سايير حركتلر

يورگن هابرماس ضياليلار حاقيندا نه دوشونور؟

Jurgen-Habermasخسرو ناقید

چئویرن: مسی آغا محمدی

 


1976-جی ايلده مارتين هايدگئرين اؤلومو ايله او واختا قدر عادتن بير فيلوسوفون سيماسيندا تجسومونو تاپان فلسفي عنعنه موعاصير آلمانيانين معنوي حياتيني ترک ائتدي. هايدگئردن اول کارل ياسپئرس، تئودور آدورنو، ماکس هورکهايمئر و کارل لؤويت کيمي موتفکيرلر فلسفي ايدئيالارلا اينسان حياتينين وحدتينه چاليشان عنعنه ني قورويور و فورمالاشديريرديلار.


لاکين اونلارين حياتدان گئتمه‌سي ايله بير شخصين ووجودوندا جمعله شن فلسفي دوشونجه آيري-آيري فردلر آراسيندا بؤلوشدورولمه‌يه باشلادي. اونيوئرسيتئتلر و آراشديرما مرکزلري فلسفي ديسکوسييالار و موباحيثه لر مئيدانينا چئوريلدي. بئله تاثورات يارانيردي کي، فلسفه سون نتيجه‌ده خلوت بير گوشه‌يه چکيليب و ايندي خيريدارلاريني يالنيز ايشلري و آراشديرمالاريندان اؤزلري لذت آليب راضي قالان، پراکتيک و نظري موباديله‌يه، ايجتيماعي رایه ايستينادا احتيياج دويمايان اينتئللئکتواللار آراسيندا تاپير. فرانکفورت مکتبينين ساغ قالميش سون نوماينده‌سي، آدورنونون اَن ايستعدادلي و يقين کي، اَن موستقيل شاگيردي اولان يورگن هابرماس 1969-جو ايلده، ياسپئرس و آدورنونون وفاتيندان آز سونرا بو پروبلئمي آنلاييب مؤوجود شراييطي تحليل ائده‌رک، چيخيش يوللاري آختارماغا باشلادي. نتيجه‌ده او، آشکارليق شراييطينده ضياليلارين و اينتئللئکتواللارين رولونو موعينلشديرن بير نظريه ايره‌لي سوردو. هابرماسين آچيق و دئموکراتيک جمعيتلرده ضياليلارين رولو و مؤوقعيي باره‌ده نظريه‌سي اصلينده اونون اَن موهوم و فوندامئنتال اثري ساييلان "کوممونيکاتيو(ایلتیشیمسل) حرکت نظريه‌سي" کيتابينا موقدديمه‌دير. لاکين جمعيتده ضياليلارين رولو باره‌ده هابرماسين نظريه‌سيني شرح ائتمزدن اؤنجه، گؤرکملي بير آلمان ضياليسي، فيکير و ايدئيالاري غربي آوروپا حودودلاريندان کناردا دا علمي دايره‌لرين ديقتيني چکن بير موتفککير کيمي اونون اؤزونون رولوندان صؤحبت آچماق يئرينه دوشر.


يورگن هابرماس: نظريه ايله پراکتيکانين وحدتي

 

 

