سايير حركتلر

آوروپا شوراسینین ناظیرلر کومیته سینین قادینا قارشی زوراکیلیقلا باغلی توصیه قراری

 

حاضیرلایان: تورکان اورمولو

 

بیرینجی: قانونلارینی و سیاستلرینی آشاغیدا ساییلان آماجلارلا گؤزدن کئچیرمک:

۱. قادینلارا اینسان حاقلاری و تمل اؤزگورلوکلرینین تانینماسی، بونلاری ایشلتمه، بونلاردان یارارلانما و بو حاقلارین قورونماسینی گووه‌نجه آلتینا آلماق؛

۲. لازیم گلدیینده، قادینلارین ائکونومیک و سوسیال حاقلارینی اؤزگور و ائتکین بیر شکیلده ایشلتمه‌لرینه ندن اولاجاق تدبیرلری گؤرمک؛

۳. بوتون تدبیرلرین اؤلکه گئنلینده کوردینه(هماهنگ) ائدیلمه‌سی، قوربانلارین احتیاجلارینا اوداقلانماسی و ایلگی‌لی دؤولت قوروملاری ایله سیویل توپلوم اؤرگوتلرینین، اؤزللیکله ده بو توصیه قراریندا بللی ائدیلن گرکلی تدبیرلرین قرارلاشدیریلیب تطبیق ائدیلمه‌سی ایله باغلانتیلاندیریلماسینا ندن اولماق؛

۴. قادینلارا قارشی زوراکیلیقلا موباریزه ائد‌ن سیویل توپلوم اؤرگوتلرینین چالیشمالارینی هر دوزئیده(سویه) تشویق ائتمک و اویغون لوژئستیک و مادی دستک وئریلمه‌سی ایله بیرلیکده بو اؤرگوتلرله آکتیو ایش بیرلیگی ائتمک.

ایکینجی: دؤولتلرین زوراکیلیق ایچره‌ن عمللری، بو عمللر ایستر دؤولت طرفیندن ایسترسه ده باغیمسیز شخصلر طرفیندن گئرچکلشدیریلمیش اولسون، انگلله‌مک، تعقیب ائتمک و جزالاندیرماق قونوسوندا گرکلی فعالیتی ائتمک و قوربانلاری قوروماقلا سوروملو اولدوقلارینی قبول ائتمه‌لری.

اوچونجو: قادینلارا قارشی ائرکک زوراکیلیغینین، قادینلارلا ائرککلر آراسیندا ائشیتسیز گوج ایلیشکیلریندن قایناقلانان تمل بیر قورولوشسال و توپلومسال سورون اولدوغونو قبول ائتمک و بو ندنله ائرککلرین، قادینلارا قارشی ائعمال اولونان زوراکیلیقلا موباریزه‌نی هدفله‌ین ایشلره قاتیلمالارینی دستکله‌مک.

دؤردونجو: قادینلارا قارشی زوراکیلیقلا موباریزه ائد‌ن بوتون قوروملاری (پولیس، طیب و سوسیال یاردیم ایشلری) زوراکیلیغین قارشی‌سینین آلینماسی و قوربانلارین قورونماسی اوچون فعالیت گؤستر‌ن اورتا و اوزون دؤنملی کووردیناسییالی عمللر پیلانلاری اولوشدورماغا تشویق ائتمک؛

بئشینجی: اولوسال و اولوسلارآراسی سوییه‌ده، دئیتا توپلاماق و شبکه قورولماسینی دستکله‌مک؛

آلتینجی: قادینلارا قارشی زوراکیلیق باشدا اولماق اوزره ائشیت‌لیک قونوسو ایله ایلگیلی، اونیوئرسیته سوییه‌سی داخیل، عالی تحصیل پروقراملاری و آراشدیرما مرکزلرینین قورولماسینی دستکله‌مک.

یئددینجی: بیلیم ایله مشغول اولانلار، آلان چالیشماسی ائد‌ن سیویل توپلوم اؤرگوتلری، سیاسی قرار آلماق قونوموندا اولانلار، قانونچولوق، ساغلیق، ائییتیم قوروملاری، سوسیال و پولیس قوروملاری آراسینداکی قارشی‌لیقلی تأثیر بوراخماغی گلیشدیرمک.

سگگیزسنجی: بو توصیه قرارینین اکینده(علاوه‌سینده) آچیقلانان تدبیرلری، اولوسال قوشوللار و اوستونلوکلری گؤز اؤنونه آلاراق ان اویغون شکیلده قبول ائدیب ایجرا ائتمک و بو آماجلا قادینلارا قارشی زوراکیلیقلا موباریزه اوچون بیر ائیلم پلانینی دوزنله مه یی گونده‌مه گتیرمک.

دوققوزونجو: آوروپا شوراسینی بو توصیه قرارینین حؤکملرینین اولوسال سوییه‌ده تعقیب ائدیلمه‌سیندن خبردار ائتمک.

رئکورد (۲۰۰۵)۵ ساییلی توصیه قرارینیین اکی(علاوه‌سی)

 

تانیم(تعریف)

۱. بو قرار چرچیوه‌سینده “قادینلارا قارشی زوراکیلیق” ایفاده‌سی، جینسیته دایالی، قادینلارا فیزیکسل، جینسل یادا پسیخولوژیک ضرر ویا سیخینتی یارادان یادا وئرمه‌یه یول آچا بیله‌جک هر چئشید زوراکیلیق عملینی یا دا تهدیدینی ایفاده ائدر. اجتماعی آلاندا یا دا اؤزل حیاتدا قارشیلاشیلان باسقی ویا کئیفی اولاراق اؤزگورلوکدن محروم ائدیلمه یی ده ایچره‌ن بو ایفاده آشاغی‌دا ساییلانلاری ایحاطه ائتمکله بیرگه، بونلارلا محدود دئییل:

آ. بو آرادا فیزیکسل و روحسال سالدیرقانلیک، دویغوسال یادا پسیخولوژیک سؤمورو(استثمار)، تجاووز ائتمک و جینسل ایستیثمار، ائنسئست، ائولی‌لیک ایچی ویا ائولی‌لیک دیشی جینسلر آراسی تجاووز، قادینلارا ضرر وئره‌ن باشقا تؤره سل ایشلرله بیرلیکده عائله ایچینده یادا ائوده قارشیلاشیلان زوراکیلیق.

