خانه/ ائو

تورکجه/ سعید متین‌پور

بیرلیک- مئدیا: "بو یازینین یازاری گونئی آذربایجانلی سیاسی محبوس، سعید متین پور 8 ایللیک حبس جزاسینا محکوم ائدیلمیشدیر. 2008-نجی ایلدن تهرانین ائوین حبس خاناسیندا ساخلانیلان سعید متین پور، سون گونلرده ائوین حبس خاناسی نین 350-نجی بندینه، مامورلارین هوجومو نتیجه سینده زوراکیلیغا معروض قالیب، تک آداملیق کامئرایا کؤچورولموشدو. سعید متین پور بو حاقسیزلیق و قانون پوزونتوسونا اعتیراض اولاراق آجلیق آکسیاسینا باشلامیشدیر. بو گون سعید متین پورون آجلیق آکسیاسینین یئددینجی گونودور. " 

 

بیر کامانچانین، بیر قوپوزون، بیر ترومپتین، بیر بالابانین سسینه یئتیشنده ائله بیل دونیا دورور. بیر آن بوتون سسلر؛ بیر سسدن باشقا قولاغیمدا باتیر؛ بیر آندا بوتون پیسلیکلری، بوتون روحومدا قویلانان آجیلاری، آجیمالاری اونودوب بیر سسله بیرلشیره م. تورکجه ده بئله منده باشلاندی، اونو بیر دیل کیمی بیر یازیب یارادان کیمی تاپدیغئمدا باشقا بیر شی لره گوزوم یومولدو. دونیایا بو دیلله باخماغا باشلادیم. 

بیر دیل دونیایا پنجره اولا بیلرمی؟ دیل پنجره اولماسادا دیلسیز دونیا بوگونکو دونیا دگیلدی. اینسانین دونیاسی دیل ایله دوشونولوب دیل ایله آنلادیلیر. اما مینم سورغوم بو دگیلدی. تورکجه مینم گوزومو آچدی، او گوندن گون یوخدور سوروشمایام نه ایچین بو دیلده یازیب - اوخومانی اوگرتمه دیلر؟ نه ایچین اوزوم بو ایشه باشلامادیم؟ نه ایچین بو دیلده دانیشان میللتین تاریخی اورتایا قویولمور؟ بو میللت هانسی مدنی دورومو یاشاییر؟ 

تورکجه ایله یازیب - اوخومایا باشلادیم، نه قدر تاریخ دولاشیقلارا سالیلردی دیل دورو، آخار، درین چای کیمی ایچیمه جالانیردی، من دیلیمدن بیر گوزللبک آخیدا بیلمه سیم ده. ایللر تورکجه ایله گئچدیلر. دیلیم میللته آچیلمیشدی: تورکجه یازاق، تورکجه اوخویاق، - نه آغیر گلیردی دئمه گی - تورکجه دانیشاق. زنگان ایللری «یاز»، «اوخو» دئمک له یوخ، «دانیش» دئمه گه کئچدی - مین کلمه یه بورونوردوم بیر «دانیشاق» دئمه گی دئیه م. 

بوتون گئنجلیگیم بو دیل ایله کئچندن سونرا تورکجه یه بیر جومله لیک فایدام اولماییب، اما بو دیل بوتون گنجلیگیمه معنا وئردی. فلسفه ایله دونیانی آنلاماغا باشلامیشدیم. دیل بئینیمه گیردی، فلسفه یاراتماغا باشلادی. منه مساله، سورغو وئردی و اونو چوزمه گه چاغیردی. نه قده ر بو دیله زیان وئرسم بو دیل منه اینسانلیق باغیشلادی. دوشونجه اینسانلیقدان باشقا بیر شی اولا بیلرمی؟ 

بو گون تورکجه نین قاپیسی بوتون میللتینه آچیلیب، کیم ایسته سه، اونونلا دوشونمه گه باشلایا بیلر، کیم ایسته سه اونون تاریخی ایله میللتینین تاریخینی، مدنی کئچمیشینی، اسکیکلیکرینی، دیره نیشینی، اودوزدوقلارینی اوگرنه بیلر. 