هابرماس اوزون ايللردير کي، موختليف نظريه و فرضيه‌لر ايره‌لي سورمکله، مؤوجود باخيشلاري تحليل و تنقيد ائتمکله فلسفي ديسکوسييالاردا فعال ايشتيراک ائدير، جاري سوسيال و سياسي مسله‌لره موناسيبتيني بيلديرمکله ايجتيماعي را‌يه تاثير گؤسترمه‌يه چاليشير؛ دؤرد اون ايللييه ياخيندير کي، هم پوزيتيويزمين فلسفي موباحيثه لرينده ايشتيراک ائدير، هم ده فرانسيز فيلوسوفلارينين باخيشلاريني تنقيد ائدير؛ هم 1960-70-جي ايللرده غربي آوروپادا طلبه‌لرين اعتيراض چيخيشلاريني و اونلارين نتيجه‌لريني تنقيدي باخيمدان نظردن کئچيرير، هم ده اوچونجو رئيخ دؤورونده يهودي قيرغينينين ميثيلسيزليگي باره‌ده تاريخچيلرين موذاکيره‌لرينه قوشولور. ايکي آلمانيانين بيرلشمه طرزينين تنقيدي هابرماسين ديقت مرکزينده اولان مؤوضولارداندير. عئيني زاماندا او، سون ايللرين مودئرنيزم و پوست مودئرنيزم باره‌ده ديسکوسيالاريندان دا کناردا قالمير. او، بير طرفدن آوروپا ضياليلاريني، خوصوصن آلمانيانين سولچو ضياليلاريني بوروين بؤحراندان سؤز آچير، ديگر طرفدن آوروپا جمعيتلرينده ايفراط ساغچيلارين گون به گون گوجلنمه‌سي ايله باغلي ناراحاتليغيني بيلديرير. هابرماس هم فرانکفورت اونيوئرسيتئتينده درس دئيير (حاضيردا تقاعودده‌دير – م.م.)، هم ده بوسنيا موسلمانلارينين قيرغينينا قارشي اعتيراض نوماييشلرينده ايشتيراک ائدير. او، مدني، ايجتيماعي و سياسي مسله‌لره داير مقاله‌لريني عادتن "اشپيگئل" و "دي-تسايت" هفته‌ليکلرينده چاپ ائتديرير کي، بونلارين دا هر ايکيسي آلمانيانين اَن نوفوذلو و اَن چوخ اوخونان نشرلريندندير. اونون اثرلري ايچريسينده هم "مئتافيزيکادان سونرا تفکور" ،هم ده "قانون و حوقوقي دئموکراتيک دؤولت" واردير؛ بونلاردان بيرينجيسي کلاسيک نظري فلسفي، ايکينجيسي ايسه سياسي فلسفه پروبلئملرينه حصر اولونموشدور. هابرماسي "آلمانيانين اَن حجت ضياليسي" آدلانديريرلار، لاکين اونون ديسکوسييا احتيراصي اکثر ضياليلارين شخصي آمبيسييالار نامينه آپارديغي موباحيثه لرين فؤوقونده دورور. هابرماسين موباحيثه شؤوقو نظريه ايله پراکتيکانين