور يازميشدي.


و طلبه‌لر اؤنونده چيخيشي... 
ناظيم حيکمتين باکيدا طلبه‌لر اؤنونده‌کي چيخيشي عالي سووئتين صدري، يازيچي ميرزه ايبراهيمووون باشينا بلا آچير.
بئله کي، طلبه‌لر اؤنونده چيخيش ائدن ناظيم حيکمت دئيير: 
"من ايندي بورادا دوشونورم کي، بلکه من گؤرمه‌ديم، آما اوغلوم گؤره‌جک، نئجه ايستانبولدا دا، بيزيم اونيوئرسيتئتده ده بئله بير سالون اولاجاق، اورايا دا آذربايجاندان بير شاعير گله‌جک، مثلا، ايندي بورادا شئعير اوخويان بو قيزجيغاز گله‌جک. سيز مني نئجه قارشيلاييرسينيزسا، اونلار دا اونو ائله قارشيلاياجاقلار. او شاعيردن بير ايسته یيم وار. او، اورايا گئتديگي واخت منيم ايستانبوللو گنجلريمه دئسين کي، بيزه ده سنين ناظيمين گلدي. بيز اونو قارداش کيمي باغريميزا باسديق و بيز اونا چوخ شئيي اؤيرتديک. نه اؤيرنديسه بو دونيادا، چوخونو بيزدن اؤيرندي. بونو سؤيله‌مه یي اونوتماسين. و مندن سالام سؤيله‌سين. چونکي، بلکه من مملکته قوووشا بيلمه‌ديم. آما او، منيم مملکتيمي گؤره‌جک". 
(بو عرفه لرده ميرزه ايبراهيموو آذربايجان ديلينه دؤولت ستاتوسو وئريلمه‌سي حاقيندا فرمان ايمضالاميشدي) 


گؤروش زاماني طلبه‌لردن بيري ايله ناظيم حيکمت آراسيندا بئله ديالوق کئچير: 
- اوستاد، اگر بير آدام باشقا ديلده تحصيل آليرسا، ائوده، ايشده بو ديلده دانيشيرسا، بير سؤزله، دوشوننده باشقا ديلده دوشونورسه، اونو آذربايجانلي حساب ائتمک اولارمي؟ 
- اگر بير آدام چين ديلينده اوخويورسا، بو ديلده دوشونورسه، اوسته ليک ده اؤز آنا ديليندن بيخبرديرسه، بئله‌سيني آذربايجانلي آدلانديرماق چتيندير. 
ميرزه ايبراهيموو ايسه کسکين جاواب وئرير: 
- بئله‌لري دؤنوکدو، اجلافدي! 
ايکي ايل سونرا ميرزه ايبراهيموو وظيفه‌سيندن اوزاقلاشديريلير...آما ايتتيهاملار قارشيسيندا ناظيم حيکمتي مودافيعه ائدير: 
"کيمدير بو "ايناسترانئس"(inastranes) ؟- اينگيليس آتشه سي، آمئريکان سفيري، يوخسا تورک پاشاسي؟ او اؤز وطنينده تعقيب اولونوب سووئت ايتتيفاقيندا سيغيناجاق تاپان کومونيستدير، صولح اوغروندا موباريزدير! سيز ايسه قيشقيريرسينيز- "ايناسترانئس" ،"ايناسترانئس"! سيز رنگلري توندلشديرمه یي چوخ سئويرسينيز. بو، فيلوسوف دانيشيغي دئييل، پارتييا ايشچيسي دانيشيغي دا دئييل، ياراماز پروکورور(دادستان) دانيشيغيدير!" 

بو یازی بیرلیک مئدیا طرفیندن کؤچورولموشدور

 

nazim hikmet-baki6

nazim hikmet-baki5

nazim hikmet-baki4

nazim hikmet-baki2

nazim hikmet-baki1

nazim hikmet-baki3

 

nazim hikmet-baki7