بو دیله گوز اورتمه گیمیزه، بیزه گره ک اولان فلسفه دن واز کئچمک دیر. 

بو دیلی آتیب یوخسا سئچمه گیمیزه تکجه دوشونجه ایله وارماق اولور. (توتاق بیزده دیل آتیب یوخسا سئچمه گه ایمکان وار، یوخسا گرچکده بونون اولومو اولومسوز کیمی دیر.) بیز بو دیلین قاپیسینداییق، ایللر دونیانین قاپیلارنی دولاندیقدان سونرا گلیب آذربایجاندا، خراساندا، کرج - تهرانین سونسوز خیابانلاریندا - کوچه لرینده دورموشوق. بویوک ائللر، باسکندلر، امپراطورلوقلارا صاحیب دگیلیک، بیز واریق، دیل وار، قالان بو دیل ایله بیزیم وار اولا بیلر، قشقایی لارین، شاهسئون لرین پالتارینی اولدوغو کیمی آلا بیلریک. دوولت موزه لرینده تبریز، افشار قالیلاری دووارلاری بزه ییرلر. شهر بوجاقلارندا، کندلرده اورمودان ساوه یه یوز ایللر بوندان اونجه چالدیقلاری کیمی قوپوزو چالیرلار آشیق لار، هله تبریزین آشینین، کبابینین دادی تکجه اوردادیر. اما تورکجه اولدوغو کیمی بیر مدرسه ده ده یوخ. تورکجه، اولان کیمی تورکجه دیر. اما اونلار هر شئی دن اول پالتارلار، قالی لار، یئمک لردیلر. ائله بو یئره واردیغیمیز زامان تورک فلسفه سی باشلانیر. ایسته سک، ایسته مه سک بوندان آیری نه باشلانا باشقا دامغا آلاجاق تاریخ سانیغیندا. گئجیکسه ده بو دیل ایله باشلاناجاق تورک فلسفه سی، آذربایجان فلسفه سی، فلسفه ایسته سک! 

سعید متین پور، دوم شهریور ۱۳۸۹ - بند ۳۵۰ زندان اوین

دوشونجه - اندیشه

ساخت و پرداخت هویتی در ایران/ سعید پیوندی

ساخت و پرداخت هویتی در ایران/ سعید پیوندی
ایرانی بودن به چه معناست و این حس هویتی مشترک میان مردمان سرزمینی که در داخل مرزهای امروزی کشور زندگی می‌کنند از ادامه...

ستارخان دوشونجه لرینی ، هله ده دوشونمه ین لر وار/ ابراهیم...

ستارخان دوشونجه لرینی ، هله ده دوشونمه ین لر وار/ ابراهیم...
چاغداش تاریخیمیزده اؤز دؤوروندن ایرلی گئدن اینسانلاریمیز آز اولماسا دا آراسیرا اؤزگه اولوسلارین بویوندوروغو ادامه...

ژان پول سارتر نه دئییردی؟

ژان پول سارتر نه دئییردی؟
ژان-پول سارتر (Jean-Paul Sartre) 1905-جي ايلده آنادان اولوب. گمي کاپيتاني اولان آتاسي او کؤرپه اولارکن دونياسيني ادامه...

شاید مسأله حق تحصیل به زبان مادری باشد!/ سعید متین پور

شاید مسأله حق تحصیل به زبان مادری باشد!/ سعید متین پور
در نخستین سال‌های دهه‌ی ۶۰ خورشیدی «حبیب ساهر» مدرس و مؤلف علم جغرافیا و شاعر نوپرداز با پرتاب خود از بالکن ادامه...

طبقه کارگر و مسأله ملی/ و. ای. لنین

طبقه کارگر و مسأله ملی/ و. ای. لنین
روسیه، تا آنجایی که به مسأله ملیتهای او مربوط می‌باشد، کشوری است مختلط. سیاست حکومت که همانا سیاست ملاکین ادامه...

سون ماتريال