علاقه سيني گؤسترمه‌يه يؤنلميشدير. بورادا صؤحبت کؤهنه اَياملاردا اولدوغو کيمي فلسفي ايدئيالارين اينسان حياتي ايله وحدتيندن گئدير. هابرماسين فلسفه‌سيني فرانکفورت مکتبينين "تنقيدي نظريه"سينده "عاغلين تنقيدي"نين دوشدويو چيخيلماز وضعيته جاواب کيمي قييمتلنديرمک اولار. آدورنو و هورکهايمئره گؤره، "شيشيرديلميش عاغيل" اينسان فعاليتينين محصولودور، بونا گؤره ده بوتون تاريخ بويو دايم حاکيميته يئتيشمک واسيطه‌سي و فردي اَزمک آلتي اولموشدور. تاريخ فلسفه‌سيندن چيخاريلان بو منفي قناعت حياتينين سون ايللرينده آدورنونو اوميدسيزليک و پئسسيميزم(بدبینی) گيردابينا يووارلاتميشدي. هابرماسين سؤزلري ايله دئسک، اونون پئسسيميزمي ساموئل بئکئتين دراملارينداکي صحنه لري خاطيرلاديردي. قئيد ائتمک لازيمدير کي، هابرماس بو نظريه‌يه عکس مؤوقئعده دايانير. او، عاغلين رولونو يالنيز "فعاليت" و "حاکيميت"له محدودلاشديرمير. هابرماسن فيکرينجه، اينسانين تکرار ايستحصالي تکجه موعين فعاليت اوچون باش وئرمير، هم ده اينسانلار آراسيندا "اونسيت و آنلاشما"ني احتيوا ائدير؛ اونسيتين گئنيشلنمه‌سي و آنلاشمانين درينلشمه‌سي جمعيتين ثابيتليک و ساغلامليغينا تامينات وئرن ايکي موهوم عاميلدير. بئله‌ليکله، "اينسترومئنتال(آراچسال) عاغيل"لا ياناشي "کوممونيکاتيو(ایلتیشیمسل) عاغيل" دا مئيدانا چيخير کي، بو، اساسن مدني بير پروسئسدير و اونون تملينده مفکوره‌نين اينکيشافي دورور. اينسانلار آراسيندا آنلاشما، هابرماسا گؤره، خوصوصي اؤلچو و مئعيارا ماليکدير کي، اونون اساسيندا "رئپرئسيو عاغلين" تنقيدي مومکون اولور و پرينسيپجه ائله بو يوللا "تنقيدي نظريه" رئاللاشما ايمکاني قازانير. هابرماس "تنقيدي نظريه"نين حيسي و ائموسيونال آسپئکتلريني ضعيفلتمکله، ديسکوسييا و ديالوقون گئنيش سويه‌ده يئنيدن برقرار اولماسي اوچون زمين يارادير. بوندان سونرا اونون بوتون اثرلري و فيکيرلري "کوممونيکاتيو حرکت" ايدئياسي اطرافيندا دولاشير. فيلوسوفون جمعيتده ضياليلارين رولو و مؤوقعيي باره‌ده دوشونجه‌لري ده بو باخيمدان ايستيثنا تشکيل ائتمير.