ب.  بو سوره ایچینده تجاووز ائتمک، جینسل ایستیثمار، ایش یئرینده، قوروملاردا ویا باشقا آلانلاردا جینسل اذیت و تهدیدله بیرلیکده، گئنل اولاراق توپلومدا، قوروملاردا یادا باشقا آلانلاردا قارشیلاشیلان زوراکیلیق، جینسل و ائکونومیک سؤمورو آماجی ایله قادین تیجارتی و سئکس توریزمی؛

ج. دؤولت یادا دؤولت گؤرولیلری طرفیندن ائدیلن ویا گؤز یومولان زوراکیلیق؛

د. سلاحلی قارشیدورما و اؤزللیکله گیروو آلما، زورلا یئرلشدیرمک، سیستئماتیک عیفته تجاووز ائتمک، جینسل کؤله‌لیک، زورلا هامیله بوراخماق و جینسل و ائکونومیک سؤمورو آماجی ایله اینسان تیجارتی دوروملارین‌دا قادینلارین اینسان حاقلارینین پوزولماسی.

 

قادینلارا قارشی زوراکیلیقلا ایلگیلی گئنل تدبیرلر

 

۲. هر هانسی بیر قادینین هر هانسی بیر زوراکیلیغا معروض بوراخیلماما حاقینی گووه‌نجه آلتینا آلماق، دؤولتلرین سوروملولوغوندا و منفاتینده‌دیر و میللی سیاستلرینده اؤنجه‌لییه صاحیبدیر. بورادا دؤولتلر بو سوروملولوقدان قاچماق اوچون تؤره، عادت عنعنه یادا دینی اؤنه سوره بیلمزلر.

۳. اویه دؤولتلر آشاغیدا ساییلان عونصورلارا دایالی زوراکیلیق عمللرینه قارشی میللی سیاستلر اولوشدورمالی، گلیشدیرمه‌لی ویا گرکدیینده وار اولانلاری یاخشیلاشدیرمالیدیر:

آ. قوربانلارین ماکسیموم گوونلیینین قورونماسی؛

ب. قوربان قونومونا گتیریلن قادینلارا، یئنی‌دن بو قونوما دوشمه‌لرینی انگلله‌یه‌جک ان اویغون دستک و یاردیم اولاناقلارینی سوناراق گوجله‌نمه‌لرینین تامین اولونماسی؛

پ. جزا حقوقو و مدنی حقوقون، محکمه اوصولو ایله بیرلیکده ایخطار وئریلمه سی؛

ت. توپلومدا بو قونودا حساسیتین آرتیریلماسی؛ اوشاقلارین و گنجلرین ائییتیمی؛

ج. قادینلارا قارشی زوراکیلیق اولقوسویلا قارشیلاشان فرقلی ایش صاحیبلرینه اؤزل ائییتیم وئریلمه‌سی اوچون ایمکانلارین تامین اولونماسی؛

چ. ایلگی‌لی بوتون آلانلاردا قارشی‌سینی آلماق اوچون چالیشماق.

۴. بو چرچیوه‌ده مومکون اولان هر دورومدا، اولوسال سوییه‌ده و گرکدیینده بؤلگه سل و/ویا یئرل یئتکی‌لیلرله ایش بیرلیگی ایچریسینده، سیویل توپلوم اؤرگوتلری ایله بیرلیک‌ده آکادئمیک قوروملار و باشقا قوروملارلا دانیشاراق، قادینلارا قارشی زوراکیلیقلا موباریزه اوچون تدبیرلر گؤرمکله و یاسال رئفورملارین یادا عمل آلانیندا هر هانسی بیر یئنی موداخیله شکلینین دیرلندیرمه‌سی و دوزنلی اولاراق تعقیب ائدیلمه‌سیندن سوروملو بیر رسمی کوردینه قورومو یا دا اورقانی قورماق گرکه‌جکدیر.

۵. اؤزللیکله آشاغیداکی آلانلاردا اولوسال و اولوسلارآراسی سوییه‌ده آراشدیرما، سبب توپلاما و شبکه‌لر گلیشدیریلمه‌لیدیر:

آ. قادینلارا قارشی زوراکیلیغین اؤلچه یینی داها یاخشی دیرلندیره بیلمک اوچون جینسیت تمللی ایستاتیستیکالار، ائنتئقره ایستاتیستیکالار و اورتاق گؤسترگه‌لرین حاضیرلانماسی؛

ب. سالدیریلارین قوربانلار اوزرینده‌کی اورتا و اوزون سوره‌لی ائتکیلری؛

پ. زوراکیلیغین، عائله ایچی زوراکیلیق داخیل، شاهیدلر اوزرین‌ده بوراخدیغی ائتکیلر؛

ت. قادینلارا قارشی زوراکیلیغین ساغلیق، توپلومسال و ائکونومیک هزینه‌سی؛

ج. قادینلارا قارشی زوراکیلیقلا موباریزه‌ده حقوقی و یاسال سیستئملرین ائتکینلیینی دیرلندیرمه؛

چ. قادینلارا قارشی زوراکیلیغین ندنلری، یعنی ائرککلری زوراکیلیغا و توپلومون بئله بیر زوراکیلیغا گؤز یومماسینین ندنلری؛

ح. زوراکیلیق قونوسوندا اؤلچو آلیناجاق سانکسییالاری گلیشدیرمه.

