سايير حركتلر

ویرجینییا وولفون “اؤزو اوچون اوتاق” کیتابینا بورجوم/ لیدا احمدی

1882 ده، لندن­ده آتاشاه بير عايله­‌ده دوغولموشدو. اوخولا گئده بيلمه­‌سه ده، وارلي عایله‌دن اولدوغو اوچون خصوصي معلم­لردن تعليم آلدي. آيريجا تنقيدچي آتاسي “لئسلي ائستئفان” -نين كيتابخاناسي، اونون دوشونجه­‌لرينه گوجلو قايناق اولموشدو. 13 ياشيندان فئمينيزم آخيمي­لا  تانيش اولدو. بير قيز اولاراق، توپلوم معينلشديرميش اينتيظارلار اوندان “آروادليق و آناليق” اولسايدي دا، يازيچيليق رؤياسينا دوشموشدو. ائله بو اوزدن مادي و معنوي ايستيقلالا يول آختاريردي. 22 ياشيندا آتاسي اؤله­ندن سونرا آز اولسايدي دا آزادليغي داددي. آز آرايلا  قارداشي”توبي” ده ­ اؤلدوكدن سونرا، ياخشي ارثه يئتيشدي. آما بو ارث؛ بي­بي­سي “كارولاين ائميليا ائستئفان” دان اونا يئتيشديغي ارثه باخاندا چوخ دئييل دي. بو ارث اونو مادي پرابلئم­لردن قورتوراراق، يازيچيليق يولونو اونون اوچون داها هامارلاشديردي.30 ياشيندا ائوله­ندي و 33ياشيندا(1915-جي ايلده) ايلك رومانيني يايدي. ویرجینییا نین، یازیدا اؤزه ل طرزی وار. دانیشیقلاریندا ؛ “قادین لار، كيشي­سئل ادبی معیارلارا (کیشی لر یارادیب، یایان معیارلارا) قاتلاشمایاجاقلار”  وورغولاییردی. اونجا،اینسانین اؤزه­ل­لییی اؤزو اولماقدادیر…و بیر ده توپلومسال قراردادلاردان یاخا قورتارماقدا. آمما ويرجينيانين يازيلاري ايچره، قادين­لار اوچون داها اؤز­ه­ل يازيلميش “اؤزو اوچون اوتاق”باشليقلي كيتابي اونا فئمينيزم ادبياتيندا اؤزه‌­ل بير دوروم باغيشلادي.

                                                                                                                                                                                               قادين يازارلار ايچره، ويرجينييا وولف–و يوكسلدن، اونون قادين­سال گوجلو رومان­لاريندا دئييل يالنيز، فئمينيزم ادبي تنقيدينين آناسي اولماغيندادير.اونون بو آناليغي ايسه، “اؤزو اوچون اوتاق” ايله باشلاندي.

فئمينيزم آخيمينين ايلك ليدئري اولان مئري وولستون كرافت، قادين حاق­لارينين دوغرولماسي كيتابيندا بير چوخ قاديني توپلومدا ن؛ آياقلانميش حاق­لاريني آالماغا ماراقلانديردي و بير چوخ سياسي حاق­لارينين دوغرولماسينا سبب اولدو. سونرالار جين آستين، جورج ائليوت، جان استوارت ميل كيمي­لر، قاديني جيددي ادبيات آلانينا گتيرير، بير يازار كيمي اورتايا قويدولار. بونلارين آردينجا، ويرجينييا فئمينيزم تنقيدينين ايلك تئوريسيني اولور. ائله بير بؤيوك دوشونجه آخيمي كي تكجه ادبياتي يوخ؛ بوتون علمي باخيش­لاري، قادين دوشونجه­لريني نظرده آلماق مجبورييتينده قويور، بو حاقدا اولان  يانليشليق­لاري سيلمه­يه چاليشيرو يئني آنلاتيم­لاري اوزه چيخارير.    ويرجينييا اؤزو اوچون اوتاقدا، ايلك دفه اولاراق، قاديني، قادين­سال ادبياتدا آراشديرير. بوردا ويرجينييانين  آراييش طرزي ده اؤزه­ل دير.مقاله سينيرلاريني كئچير و ادبي مقاله ژانريندا، آماجيلا اويغون دييشيك­لرآپارير. اونون بو مدرنيسم جسارتيني ايكي يؤنده آچيقلاماق اولار: بيرينجي­سي، حاكيم (كيشي­سئل) يازي قايدالاريني وئجينه­ آلماماق­دير. ايكينجي­سي ايسه اوجقاردا قالميش بير مؤوضونو، اوخوجولارينا ايسته­دييي ائتگيني بوراخماق اوچون؛  تاي­سيز و تام يئني بير طرز و باجاريقلي صميميت­ له اورتايا قويماق.