 

 

"ضيالي" تئرمينينين تاريخچه‌سي

 

 

هابرماس جمعيتده ضياليلارين رولونو ايکي موستقيل، عئيني زاماندا بير-بيرينه باغلي اولان ساحه ده کي فعاليتلرده گؤرور: ضيالي بير طرفدن اؤز همکارلاري ايله مشغول اولدوغو ساحه نين پروبلئملرينه داير ديسکوسييا و موباحيثه لره گيرير و بو يوللا يئني نظريه‌لرين، ايدئيا و فرضيه‌لرين مئيدانا گلمه‌سينده ايشتيراک ائدير؛ ايکينجي طرفدن ايسه معاريفچيليک مقصدي ايله جمعيتده‌کي عومومي موذاکيره‌لره قوشولور و جاري مسله‌لر باره‌ده مؤوقعييني بيلديرمکله، سوسيال پروبلئملرين حلي اوچون تکليفلر وئرمکله، مؤوجود وضعيتين ياخشيلاشماسي و تکميللشمه‌سي پروسئسينه تاثير گؤسترمه‌يه چاليشير. بئله‌ليکله، فيلوسوفلارين، موتفککيرلرين و يازيچيلارين عؤهده سينه يئني بير وظيفه قويولور، يعني اونلارين ايشي داها صيرف نظريه‌چيليک و فردي اينتئللئکتوال فعاليتله محدودلاشمير؛ اونلار اؤز ايختيصاصلارينا عاييد اولان و بعضاً آبستراکت سجيييه(اؤزللیک) داشييان موباحيثه لرله ياناشي، جمعيتده‌کي جاري حاديثه لرين تحليلي و آشکار تنقيدي ايله ده مشغول اولورلار. بو باخيش "ضيالي" ايصطيلاحينين مئيدانا گلديگي شراييطله بيرباشا باغلي اولدوغوندان، همين آنلاييشين تاريخچه‌سينه قيسا دا اولسا، نظر سالماق يئرينه دوشر. "ضيالي" سؤزو ايلک دفعه فرانسادا آلفرئد درئيفوس آدلي بير پولکوونيکين(سرهنگ) محکمه ايشي گئديشينده اؤزونون بو گونکو تئرمينولوژي معناسيني کسب ائتميشدير. 1898-جي ايلين يانوار آييندا مشهور فرانسيز يازيچيسي ائميل زوليانين فرانسا پرئزيدئنتينه عونوانلانميش "من ايتتيهام ائديرم" باشليقلي آچيق مکتوبو قزئتلرين بيرينده درج اولوندو. زوليا بو مکتوبدا درئيفوسو آلمانلارا جاسوسلوقدا گوناهلانديريب عؤمورلوک حبس جزاسينا محکوم ائتميش تريبونالين(حربی محکمه) قرارينا اعتيراضيني بيلديرير، محکمه‌ني قانونلاري پوزماقدا ايتتيهام ائديردي. زوليانين آچيق مکتوبو چاپ اولوناندان بير گون سونرا همن قزئتده يوز نفر تانينميش عاليم و يازيچينين ايمضاسي ايله پولکوونيک درئيفوسو موحاکيمه ائتميش محکمه‌نين غئيري-قانوني قرارينا اعتيراض بيلديرن موراجيعت درج اولوندو. "ضياليلارين مانيفئستي" آدي ايله مشهورلاشميش بو موراجيعت تئزليکله بوتون آوروپايا ياييلدي، فرانسادا ايجتيماعي رايه گوجلو تاثير گؤستردي، اؤلکه داخيلي بؤحرانا و اوچونجو رئسپوبليکانين اساسلارينين لاخلاماسينا گتيريب چيخاردي. ضياليلارين قطعي مؤوقئعيي و عينادلي سعيلري، ايجتيماعيتين مسله نين اصل ماهيتيندن آگاه اولماسي نتيجه‌سينده ايشه يئنيدن باخيلدي، ناحاق يئره عؤمورلوک حبسه محکوم اولونموش گوناهسيز اينسانا برائت وئريلدي، گئج ده اولسا، اونون حوقوقلاري و لياقتي برپا ائديلدي. "درئيفوسون ايشي"نده فرانسا ضياليلارينين مووفقيتي اصلينده يئنيدن بوناپارتيزم گيردابينا يووارلانماق تهلوکه‌سي ايله اوز-اوزه قالميش اوچونجو رئسپوبليکاني خيلاص ائتدي، عئيني زاماندا فرانسا ضياليلارينا خوصوصي مؤوقع قازانديردي، جمعيتده و ايجتيماعي رايده اونلارين نوفوذونو قات-قات گوجلنديردي. او واختلار آناتول فرانس "ضيالي"يا تاماميله يئني سجيييه داشييان بير تعريف وئردي. بو تعريفه اساسن، ضياليلار جمعيتده‌کي اوخوموشلارين ائله بير دسته سيدير کي، اونلار هئچ بير سياسي مقاما ماليک اولمادان، اؤز ايختيصاصلاري اوزره فعاليت گؤسترمکدن علاوه،جمعيتين عومومي معنافعي و ريفاهي ايله باغلي اولان مسله‌لره موداخيله ائدير و مؤوقعلريني بيلديريرلر. عوموميتله، همين حاديثه فرانسا جمعيتينده ضياليلارين يئريني موعينلشديردي؛ ائميل زوليادان توتموش ژان-پول سارترا قدر فرانسيز مدنيتينين گؤرکملي نوماينده‌لري ايجتيماعي فعاليت صحنه سينده دايم بو مؤوقئعدن ثمره لي شکيلده ايستيفاده ائتميشلر.