 

بیلگی، توپلومون هسساس‌لیغی، ائییتیم و ایش ایچی ائییتیم

 

اویه دؤولتلر،

۶. فرقلی زوراکیلیق نؤوعلری و بونلارین قوربانلار باخیمیندان سونوجلاری ایله ایلگی‌لی ائنتئقره ایستاتیستیکالار داخیل اویغون بیلگیلری، مؤوجود بوتون مئدیا اورقانلارینی (قزئت، رادیو و تئلئویزیا و…) ایشله‌ده‌رک سئچیب خالقا سونمالی؛

۷. توپلومون سورونون فرقینه وارماسی، قوربانلار و گئنل اولاراق توپلوم اوزرینده‌کی ییخیجی ائتکی‌سینی آنلاماسی و بو سایه‌ده قادینلارا قارشی زوراکیلیق قونوسونو آچیقجا، اؤنیارقی ویا اؤنجه‌دن جؤکمو وئریلمیش فیکیرلر ائتمه‌دن دارتیشا بیلمه‌سی اوچون بیلگیلندیرمه کامپانیالاری و دستک کونفرانسلاری دوزه‌نله‌یرک توپلومو حرکته کئچیرمه‌لی؛

۸. عائله ایچی زوراکیلیغین یانیندا قادینلاری ائتکیله‌یه‌ن بوتون باشقا زوراکیلیقلاریندا اینجه‌له‌مه‌سینده ایشله‌دیله‌جک عونصورلاری، پولیس و یارقی گؤرولیلری ایله طیب آلانیندا و سوسیال آلاندا چالیشانلارین تمل ائییتیمینه داخیل ائتمه‌لی؛

۹. بو چالیشمالارین ایش ائییتیمی پروقراملارینا، قوربانلارین قبول ائدیلمه‌سینی، سونولان دینله‌مه و دانیشمانلیق(مشاوره) طرزینی یاخشیلاشدیرماق و بؤحران دوروملارینی تانیییب یؤنتمه‌یه یارایاجاق گرکلی آراجلاری تامین ائده بیلمک اوچون بیلگی و ائییتیم وئرمه‌لی؛

۱۰. بو پئرسونئلین اؤزل ائییتیم پروقراملارینا قاتیلمالارینی تشویق ائتمک و بو آماجلا پئرسونئلی بیر اؤدوللندیرمه پلانینا داخیل ائتمه‌لی؛

۱۱. قادینلارا قارشی زوراکیلیق قونوسونون یارقیجلارین ائییتیمینه داخیل ائدیلمه‌سینی تشویق ائتمه‌لی؛

۱۲. مثلا تئراپیستلر کیمی اؤز کونتروللو ایش فعالیتلرینین یئتکی‌لی قونوملارداکی شخصلر طرفیندن ائدیله بیله‌جک جینسل ایستیثمارا قارشی ایستراتئژیلر گلیشدیرمه‌لرینی تشویق ائتمه‌لی؛

۱۳. ائرککلرین، ائتدیکلریندن سوروملو اولمالاری گرکدیینی وورغولایاراق و ائرککلری زوراکیلیق مئکانیزمالارینی تحلیل ائدیب چؤزمه‌یه و فرقلی بیر داورانیش طرزی منیمسه‌مه‌یه تشویق ائد‌رک، قادینلارا یؤنه‌لیک ائرکک زوراکی‌لیغی قونوسوندا حساسیتین آرتماسی اوچون کامپانیالار دوزه‌نلندی؛

۱۴. اینسان حاقلاری قونولو ائییتیم پروقراملارینا جینسیت باخیش آچی‌سینی داخیل ائتمه‌لی یا دا گوجلندیرمه‌لی و جینسلر آراسی ائشیت‌لییه و قارشیلیقلی سایغییا اؤزل اؤنم وئره‌ن جینسل ائییتیم پروقراملارینی گوجلندیرمه‌لی؛

۱۵. قیز و ائرکک اوشاقلارین، سوسیال و کولتورل نومونه، اؤنیارقی و شابلون جینسیت روللاریندان قاچان و اؤزگووه‌نلرینین گلیشدیریلمه‌سینه یؤنه‌لیک ائییتیم ایچره‌ن بیر تمل ائییتیم آلمالارینی، اوخولدا چتینلیک چکن گنجلره اؤزل دقت گؤستره‌رک تامین ائدیلمه‌لی؛ ائییتیمله باغلانتی‌لی اولان ایشلرین بوتون اویه‌لرینی جینسیت ائشیت‌لیگی قاورامینی ائییتیملرینه داخیل ائد‌جک شکیلده ائییمله‌لی؛

۱۶. اوخول درس پروقراملاریندا اوشاق حاقلاری، یاردیم تئلئفون حاقلاری، اوشاقلارین یاردیم ایسته‌یه بیله‌جکلری قوروملار و گووه‌نه بیله‌جکلری شخصلرله ایلگی‌لی اؤزل بیلگیلری داخیل ائتمه‌لیدیر.

 

 

مئدیا

 

اویه دؤولتلر،

۱۷. مئدیانی، شابلون اولمایان، اینسانا و اینسانلیق شرفینه سایغی تملینده قورولموش قادین و ائرکک ایماژلارینی اؤنه چیخارماغا و زوراکیلیقلا جینسل‌لیگی باغلانتیلاندیران پروقراملاردان اوزاقلاشماغا تشویق ائتمه‌لی؛ بو مئعیارلاری مومکون اولدوغو قدری ایله یئنی بیلگی تئکنولوژیلری آلانیندا دا گؤز اؤنونه آلمالی؛

۱۸. مئدیانی، توپلومو قادینلارا قارشی زوراکیلیق قونوسوندا دقتلی ائتمک اوچون بیلگیلندیرمه کامپانیالارا قاتیلماغا تشویق ائتمه‌لی؛

۱۹. مئدیا چالیشانلارینی بیلگیلندیرمک و زوراکیلیقلا جینسل‌لیگی باغلانتیلاندیران پروقراملارین اولا بیله‌جک سونوجلاری قونوسوندا اویارماق اوچون ایش ایچی ائییتیمی تشویق ائتمه‌لی؛

۲۰. مئدیا چالیشانلاری اوچون، قادینلارا یؤنه‌لیک زوراکیلیق قونوسونو گؤز اؤنونه آلان و وار اولان یا دا گله‌جکده قورولاجاق مئدیا کونترول قوروملارینین تمل ایلکه‌لری آراسیندا قادینلارا قارشی زوراکیلیق و جینسیتچی‌لیک قونولارینین یئر آلماسینی تشویق ائد‌ن داورانیش یؤنرگه‌لرینی(تعلیماتینی) گلیشدیریلمه‌سینی تشویق ائتمه‌لی‌دیر.