كيتابين ايلك سطيرلرينده نه دئمك ايسته­ديييني بئله آچيقلايير: “منجه يازيچي اولماق ايسته­ين بير قادينين هر شي­دن اؤنجه اؤزونه عاييد پولو و اوتاغي اولمالي­دير”. ويرجينييا ساده بير ديل ايله آرديجيل، چئشيدلي دؤشونجه­لريني آچيقلايير. بو اوزدن يازينين قونوسو قادين ويازارليق اولاسادا، بعضن بونونلا تام ايلگي سيز سؤزلرده اولور: “نظريمجه يونيوئرسيته، نادر نؤوع­لر اوچون{پناه­گاه­دير}…” . بعضن  شعر اوزمان­لاري كيمي دانيشير: “ديه­رلي شاعيرلر دويغولاردان ائله سؤز آچيرلار سانكي ايندي دوغولور، ايندي وارليغيميزدان آيريليرلار. نئچه آن اونو تانيميريق…قورخوروق…ديققت­ له آراشديرديقدان سونرا؛ شؤبهه ايله كئچميشده ياشاديغيميز دويغولارلا موقاييسه ائديريك…مدرن شعرين مشكلي بودور و ائله تام بو اوزدن هئچ بير مدرن شاعيرين شعريندن ايكي اوچ سطيردن آرتيق ياددا ساخلاماق اولمور”. سونرا شام ماساسيندا يوخسوللوغو دوشونور: ” ياخشي شام يئييلمه سه ياخشي دوشونمك اولماز. ياخشي سئومك ده اولماز. ياخشي­جا ياتماق دا اولماز”. و بو يوخسوللوغو چوخ آز آرا ايله قادينا باغلايير” اؤز جينسيمين اوتانمالي يوخسوللوغونو تحقير ائله­ييرم…”. سونرا بو قونودا  آنالاري متهم ائله­يير: ” بس آنالاريميز نه ائديرميش­لر؟ يالنيز بورو­نلاريني مي پودرلاييرميش­لار؟ دوكان ويترين­لريني مي سئير ائديرميش­لر يوخسا؟ ندن آتالار اوغلان­لارينا قويدوق­لاري ارث­لردن، اونلار دا قيزلاري اوچون قويماييب­لار؟”. اوخوجو بو سطيرلرين  فيكريندن چيخماميش، يازيچينين تيتره­ديجي آرزولاريلا قارشيلاشير: “آنالاريميز پول قازانماق صنعتيني اؤيرنميش اولسايدي­لار، و آتالار كيمي اؤز جينس­لري اوچون اؤيرنجي و آراييش كورسولريني، و بونلارلا ايلگيلي اؤدول ايمكان­لاريني يارادسايديلار، بلكه بيز غورورلو و راحات بير ياشام كئچيره بيله­يديك…اونلارين ياراريلا يارانميش ايش­لرده مشغول اولايديق بلكه…سونرا يازا بيلرديك، آراشديريجي اولارديق… آمما يوخ! پوللو اولماق­لا  اون­اوچ اوشاق دوغورماق هئچ اينسانين عؤهده­سيندن گله بيلمز! “.

ويرجينييا قادين­لارين يوخسوللوغونو، اونلارين آلچاق دوروم­لاريندا، و بونونلا ياناشي ياراديجيليق­لارينين يئترسيز اولدوغوندا، بيرينجي فاكتور كيمي بيلديرير. توپلوم يارادان مانع­لري وورغولاياراق، اتهام بارماغيني قادين­لارا دوغرو توتور.

