سايير حركتلر

شهاب‌الدین سهروردی / حاضیرلایان: زهرا نعیمی

 

1154-جو ايلده ماراغا شهرينده دوغولموش آذربايجان فيلسوفو، اشراقيليک فلسفه‌سينين بانيسيدير. اونون اورتا عصرلرده شرق اؤلکه‌لرينده گئنيش ياييلميش سحرکارليق، گؤزباغلاييجيليق، ماگييا ايله مشغول اولدوغونو سؤيله‌ييرلر، بو حاقدا بير نئچه حکايت مؤوجوددور.

 شهاب الدين سهروردي

طلبه‌سي شمس الدين شهرزوري يازيردي: «او، کرامتلر و معجيزه‌لر صاحبي ايدي.» اشراقي فيلسوفداکي غيري-عادي کيفيتلر اؤز شاگيردي طرفيندن صوفی حاللارينا منجر ائديلير. فيلسوف مسلمان حقوقشوناسلارينين جيدي طلبلرينه گؤره، مصر، يمن و سوريه‌نين حؤکمداري صلاح‌الدين ايوبينين (1169-1193) امري ايله 1191-جي ايلده 37 ياشيندایکن اؤلدورولوب.

 ارثي: شهاب الدين سهروردينين اثرلرينين و اونلارا يازيلميش شرحلرين، حاشيه‌لرين اليازما نوسخه‌لري دونيانين بير سيرا فوندلاريندا و کيتابخانالاريندا ساخلانيلير. قيده آلينميش اللي‌ايکي اثريندن اون‌اوچو پئريپاتئتيزم، اون‌بئشي صوفیزم، سکگيزي ايشراقيليک و اون‌آلتيسي موختليف مؤوضولار اوزره قروپلاشديريليب. شهاب الدين يحیي سهروردينين زنگين ارثي 12-جي عصردن اعتيبارن عرب، فارس، قسما ده تورک ديللرينده مسلمان شرقي خالقلارينين فلسفه‌سي تاريخينده اؤزونه محکم يئر توتوب. اونون اثرلرينين اورتا عصرلرده کؤچورولموش اليازما نوسخه‌لري حاضيردا دونيانين مختليف شهرلرينده، دمشق، سانکت پئتئربورق، تهران، باغداد، قاهيره، ايسکندرييه، ايستانبول، پاريس، لندن کيتابخانالاريندا ساخلانيلير. اونون ارثينين ياييلماسيندا گؤرکملي فرانسيز شرقشوناسي آ.کوربي‌نين حاضيرلاديغي اوچ جيلدليک توپلونون اهميتي مثلسيزدير. بيرينجي مجموعه ايستانبولدا 1945-جي ايلده بوراخيليب، بورا پئريپاتئتيزمه داير اثرلرين مئتافيزيکا حيصه‌لري توپلانيب. 1952-جي ايلده تهراندا چيخميش ايکينجي مجموعه‌ده «اشراق فلسفه‌سي»، «فيلسوفلارين گؤروشلري»، «قرب قوربتي» اثرلري وئريليب. 1970-جي ايلده تهراندا بوراخيلميش مجموعه‌ده فيلسوفون اون‌دؤرد تراکتاتي توپلانيب. اونون «عاشيقلرين مونيسي» اثري او.سپيس طرفيندن 1934-جو ايلده شتوتقارتدا و دهلي‌ده، «قوش حاقيندا تراکتات»ي 1935-جي ايلده او.سپيس و خاتاک طرفيندن شتوتقارتدا چاپ ائديليب و س. فون دئن بئرج «ايشيق هئيکللري» تراکتاتيني هلند ديلينده 1916-جي ايلده نشر ائتميشدير. پئريپاتئتيزمه داير «فيلوسوفلارين گؤروشلري» تراکتاتي اورتودوکسال اسلام ايدئولوقلارينين شرق پئريپاتئتيکلرينه قارشي گوجلو هجوما باشلاديغي بير دؤوره تصادوف ائدير. بوردا مؤليف آريستوتئلچي فيلوسوفلارا حاق قازانديراراق اونلارين مدعالاري نين تحريفينه و راسيونال فيکيرلرينين بدعت کيمي قلمه وئريلمه‌سي جهدينه قارشي چيخير.

 وارليق تعليمي: اونون ايشراقيليک فلسفه‌سينده «وارليق» و «يوخلوق» آنلاييشلاري «ايشيق» و «قارانليق» آنلاييشلاري ايله افاده اولونور. شهاب الدين سهروردي واجب وارليق حاقيندا ايره‌لي سورولن بعضي مدعالاري معين معنادا ايشيقلار ايشيغينا عايد ائدير: «ايشيقلار ايشيغي بوتون مؤوجود شئيلرين وارليغينين سببيدير.» مؤوجوداتين منبعي ايشيقلار ايشيغي تيمثاليندا گؤتورولدوکده ائماناسييا نظريه‌سينين شرحي ساده‌لشير، زيرا، ايشيق مؤوجوددورسا، شعالانماليدير. ايشراقيليک فلسفه‌سيله تانيشليقدان سونرا يقين ائتمک اولور کي، بابکيليک حرکاتي‌نين ايدئولوگيياسيندا اؤنملی آنلاييشي افاده ائدن خورره ‌تئرميني ده ايشيقلار ايشيغيندان چيخان مجرد ايشيغا مطابق بير معنا داشييير. ش.سهروردي مجوسيليکله، زردوشتيليکله بلاواسطه باغلي خورره سؤزونو «معنوي ايشيق» معناسيندا ايشلتميشدير.

 ادراک نظريه‌سي: ش.سهروردي مطلق بيليگين منبعيني مادي عالمدن کناردا آختاريردي. اونون فيکرينجه، «اشراق فلسفه‌سي» کيتابيني اينتويسييانين کؤمه‌یي ایله دريندن آنلاماق مومکوندور. اشراقيليک فلسفه‌سينه گؤره، حسي و عقلي ادراک واسيطه‌سيله مادي عالمين شئيلري و حاديثه‌لري حاقيندا معين بيليک الده ائديلير، اينتويتيو ادراک ايسه اينسانا ايشيقلار عالمينين سيرلريني آچير، مطلق حقيقتي آشکار ائدير.