 

 

یئرل، بؤلگه سل و شهرده پلانلاما

 

اویه دؤولتلر،

۲۱. یئرل و بؤلگه سل پلانلاما ایله شهر پلانلانماسیندا قرار آلما قونومونداکی شخصلری، توپلوما آچیق یئرلرده زوراکیلیق ایچره‌ن عمللرینین قارشینی آلماق و قادینلارین گوونلیینی مؤحکملتمه احتیاجینی حئسابا قاتماغا تشویق ائتمه‌لی؛

۲۲. اؤزللیکله چئوره آیدینلانماسی، توپلو داشیما آراجلاری و تاکسی خیدمتلرینین دوزه‌نلنمه‌سی، آوتوموبیل پارک یئرلری ایله ایقامته مخصوص بینالارین دیزاین و پلانلانماسی ایله ایلگی‌لی گرکلی هر چئشید تدبیری مومکون اولدوغو قدر آلمالی‌دیر.

 

قوربانلارین قورونماسی و یاردیم ( قبول، تداوی و دانیشمانلیق)

 

اویه دؤولتلر

۲۳. قوربانلارین، شیکایت ائتمیش اولسونلار یادا اولماسینلار، هر هانسی بیر آیریمچیلیق(تبعیض) ائدیلمه‌دن چوخ دیسیپلینلی، کووردیناسیالی پروفئسیونال کادرولارین اورتایا قویدوقلاری تعجیلی و اطرافلی یاردیمدان یارارلانماغینی تامین ائتمه‌لی؛ بو یاردیما طیببی موعایینه، عدلی طیب موعایینه‌سی، تداوی و سارسینتی و اینجینمه سونراسی پسیخولوژیک، سوسیال دستک و حقوقی یاردیم داخیل اولوب، یاردیم گیزلی‌لیک اساسی تملینده، پولسوز و ۲۴ ساعت الوئریشلی اولمالی؛

۲۴. اؤزللیکله، ائو ایچی زوراکیلیق قوربانلارینا سونولان هر چئشید خیدمت و حقوقی یولون، طلب اوزرینه کؤچمن قادینلارا دا سونولماسینی تامین ائتمه‌لی؛

۲۵. عدلی طیب سببلری و بیلگی توپلاما ایشلملرینین ایستاندارد پروتوکول و فورملارلا ائدیلمه‌سینه ندن اولاجاق بوتون تدبیرلری گؤرمه‌لی؛

۲۶. قوربانلاررین احتیاجلارینا گؤره حاضیرلانمیش، قوربانلاری آچیق و آنلاشیلان بیر دیل ایله حاقلاری، یارارلاندیقلاری خیدمتلر و اؤنجه‌دن بیله بیله‌جکلری یادا باش وورا بیله‌جکلری ائیلملر قونوسوندا بیلگیلندیر‌ن سندلری، قوربان شیکایت ائتسین یادا ائتمه‌سین، پسیخولوژیک، طیببی و سوسیال دستک و حقوقی یاردیم آلماغا داوام ائتسین یادا ائتمه‌سین، سونمالی؛

۲۷. بو چئشید کووردیناسیالی ائیلملری مومکون ائده‌جک شکیلده پولیس، ساغلیق و سوسیال خیدمت قوروملاری و حقوقی سیستئم آراسیندا ایش بیرلیینی گلیشدیرمه‌لی، سیویل توپلوم اؤرگوتلری آراسیندا ایش بیرلیگی شبکه‌سینین قورولماسینی تشویق ائتمه‌لی و دستکله‌مه‌لی؛

۲۸. زوراکیلیق قوربانلاری ویا زوراکیلیقلا یادا زوراکیلیق تهدیدی ایله قارشی قارشییا قالان شخصلر اوچون آنونیم، پولسوز تئلئفون یاردیم خطلری کیمی تعجیلی دوروم سئرویسلرینین قورولماسینی تشویق ائتمه‌لی؛ دوز‌نلی اولاراق تئلئفون دانیشیقلارینی ایزله‌مه‌لی و بیلگیلری قوروماقلا باغلی ایستانداردلارا سایغی گؤسترمه شرطیله، سونولان یاردیم سیراسیندا توپلانان بیلگیلری دیرلندیریلمه‌لی؛

۲۹. پولیس و باشقا آساییش قوروملارینین قوربانلاری قبول ائدیب، تداوی و مصلحت وئررکن، اینسانا و اینسانلیق شرفینه سایغی تملینه اویغون بیر شکیل‌ده یاناشمالارینی، شیکاتلری گیزلی‌لیک اساسینا گؤره اله آلمالارینی، قوربانلارین، پولیس گؤرولیسی ایله قوربان آراسیندا بیر گووه‌ن ایلیشکی‌سی اولوشدوراجاق شکیلده تاسارلانمیش یئرلرده اؤزل ائییتیملی پئرسونئل طرفیندن گئجیکمه اولمادان دینله‌نمه‌لرینی و مومکون اولدوغو قدر، زوراکیلیق قوربانلارینین ایسته دیکلری تقدیرده بیر قادین گؤرولی طرفیندن دینله‌نمه‌لرینی تامین ائتمه‌لی؛

۳۰. بو آماجلا، بوتون سوروملولوق دوزئیلرینده چالیشان قادین پولیس گؤرولیسی سایی‌سینی آرتیرماق اوچون آددیم آتمالی؛

۳۱. اوشاقلارا هر مرحله‌ده (ایلک قبول، پولیس، ساوجیلیق، محکمه‌لر) اوزمان پئرسونئل طرفیندن آنلاییشلا یاناشماسینی، باخیلماسینی و وئریلن یاردیمین اوشاغین احتیاجلارینا اویغون اولماسینی تامین ائتمه‌لی؛

۳۲. زوراکیلیق قوربانی اولان اوشاقلارا گرکلی پسیخولوژیک و معنوی دستگی تامین ائتمک اوچون، اویغون سیستئملر اولوشدوراراق و اوشاقلاری ایلک گؤروشمه‌دن یاخشیلاشما آنینا قدر ایزله‌یه‌جک ائییتیملی پئرسونئل تامین ائد‌رک آددیملار آتمالی و بو خیدمتلر پولسوز سونولمالی؛

۳۳. قوربانلارین، یاردیم خیدمتینی سونان پولیس، ساغلیق و سوسیال خیدمت پئرسونئلی طرفیندن جینسیته ایلگی‌سیز توتوملار ایله قارشیلاشمامالاری و یئنیدن قوربان قونومونا دوشمه‌مه‌لری اوچون گرکلی بوتون تدبیرلری گؤرمه لیدیرلر.