ويرجينييانين نظرينجه پول،  گوج له نفوذ يارادير و بونلارين ايل­لر بويو كيشي­لرين قيناغيندا اولماغي، قادين­لارينين تحقير قايناغي اولوبدور..او وارليق­لار كي  قادين اولماماق اونلارين ان بؤيوك يئتنك­لري ساييلير. ويرجينييا آيري بير يئرده كيتابخانادا قارشيلاشديغي كيشي­دن دانيشير:   ” رئبكا وئست-دن بير كيتاب الينه آلميشدير…بيرآز اوخودوقدان سونرا باغيردي: اوتانماز فئمينيست! دئيير كيشي­لر اؤزلريني به­ينن وارليق­لارديلار!”.  بو باغيرتي ويرجينييا اوچون ماراقلي گلير : ” بو بير يارالانميش غورورون باغيرتيسي دئييل…اؤزونه­گووه­نج سينيرلارينا تجاووز اولونموش كيمسه­نين باغيرتيسي­دير!”  .بوردا چوخ اؤنملي بيرگئرچه­يه توخونور ويرجينييا. اونجا قادين­لار كيشي­لره گوج و گووه­نج وئرمكده بيرينجي عاميل اولوب­لار. كيشي­لري اولدوقلاريندان قات قات بؤيوك گؤستريب­لر و بو بير كيشي­نين ” كيشي” اولماغي اوچون چؤره­كدن بيله واجيبدير. اؤزونو قولايجا گوجلو حيس ائتمه­يين يولو، باشقالاريني( يعني بشريتين ياريسي اولان قادين­لاري) كيچيك دوشونمك­دير. آمما اونون بو دوشونجه­سي دوغرولماق اوچون قادين­لار اؤزلريني كيچيك گؤسترمه­لي­دير­لر­. بئله اولماسا گؤجونو   ايتيره­ر. ديه­رسيز اولار. هئچ بير ايش اليندن گلمز…تئريبون­لارين آرخاسيندا گووه­نج­له دانيشا بيلمز. قادين­لار اونلاري قاباردير و اونلار قابارينجا اؤزلري كيچيليرلر. “قادين­لار كيشي­لر اوچون سيحيرلي بير آيناديرلار. بويلاريني اوندا داها بؤيوك گؤرورلر”. بس هر كيشي­يه قادين گرك­ير. دوغرودور. بو وارليق اؤزونو گوجلو حس ائتمك اوچون آينايا باخمالي­دير. آيناني اوندان آليرسان­سا، معتاددان كوكاييني آلميش كيمي اولورسان. و بير آينا دوغرويو دانيشماغا باشلاييرسا (رئبكا وئست كيمي) آيناداكي بوي كيچيلمه­يه باشلايير و طبيعي كي اونلار اوچون دوغرونو دانيشان آينا (اوتانماز اولدوغو اوچون!) كرگ­سيز دير. آمما بوردا قاپالي بير سورغو قالير: قادين­لار ندن كيشي­لري قابارديرلار؟ ويرجينييا بونو آيدينجا جاوابلامير آمما بونولا ايلگي­لي اؤز مادي دورومونو آچيقلايير: “بي­بيمدن منه يئتيشديغي ارثدن اؤنجه، پارام پارچا قزئته­لره ايشله­ييرديم…نئچه پوند دا قوجا خانيم­لارا كيتاب اوخوماق­لا و اوشاق باغچالاريندا اوشاق­لارا يازماق اؤره­تمك­له قازانيرديم و بونلار 1918-جي ايله­دك خانيم­لارا اولان ايش­لرايدي…آمما بو ايش­لرين آجيناقلي ائتگي­سي منده داها چوخ اولدو. سوره­كلي سئومه­دييين ايش­لره قاتلانماق…قول­لار ساياغي…اونون بونون بويونا اوخشاماق…و بوتون بونلاردان دهشتلي­سي، گيزلتدييين استعدادين اؤلدوروجو دردي ايدي. كيچيك ده اولسا يييه­سينه   ديه­رلي استعداد. بي بيم اؤلدوكدن سونرا … گئرچكدن ثابت قازانجين گؤزه­ل ائتگي­سي اينسانين حياتيندا دانيلمازدير!… منه ضررلري توخونا بيلمه­دييي اوچون، داها كيشي­لر­دن نفرت ائتمك گره­ك دئييل،…داها كيشي­لرين بويونا اوخشاماق مجبورييتينده ده دئييلم، اونلارين منه وئره­سي هئچ بير شئي­لري يوخدور”. بو او قاپالي قالميش سورغونون تام جاوابي اولماسا دا، اؤنملي بير بؤلومو اولا بيلر. كيشي­لرين بويونو قابارتماق ندنينين بؤيوك فايزي، قادين­لارين مادي دوروم­لاريندان قايناقلانير. آمما بو هاميسي دا دئييل. توپلوم، كيشي­يانا اولاراق، كيشي­لرين نفعينه اولان بئله دوروم­لاري هر زامان دستك­له­يير و بير چوخ قادينين ايناميني، بئله دورومو تام طبيعي گؤستره­رك، قازانير. بوردا كيشي­لرين تحقيرينه باخماياراق، ويرجينييانين اتهام بارماغيني يئنه قادين­لارا دوغرو گؤروروك.