 

 

ضياليلارين ايجتيماعي رولو و مؤوقئعيي

 

 

هابرماس جمعيتده ضياليلارين رولو و مؤوقعيينه داير نظريه‌سيني ايره‌لي سوررکن، نومونوي شخصيت کيمي مشهور آلمان شاعيري و يازيچيسي هئنريخ هئينئني (1797-1856) گؤتورموشدور؛ او هئينئني کي، آزادليغا چاتماق و سوسيال عدالتسيزليکلري آرادان قالديرماق اوغروندا موباريز، موتفککيرلرين و يازيچيلارين اثرلرينه حؤکومتين موداخيله‌سينه موقاويمت اونون معنوي حياتينين بؤيوک بير حيصه سيني تشکيل ائتميشدي و محض بو فعاليتينه گؤره اوزون مودت وطندن اوزاقدا ياشاماغا مجبور اولموش، وطندن اوزاقدا دا دونياسيني دَييشميشدي. هئينئنين اثرلري اون دوققوزونجو عصرين بيرينجي ياريسيندا آوروپانين قاريشيق ايجتيماعي-سياسي وضعيتينين گوزگوسو، 1848-جي ايل آلمان اينقيلابينين آيناسيدير. هئينئني اَن چوخ ناراحات ائدن، اوزن مسله چوخ واخت اونون اؤزونون و ديگر يازيچيلارين اثرلرينين نشرينه قاداغا قويولماسي ايله نتيجله نن سئنزورا و نظارت شراييطي ايدي. 1835-جي ايلده فرانکفورتون نوماينده‌لر مجليسي "گنج آلمانيا" آدي ايله تانينان قروپا داخيل اولان يازيچي و شاعيرلرين، او جومله‌دن هئينئنين اثرلرينين چاپيني قاداغان ائدن قرار قبول ائتدي. حاکيم دايره‌لر بئله بير قرار چيخارماقلا ايسته‌ييرديلر کي، فرانسادا اولدوغونا بنزر بير وضعيتين يارانماسينين قارشيسيني آلسينلار و ايره‌ليجه‌دن ضياليلارين سياست صحنه سينده گؤرونوب ايجتيماعي رايه تاثير گؤسترمه‌سينه مانع اولسونلار. اصلينده سئنزورا مأمورلاري ضياليلارا ايجتيماعي رايي سياسيلشديرمه‌يه قادير اولان پوتئنسيال قوووه کيمي باخيرديلار و بونا گؤره ده نه يين باهاسينا اولورسا-اولسون، اونلارين فيکيرلرينين جمعيته نوفوذ ائديب ياييلماسينا يول وئرمه‌مه‌يه چاليشيرديلار. بو مقصده چاتماق اوچون اونلار يازيچيلارين اثرلريني نظارتده ساخلاماغي و لازيم گلديکده، اونلارين چاپيني قاداغان ائتمگي اَن ياخشي و ان ثمره لي يول ساييرديلار. لاکين نظارت و تضييق سيياستينين، سئنزورانين، کيتابلارين نشرينه ايجازه وئريلمه‌مه‌سينين نتيجه‌سي بئله اولوردو کي، ايجتيماعي راي بو اثرلره و اونلارين ياراديجيلارينا داها آرتيق ديقت يئتيرمه‌يه باشلاييردي. هئينئنين باشچيليق ائتديگي "گنج آلمانييا" قروپو اولکي نسله منسوب اولان يازيچيلارين، او جومله‌دن ايوهان وولفهانق هؤتئنين عؤمرونون سون ايللرينده‌کي سئيرچي مؤوقئعيني تنقيد ائده‌رک، يئني بير دؤورون باشلانديغيني بيلديريرديلر؛ بو دؤورده کئچميشه و ادبياتين صيرف ائستئتيک آسپئکتلرينه آلوده‌چيليک اؤز يئريني مؤوجود شراييطين تنقيدي و ايصلاحينا يؤنلميش فعاليت و حرکت، گونون پروبلئملري ايله مشغول اولماغا و صاباحين قوروجولوغونا وئرير. هئينئ يازيردي: "هؤتئ بئله حساب ائديردي کي، تانري اؤزونو بوتون شئيلرده عئيني درجه‌ده تظاهور ائتديرمير، بونا گؤره ده او، تکجه "بيتکيلرين حالينين دَييشمه‌سي" ،"رنگلر نظريه‌سي" ،آناتومييا، سمانين و بولودلارين موشاهيده‌سي کيمي مسله‌لرله مشغول اولوردو. حالبوکي تانري اَن گوجلو شکيلده حرکتده، داورانيشدا و بير ده زاماندا تظاهور ائدير. تاريخين صحيفه لري تانرينين پاک نفسي ايله ورقله‌نير و اصلينده بو، اونون اساس سؤزو و کيتابيدير… عمل سؤزون اؤولاديدير، هؤتئنين گؤزل سؤزلري ايسه