 

جزا حقوقو مده‌نی حقوق و یارقیلاما اوصولو

 

جزا حقوقو

 

اویه دؤولتلر،

۳۴. جزا حقوقوندا شخصه قارشی زوراکیلیق ائتمه‌نین و اؤزللیکله فیزیکسل ویا جینسل زوراکیلیق ائتمه یین، ساده‌جه اخلاق، شرف ویا تربییه‌نین پوزونتوسو اولماییب، شخصین فیزیکسل پسیخولوژیک ویا جینسل اؤزگورلویو و بوتونلویونون پوزولماسینی بلیرتن حؤکوملرین ایچرمه‌سینی تامین ائتمه‌لی؛

۳۵. میللی قانونلاردا زوراکیلیق ائد‌نلره قارشی درحال و ائتکین گیریشیمه اولدوغو قدر، زوراکیلیق قوربانی قادینلارا ائدیله‌ن حاقسیزلیغی جوبرانا دا ایمکان وئره‌ن اویغون تدبیر و سانکسییالار سونمالیدیر. اولوسال یاسالار اؤزللیکله ائولیلیک ایچی یادا دیشی ائشلر آراسیندا جینسل زوراکیلیق و تجاووزو جزالاندیرمالی؛

- دیرنج علامتی گؤسترمه‌سه‌لر بئله، شخصلره قارشی تصدیقلری اولمادان هر هانسی بیر جینسل عملده بولونماغی جزالاندیرمالی؛

- شخصین تصدیقینی آلمادان، تورو و آراجی نه اولورسا اولسون، جینسل دوخول جزالاندیرمالی؛

- حامیله، قوروماسیز، خسته، فیزیک ویا عقل علیلی ویا باخیما مؤحتاج شخصلرین دورومونون هر شکیلده ایستیثمارینی جزالاندیرمالی؛

- فاعیلین قونومونو ایستیثمار ائتمه‌سی، اؤزللیکله اوشاقلار قارشیسین‌دا یئتیشکین قونومونون ایستیثمارینی جزالاندیرمالی‌دیر.

 

مد‌نی حقوق

اویه دؤولتلر،

۳۶. زوراکیلیق ائتدیبی ایثباتلاندیغیندا، قوربانلارا، اولایین جیددیتینه اویغون، معروض قالدیقلاری ایقتیصادی، فیزیکی، پسیخولوژی، اخلاقی و اجتماعی ضرری قارشیلایاجاق اویغون بدلین، عدلی خرجلر داخیل، وئریلمه‌سینی تامین ائتمه‌لی؛

۳۷. قوربانلارا تزمینات وئره بیلمک اوچون مالیه لشدیریجی سیستئملری اولوشدورماغی گونده‌مه آلمالیدیر.

 

یارقیلاما اوصولو

اویه دؤولتلر،

۳۸. بوتون زوراکیلیق قوربانلارینین و دوروما گؤره، اونلاری ساوونان حقوقی شخصیته صاحیب توپلومسال قورومو ویا اؤزل قوروملارین قوربانلا بیرلیکده یادا قوربان آدینا شیکایت ائدیله بیلمه‌سینی تامین ائتمه‌لی؛

۳۹. جومهوریت باش پروکورور جزا اوچون شیکایت ائتمه‌سینی تامین ائده‌جک حؤکوملری قویمالی؛

۴۰. باش پروکورورلاری، توپلوم آدینا شیکایت ائدیب ائتمه‌مه‌یه قرار وئررکن، قادینلارا و اوشاقلارا قارشی ائدیلن زوراکیلیغی آغیرلاشدیریجی ویا بلیرله ییجی عونصور سایماغا تشویق ائتمه‌لی؛

۴۱. محکمه شیکایتینین بوتون آشامالارین‌دا قوربانلارین فیزیکسل و پسیخولوژیک دورومونون گؤز اؤنونه آلینماسینی و طیببی و پسیخولوژیک باخیم گؤرمه‌لرینی تامین ائد‌جک بوتون تدبیرلری آلمالی؛

۴۲. زوراکیلیق قوربانی ویا شاهیدی اولان شخصلرین ایفاده‌لری ائشیدیلدیین‌ده، تکرار تکرارا ایفاده وئرمه‌لرینی و یارقیلاما اوصولونون بؤحران یارادیجی ائتکیلرینی آزالتماق اوچون اؤزل شرطلرین یارانماسی اوچون چالیشمالی؛

۴۳. قوروملارین ایچ اساسنامه‌لرینین، زوراکیلیق قوربانی یادا تانیدیقلارینین معروض قالدیقلاری بؤحرانی گؤز اؤنونه آلاراق و بو بؤحرانین تکرارلانماماسی اوچون، سببسیز و آشاغیلاییجی سورولارا معروض قالمالارینی انگلله‌یه‌جک شکیلده دوزه‌نله‌نمه‌سینی تامین ائتمه‌لی؛

۴۴. گرکلی اولدوغوندا، قوربانلاری تهدید و اولا بیله‌جک اینتیقام گیریشیملرینه قارشی تأثیرلی بیچیمده قوروماق اوچون تدبیرلر گؤرولمه‌سینی تامین ائتمه‌لی؛

۴۵. اوشاق حاقلارینین یارقیلاما سوره‌سینده قورونماسی اوچون اؤزل تدبیرلر آلمالی؛

۴۶. اوشاقلارا محکمه‌نین بوتون جلسه‌لرین‌ده، محکمه گرکچه‌لی بیر قرارلا قارشی چیخمادیغی تقدیرده یا یاسال تمثیلچیلری یادا اویغون گؤردوکلری بیر یئتیشکین طرفیندن موشاییعت ائدیلمه‌سینی تامین ائتمه‌لی؛

۴۷. اوشاقلارا یاسال تمثیلچیلری آراجیلیغی ایله ویا سئچدیکلری ائتدیکلری و بیر توپلومسال قورومو، اؤزل اؤرگوت ویا یارقی یئتکیلی‌سینین تصدیقله دیی هر هانسی بیر یئتیشکین آراجیلیغی ایله شیکایت ائدیله بیلمه‌سینی و گرکیرسه پولسوز ادلی یاردیم آلا بیلمه‌لرینی تامین ائتمه‌لی؛

۴۸. جینسل قباحت و سوچلار اوچون قبول ائدیله‌جک بیر سوره سینیرلانماسینین، آنجاق قوربان چوخالماسینی اثبات ائتدیکدن سونرا باشلاماسینی تامین ائد‌جک حؤکوملری قویمالی؛

۴۹. گیزلی‌لیک شرطلرین‌ده اله گتیریلمیش بیلگی یادا موعایینه‌ده سونوجو، ایشلری گریی زوراکیلیغا معروض قالمیش اوشاق اولایلاری ایله قارشیلاشان شخصلرله ایلگی‌لی، استثنا بیر دوروم اولاراق، ایشدکی گیزلی‌لیک شرطیندن قورتولماسینا ایمکان وئرمه‌لی.

 

زوراکیلیق فاعیللری اوچون موداخیله پروقراملاری

اویه دؤولتلر،

۵۰. زوراکیلیق فاعیللرینین، عمللرینین بیلینجینده اولمالارینا و سوروملولوقلارینی آنلامالارینا یاردیمچی اولاراق، زوراکیلیقدان آرینمیش بیر داورانیش طرزینی منیمسه‌مه‌لرینی تشویق ائد‌جک موداخیله پروقراملاری تشککول ائتمه‌لی؛

۵۱. فاعیللره موداخیله پروقراملارینا قاتیلما فورصتینی، محکومیته بیر آلتئرناتیو اولاراق دئییل، زوراکیلیغی اؤنله‌مک اوچون علاوه بیر مانعه اولاراق سونمالی؛ بو کیمی پروقراملارا قاتیلماق کؤنوللولوق اساسینا دایانمالی؛

۵۲. مؤوجود قایناقلار ایذین وئردیی اؤلچوده، زوراکیلیق ائتمه‌یه مئییللی ائرککلر اوچون دؤولتین اوناییندان کئچمیش مرکزلر و سیویل توپلوم اؤرگوتلرینین اؤنجوللویونده قورولموش یاردیم و دستک مرکزلری قورماغی دوشونمه‌لی؛

۵۳. ائرککلره یؤنه‌لیک موداخیله پروقراملاری ایله قادینلارین قورونماسینا یؤنه‌لیک پروقراملارین ایش بیرلیگی و کووردینه(هماهنگی) ایچینده گئتمه‌سینی تامین ائتمه‌لیدیر.

 

جینسل زوراکیلیقلا ایلگی‌لی اک اؤنله‌ملر

گئنئتیک وئری بانکاسی

اویه دؤولتلر،

۵۴. اولوسال دوزئیده و آوروپا دوزئیینده، سوچلاری تاپماق و یئنیدن سوچ ایشله‌مه‌لرینه انگل اولماق اوچون ائتکین بیر سیاست اولوشدورا بیلمک آماجی ایله و بو آلاندا میللی قانونلار و آوروپا شوراسی طرفیندن قویولان ایستانداردلاری حسابا قاتاراق، تشخیس ائدیلمیش یادا ائدیلمه میش جینسل زوراکیلیق عامیللرینین گئنئتیک پروفیلی ایحاطه ائد‌ن وئری بانکالاری اولوشدورماغی گونده‌مه گتیرمه‌لیدیر.

 

عائله ایچی زوراکیلیقلا ایلگی‌لی علاوه تدبیرلر

اویه دؤولتلر،

۵۵. هر شکیلده عائله ایچی زوراکیلیغی جزای سوچ اولاراق قروپلاندیرمالی؛

۵۶. عائله ایچینده بیلینجلی اولاراق ائدیلن ائتکی‌لی عمل اوچون، هانسی عائله اویه‌سی ائدرسه ائتسین، تطبیق ائدیله‌جک جزالاری گؤزدن کئچیرمه‌لی ویا آرتیرمالی؛

۵۷. زینانین عائله ایچی زوراکیلیغا بهانه اولاراق اؤنه سورولمه‌سینه میدان وئرمه‌مه‌لی؛

۵۸. آشاغیدا ساییلانلارا ایمکان یاراتماق اوچون تدبیرلر گؤرولمه‌سی احتیمالینی گونده‌مه آلمالی:

آ. پولیس گوجلرینین تهلوکه‌ده اولان بیر شخصین ائوینه گیرمه‌سینی، فاعیلی توتوقلاماسینی و فاعیلین حاکم اؤنونه چیخاریلماسینی مومکون قیلماق؛

ب. یارقینین قوربانلارین قورونماسینی هدفله‌ین احتیاط تدبیری اولاراق، بیر فاعیلین قوربانلا باغلانتی و ایلتیشیم قورما ویا اونا یاناشماسینی، بلیرلی آلانلارا گیرمه‌سینی ویا بئله آلانلاردا ایقامت ائتمه‌سینی یاساقلانماسینا ایمکان وئرمک؛

پ. پولیس، طیب و سوسیال خیدمت قوروملارینین عینی مرحله‌لری ایزله‌مه‌سی اوچون بیر مجبوری ایشله ییش پروتوکولو اولوشدورماق؛

ت. پولیسین علیه ینه بیر راپور چاتار چاتماز قوربانلا باغلانتییا گیرمه تشببوثونو گؤستره‌جک پرو-آکتیو قوربان قوروما سئرویسلرینی گلیشدیرمک.