اؤولادسيزدير، سونسوزدور"[1]. هئينئ حساب ائديردي کي، ايجتيماعي دَييشيکليکلرين حرکت وئريجي قوووه‌سيني درک ائتمک صنعتکارلارين و ضياليلارين اخلاقي بورجودور. اوسته ليک او، همين دييشيکليکلر پروسئسينه تاثير گؤسترمگي، جمعيتين سوسيال و سياسي ستروکتورونون فورمالاشماسيندا ايشتيراکي دا همين اخلاقي وظيفه‌يه داخيل ائديردي. عئيني زاماندا ضياليلارا خبردارليق ائديردي کي، اونلار دايم اؤز مؤوقئعلريني تحليل ائتمه‌لي و لازيم گلديکده، اوندا ضروري تصحیحلر ائتمگي ده اونوتماماليديرلار. هابرماس هئينئنين باخيشلاريني ضياليلارين ايجتيماعي رولو باره‌ده اؤز نظريه‌سينين تمل داشينا چئويرميشدير. اونون فيکرينجه، پارلامئنت قورولوشونون فورمالاشيب برقرار اولماسي ايله ضياليلار دا يئني رول کسب ائديرلر. آرتيق اونلارين موراجيعت اوبيئکتي سياسي پارتييالارين و کوتلوي اينفورماسييا واسيطه‌لرينين تاثيري آلتيندا فورمالاشميش ايجتيماعيتدير. البتته، سياسيلشميش ايجتيماعي راي يالنيز قانونون عاليليگي شراييطينده دئموکراتيک پرينسيپلرين شوعورلو شکيلده اينکيشافينا تکان وئرن واسيطه‌يه چئوريله بيلر. محض بئله بير شراييطده ضياليلار هابرماسين اونلار اوچون موعينلشديرديگي مؤوقئعيي توتماغا قاديرديرلر. طبيعي کي، هابرماس مشهور آلمان سوسيولوقو ماکس وئبئرين (1864-1920) ضياليلارين ايجتيماعي رولو باره‌ده اونون و هئينئنين فيکيرلرينه عکس اولان دوشونجه‌لري ايله تانيشدير و اؤزونون "هئنريخ هئينئ و آلمانييادا ضياليلارين رولو" آدلي مقاله‌سينده [2] وئبئره جاواب وئرير. وئبئر ضياليلاري سياسي ايشلره قاریشماقدان چکينمه‌يه چاغيريردي. او بئله حساب ائديردي کي، يازيچي و فيلوسوفلارين سيياسته ديلئتانتجاسينا(هوسکارجا، ناشیجا) موداخيله‌سي ماراقلي اينتئللئکتوال اَيلنجه و "گزينتي" خاراکتئري داشييير، بو دا آرا-سيرا، هئچ بير مسئوليت حيسي کئچيرمه‌دن، سياسي مسله‌لرين ماهيتينه و گئرچک منظره‌سينه بلد اولمادان باش وئرير. پئشه کار سياستچيلري ايسه وئبئر رئاليست، صلاحيتلي و اوزرينه مسئوليت گؤتورمه‌يه حاضير اولان شخصلر سايير و سياسي مسله‌لرين حليني اونلارين ايختيارينا وئرير [3].
بورادا بئله بير سوال مئيدانا چيخير: گؤره‌سن، وئبئرين سياسي ايشلره قاريشماقدان چکينديرديگي ضياليلارين مؤوقئع و فعاليتي هئينئنين گؤسترديیي ايستيقامتلره اويغون اولموشدورمو؟ بيرينجي دونيا موحاريبه سي ايللرينده آلمان ضياليلاري هئينئنين شخصيتيني و اونون "مسئوليت گؤتورمک" پرينسيپيني اؤزلري اوچون نومونه‌يه چئويرميشلرمي؟ دئمک لازيمدير کي، او دؤورده آلمانييادا هئينئنين نظرده توتدوغو معنادا ضيالي طبقه‌سي مؤوجود دئييلدي. اوسته ليک آلمان ايجتيماعي رایي نه اينکي ضياليلارا خوصوصي رول آييرميردي، حتّي "ضيالي" ايصطيلاحي دايم منفي چالاردا ايشله‌ديليردي. بوتؤولوکده ضيالي موخاليفتچيليکدن باشقا رولو اولمايان بير عونصور کيمي خاطيرلانيردي. جسارتله دئمک اولار کي، 1933-جو ايله (يعني هيتلئرين حاکيميته گليشينه) قدر آلمانيادا هئينئنين نظرده توتدوغو هومانيست دئموکراتياني ايجتيماعي رايه آشيلاماغا چاليشان ضياليلارين سايي بارماقلا ساييلاجاق حدده اولموشدور. حتّي هئنريخ مان و آلفرئد دؤبلين کيمي شؤهرتلي يازيچي و ضياليلار دا "ضيالي" سؤزونو موثبت آنلامدا ايشلتمه‌يه جورأت ائتمه‌ميشلر. ماراقليدير