ث. قوربانین یاردیما چاتا بیلمک و فاعیله قارشی بللی سوره سینیرلامالاری داخیلینده و فاعیلله ایسته‌نمه‌ین هر هانسی بیر باغلانتی قورماق زوروندا قالمادان جهد گؤستره بیلمک اوچون بوتون یاسال و پراتیک تدبیرلری آلماسینا ایمکان وئرمک آماجی ایله، پولیس یئتکی‌لیلری، محکمه‌لر، قوربان قوروما سئرویسلری و باشقا ایلگی‌لی بوتون قوروملارین اویوملو ایش بیرلیینی تامین ائتمک؛

ج. یئتکی‌لیلرین فاعیلی اویماغا زورلادیقلاری تدبیرلرین هر چئشید ایخلالینی جزالاندیرماق؛

۵۹. عائله ایچی زوراکیلیق قوربانی اولان ویا اولموش کؤچمن قادینلارا، ائو صاحبی اؤلکه‌نی ترک ائتمک مجبوریتینده قالمادان، زوراکیلیق ائد‌ن حیات یولداشلاریندان آیریلا بیلمه‌لری اوچون، گرکدیینده حیات یولداشیندان آیری اوتورما حاقی وئرمه یی گونده‌مه آلمالیدیر.

 

جینسل اذیتله ایلگیلی علاوه تدبیرلر

اویه دؤولتلر،

۶۰. ایش یئرینده امکداشلارینین و اوستلرینین داورانیشلاری داخیل، ایش یئرینده قادینلارین حیسیتینی ائتکیله‌ین جینسل یؤنلو هر چئشید داورانیشی ویا جینسللیک تملینده باشقا توتوملاری- قونشولوق ایلیشکیلری، اؤیرنجی و اؤیرتمنلر آراسی ایلیشکیلر، تئلئفونلا اذیت و باشقا شئیلر داخیل، هارادا اولورسا اولسون، فاعیلین اوتوریته قونومونو ایشلتدییی جینسل اؤزللیکلی بوتون داورانیشلار بونلارا داخیلدیر و بو دوروملار اینسان شرفینین ایخلالینی تشکیل ائدر و یاساقلاماق اوچون آددیملار آتمالی؛

۶۱. ایش یئرینده ویا ایشله ایلگیلی یادا هارادا گئرچکلشیرسه گئرچکلشسین جینسل اذیت قونوسوندا حساسیت یاراتماق، بیلگی وئرمک و قارشی‌سینی آلماغی تشویق ائتمک و قادین و ائرککلری بو داورانیشلاردان قوروماق اوچون، گرکلی تدبیرلری.

 

قادینلارین سوننتی ایله ایلگیلی علاوه تدبیرلر

اویه دؤولتلر،

۶۲. قادین یادا قیزلارین جینسل اورقانلارینین، راضیلیقلاری آلیناراق یادا آلینمادان، سوننت ائدیلمه‌سی جزالاندیریلمالیدیر؛ جینسل سوننتدن کلیتوری‌سین تیکیلمه‌سی، کسیلمه‌سی، قیسمن ویا تمامن چیخاریلماسی ویا قوپاردیلماسی آنلاشیلیر؛

۶۳. بیلرک و ایسته‌یه‌رک، شخص قبول ائد‌رک یادا قبول ائتمه‌دن، هر هانسی بیر جینسل سوننتین گئرچکلشدیریلمه‌سینه قاتیلان، یاردیمچی اولان ویا تشویق ائد‌ن هر کسین جزالاندیریلماسینی تامین ائتمه‌لی؛ بو و بونا بنزر عمللر، قیسمی اولاراق دا گئرچکلشدیریلمیش اولسالار، جزالاندیریلمالی؛

۶۴. ایلگیلی جمعیت طبقه‌لرینه، اؤزللیکله کؤچمن و موهاجیرلره یؤنه‌لیک، بو عمللرین قوربان باخیمیندان داشیدیغی ساغلیق ریسکلری، عامللر آچیسیندان دا جزایی قئید و شرطلر قونوسوندا بیلگیلرندیرمه و قارشی‌سینی آلماق کامپانیالاری دوزه‌نله‌مه‌لی؛

۶۵. طیب ایشلرینده چالیشانلاری، اؤزللیکله دوغوم اؤنجه‌سی و سونراسی موعایینه‌لری ائتمکله و اوشاقلارین ساغلیغینی کونترول ائتمکده مسئول اولان دوکتورلاری خبردار ائتمه‌لی؛

۶۶. قادینلارین جینسل سوننتینی یاساقلاماق و قارشی‌سینی آلماق و عامیللری تعقیب ائتمکله ایلگیلی ایکی طرفلی آنلاشمالارین ایمضالانماسی یا دا گوجلندیریلمه‌سینی تامین ائتمه‌لی؛

۶۷. جینسیت اساسلی گرکچه‌لرله تهدید آلتیندا بیر قروپ اولاراق بو قادینلارا اؤزل قوروما ایمکانی سونماغی گونده‌مه آلمالیدیر؛

 

قارشی‌دورما زامانلاری و قارشی‌دورما سونراسی دوروملارلا ایلگی‌لی علاوه تدبیرلر

اویه دؤولتلر،

۶۸. قارشی‌دورما دوروملاریندا قادین و اوشاقلارا قارشی هر شکیلده زوراکیلیق ائدیلمه‌سینی، بو عمله آشاغیلاما، ایشکنجه، جینسل کؤله‌لیک ویا بو عمللردن قایناق‌لانان اؤلوم بیچیملریندن هانسینی آلارسا آلسین جزالاندیرمالی؛

۶۹. ناموسا توخونما، جینسل کؤله‌لیک، زورلا گبه بوراخما، زورلا قیسیرلاشدیرما یا دا بنزر وخامتده باشقا هر نؤوع جینسل زوراکیلیغی اینسان حاقلارینین قبول ائدیلمز بیر ایخلالی، اینسانلیغا قارشی ایشلنمیش سوچ اولاراق و سلاحلی قارشی‌دورما حالیندا ایشلنمیش ایسه، ساواش سوچو اولاراق جزالاندیرمالی؛

۷۰. سویقیریم، اینسانلیغا قارشی ایشلنمیش سوچ و ساواش سوچلارینی یارقیلایان اولوسال یا دا اولوسلارآراسی جزا محکمه‌لرینه ایفاده وئره‌ن شاهیدلرین قورونماسینی و شاهیدلره ان آزیندان داوا(شیکایت) سوره‌سینده یاسال اوتوروم تامین ائتمه‌لی؛

۷۱. سویقیریم، اینسانلیغا قارشی ایشلنمیش سوچ و ساواش سوچلارینی یارقیلایان اولوسال یا دا اولوسلارآراسی جزا محکمه‌لرینه شاهید اولاراق چاغیریلان هر کسین سوسیال و عدلی یاردیم آلماسینی تامین ائتمه‌لی؛

۷۲. قارشی‌دورمالاردا زوراکیلیق قوربانی اولان قادینلارا اینسانی گرکچه‌لرله اوتوروم وئرمک و/ویا جینسیت اساسلی ظولم گرکچه‌سی ایله موهاجیر قونومو ویا باشقا علاوه قوروما حاقلاری وئرمه یی طلب ائتمه‌لی؛

۷۳. قارشی‌دورما سیراسیندا و سونراسیندا زوراکیلیق قوربانلارینا یاردیم و موشاویره وئره‌ن سیویل توپلوم اؤرگوتلرینه دستک اولمالی و بودجه تامین ائتمه‌لی؛

۷۴. قارشی‌دورما سونراسی دوروملاردا قادینلارا اؤزل قونولارین، قارشی‌دورمادان ائتکیلنمیش بؤلگه‌لرده‌کی یئنیدن اینشا و سیاسال یئنی‌لنمه سورجینه داخیل ائدیلمه‌سینی تشویق ائتمه‌لی؛

۷۵. اولوسال و اولوسلارآراسی سوییه‌ده، قارشی‌دورمالاردان ائتکی‌لنن بؤلگه‌لرده‌کی بوتون موداخیله‌لرین جینسیته حساسیت ائییتیمی آلمیش پئرسونئللر ایله گئرچکلشدیریلمه‌سینی تامین ائتمه‌لی؛

۷۶. قارشی‌دورما قوربانلارینا یاردیم سونما و قارشی‌دورما سونراسیندا یئنیدن اینشا و موحیطه دؤنوش فعاللیتلرینه دستک اولما قونوسوندا جینسیته حساس بیر یاناشما ایزله‌ین پروقراملاری دستکله‌مه‌لی و بودجه تامین ائتمه‌لیدیر.

 

قورومسال اورتامدا زوراکیلیق ایله ایلگیلی علاوه تدبیرلر

اویه دؤولتلر،

۷۷. دؤولت یا دا دؤولت گؤرولیلری طرفیندن ایجرا اولونان یا دا گؤز یومولان هر شکیلده فیزیکی، جینسی و پسیخولوژیک زوراکیلیق، گؤرولدویو هر یئرده و اؤزللیکله جزا یا دا حبس خانالاری، پسیخیاتریک قوروملار و بنزرلرینده جزالاندیرمالی؛

۷۸. دؤولتین ویا اوچونجو شخصلرین سوروملولوغونا باغلانا بیله‌جک دوروملاردا، مثلا یاتیلی اوخوللاردا(شبانه روزی مدرسه لر)، قوجا ائولرینده و باشقا قوروملاردا ایجرا ائدیلن یا دا گؤز یومولان هر شکیلده فیزیکی، جینسی و پسیخولوژیک زوراکیلیغی جزالاندیرمالیدیر.

 

تؤره‌مه‌یه دایر اؤزگور سئچیم حاقینا اویولماماسییلا ایلگی‌لی علاوه تدبیرلر

اویه دؤولتلر،

۷۹. زورلا قیسیرلاشدیرما یا دا آبورت، زور یا دا باسقی یولو ایله قبول ائتدیریلمیش دوغوم کونترولو و دوغوم اؤنجه‌سی جینسیت بللی ائتمه‌نی یاساقلامالی و بو آماجلا گرکلی اولان بوتون تدبیرلری گؤرمه‌لی‌دیر.

 

عادت عنعنه آدینا ائدیلن جینایتلر ایله ایلگیلی علاوه تدبیرلر

اویه دؤولتلر،

۸۰. عادت عنعنه آدینا ائدیلن جینایت گلنگینه اویغون اولاراق قادین و اوشاقلارا قارشی زوراکیلیق ائدیلمه‌سینین بوتون نؤوعلرینی جزالاندیرمالی؛

۸۱. عادت عنعنه آدینا ائدیله‌ن جینایتلری انگلله‌مک اوچون، فرقلی کسیملر آراسیندا و باشدا حاکیملر و عدلی پئرسونئل اولماق اوزره، ایلگی‌لی ایش قروپلارینا خیتاب ائد‌ن بیلگیلندیرمه کامپانیالاری داخیل، گرکلی بوتون تدبیرلری گؤرمه‌لی؛

۸۲. عادت عنعنه آدینا ائدیله‌ن جینایته قاتیلمیش، یاردیمچی اولموش یا دا تشویق ائتمیش هر کسی جزالاندیرمالی؛

۸۳. بو ایشلرله موباریزه ائد‌ن سیویل توپلوم اؤرگوتلرینی و باشقا قروپلاری دستکله‌مه‌لیدیر.

 

ائرکن ائولیلیکلر ایله ایلگی‌لی علاوه تدبیرلر

اویه دؤولتلر،

۸۴. شخصلرین راضیلیغی اولمادان زورلا گئرچکلشدیریلن ائولیلیکلری یاساقلامالی؛

۸۵. اوشاق ساتیشی ایله باغلی فعالیتلری انگلله‌مک و دوردورماق اوچون گرکلی تدبیرلری گؤرمه لیدیرلر.