کي، بو تئرميني موثبت و فايدالي معنادا ايشلتمک ايسته‌ينلر ده "ضيالي" سؤزونو ديله گتيرمکدن چکينميش، "موتفککير" ،"فيکير آدامي" کيمي ايفاده‌لردن يارارلانميشلار. سولچولار دا بو يوللا گئديب "فيزيکي ايش آداملاري"نا اويغون اولاراق، "ذهني ايش آداملاري" ايفاده‌سيني ايشلتميشلر. بير سؤزله، ايکينجي دونيا موحاريبه سينه قدر ضياليلارين تنقيدي اصلينده ضياليلارين اؤزلري طرفيندن و ضيالي طبقه‌سي مؤوجود اولمادان حياتا کئچيريليردي! يالنيز ايکينجي دونيا موحاريبه سيندن سونرا آلمانيادا ضيالي طبقه‌سي مئيدانا گلدي، بو آدي قبول ائتدي، يازيچيلار، شاعيرلر، عاليملر تدريجن بير ضيالي و معاريفچي کيمي جمعيته نيسبتده اؤز مسئوليت و روللاريني درک ائتمه‌يه باشلاديلار. هابرماس "هئنريخ هئينئ و آلمانيادا ضياليلارين رولو" آدلي مقاله‌سينده "درئيفوسون ايشي"ني خاطيرلاداراق، "ضيالي" آنلاييشينا تعريف وئرير کي، بو دا موعين جهتلردن آناتول فرانسين يوخاريدا قئيد اولونموش تعريفي ايله اوست-اوسته دوشور. هابرماسين فيکرينجه، ضياليلار اؤز ناطيقليک قودرتيندن و بعضاً موباليغه‌لي دليللردن ايستيفاده ائتمکله پوزولموش حوقوقلارين، بوغولموش حقيقتلرين مودافيعه سينه قالخاندا، واختي چاتميش ايصلاحاتلاري و يئنيليکلري دستکله‌ينده، ايلک نؤوبه‌ده نه اينکي بو مسله‌لري آنلايان، حتّي همين ايشلري بيلن و رئاکسييا وئرمه‌يه حاضير اولان ايجتيماعي را‌يه گووه‌نيرلر. (بورادا اونو دا قئيد ائتمک لازيمدير کي، هابرماسين سياسي فلسفه‌سي "زوراکيليقدان چکينمه" پرينسيپينه سؤيکه‌نير، بونا گؤره ده او، وطنداشلارين رئاکسياسي دئديکده، کونستيتوسييا چرچيوه‌سينده باش وئرن و هر جور زوراکيليقدان اوزاق اولان حرکتلري نظرده توتور). طبيعي کي، ضياليلارين بو گوونجي حوقوقي دؤولتين آز-چوخ اوغورلو فعاليتينه، همچنين دئموکراتيک قوروملارين ايشينه اينامي دا احتيوا ائدير. داها سونرا هابرماس ضياليلار اوچون موعينلشديرديیي فونکسيالاردا آنلاشيلمازليغا يئر قويماماق اوچون ايکي موهوم جهتي ده وورغولايير. بيرينجيسي بودور کي، ضياليلارين ايجتيماعيته، سوسيال-سياسي دَييشيکليکلر پروسئسينه تاثير گؤسترمک ساحه سينده‌کي چاليشمالاري هئچ ده بو ايشلرله علمي و مدني فعاليتين بير-بيرينه قاريشماسينا گتيريب چيخارماماليدير – علم و صنعتين سياست قارشيسيندا موستقيلليگي قورونوب ساخلانا بيلر و ساخلانماليدير. ايکينجي مقام ضياليلارين اؤز بويونلارينا گؤتوردوکلري مسئوليتين نؤوعونه و خاراکتئرينه عاييددير: ايجتيماعي رايه تاثير گؤسترمک وظيفه‌سي هر هانسي سياسي تشکيلاتا باغليليقلا، دؤولت آپاراتيندا چاليشماقلا و سياسي حاکيميتي اله آلماق اوغروندا موباريزه ايله عئينيلشديريلمه مه‌ليدير[4].

 

 


قئيدلر:

1. Geschichte der Deutschen Literatur. Fricke Gerhar und Schreiber Mataias. Auflage, 1974, -  s.201

2. Heinrich Heine und die Rolle des Intellektuellen in Deutschland. Habermas Jurgen. Merkur, Juni, 1986

3. Politische Scriften. Weber Max. Tubingen, 1958, -  s.534

4. Eine art Schadensabwicklung. Habermas Jurgen.Frankfurt am Main, 1987, -  s.35

 


 

ايلکين منبع:

http://mesiha.blogspot.com/2008/05/xosrov-naqid-yurgen-habermas-ziyalilar.html

 

کؤچورن: رامین جبارلی