كيتابين اوچونجو و دوردونجو فصل­لرينده، ويرجينييا قادين­لاري تاريخده آراشديرير و ادبيات آلانيندا تاريخ بويو يوخلوقلارينا ندن آختارير. قادين­لار نئجه دورومدا ياشاييرميش­لار؟ يازارليق و تماميله ذهني چاليشمالار بعضي ايمكان­لارا باغلي­دير. بو ايمكان­لار ايسه اؤزه­ل ياشام­لا ايلگيده­ دير. قادين­لارين اؤزه­ل ياشامي، بير چوخ دؤورده، ائو چارچووه­سينه سيخناشيليب و اونلارين يالنيز ياشام­لاري دئييل، اؤزلري بيله  -آتا- و – ار-  قيناغيندا اولوب­لار. اوندان كيشي­نين اويونجاغي و حقارتلي گوج قايناغي اولماقدان باشقا اينتيظار يوخدور. آمما اگر بو وارليق­لارين بيري؛ اؤزوندن اومدوغو شئي­لر بونلار  اولماسايدي­سا…؟ اؤرنه­يين آتاسي بويوردوغو كيمسه­ايله ائوله­نمك ايسته­مه­سه­يدي و يا قارداشي كيمي كيتاب اوخويوب نسه يازماق ايسته­سه­يدي… آيدين­دير. او ياشاميندان دويموش خانيم، يا آتاسينين كؤته­يي آلتيندا (اؤلمه­سه­يدي سه) ياشامينا گئري دونه­جك­دي، يا ائودن قاچيب هاماردا باشقا قوردلارين نسيبي اولاجاقدي، بيردن بونلارين هاميسيندان ياخا قورتاريردي­سا دا؛ يقين كي دلي اولاجاقدي. چون اونون بئله ايستك­لري ايله دوشونجه­لري توپلوم­لا تام تضاددايميش.

18-جي عصره­دك قادينين يازماق حاققي اولماييب و اونون يازيچيليغي، تام آيدين اولاراق بو تاريخدن-آمما آلقيشلا يوخ، تحقيرله- باشلانير. بو باشلانيش دا رومان­لا اولور. بونوندا يئرلي ندني وار. شعركيمي يازي­لار اولدوقجا ديققت ايسته­يير ،ديققت ايسه  هاي­كوي­دن اوزاق بير يئر. بو دؤورون قادين يازارلاري،­ اوتوراجاق اوتاغيندا يازمالي­ميش­لارو بئله­ليك­له رومان يازماغا يول داها هاماريميش. بو قادين­لارين تجروبه­لري بيله بو اوتاقدان گئنيش دئييل دير. گوجلو رومان يازماق اوچون يئترينجه تجروبه گره­كير. تجروبه­ني ده دورد دوواردا قازانماق اولماز. گزيب دولانماق ايمكاني اولمايان قادين­لارين رومان­لاريندا چوخ گئنيش بير دونيا يوخدور و بو اينتيظار، ار، نئچه اوشاق و بيتمه­ين ائو ايش­لري­له مشغول اولان قاديندان گئرچكدن يئرسيزدير. جين آستين ده بئله بير دورومدا يازيرميش و بوتون بونلارا رغمن چوخ گؤزه­ل يازي­لارا صاحيبدير و ويرجينييا دئميشكن ” جين آستين، شئكسپييئر ساياغي، يازديغي هر سؤزجويه نفوذ ائله­يير”. كسين كي ويرجينييا بيلسه­يدي – بير چوخ آراشديريجي­لارا گؤره-  شئكسپييئر بير قادينيميش، سئوينجي قات قات درين اولاجاقدي.

يازار قادين­لارا قارشي اولان تحقيرلرين پئسيخولوق ائتگي­سي، يازي­لارينين كئيفييتينده آيدين­دير. بو تحقيرلر ايسته­ر ايسته­مز باجاريق­لارين تام گؤسته­ريلمه­­سينه  انگل اولورموش. ويرجينييا بو دوروم­لا باغلي دئيير:” ساكين­لييي گره­كن زامان آجيق­لا يازير، عاغيللي يازمالي زامان، دلي دلي يازير.كاراكتئرلردن يازان زامان­سا، اؤزوندن يازير”. بو تحقيرلرين ائتگي­سي بعضن او قده­ر درين­له­شير كي قادين­لار يازي­لاريني كيشي­آديلا ايمضالايير يايير­لار. آمما ويرجينييا بو تحقيرلري تحقيرله جاواب­لايير: “عنعنه و گله­نك­لر سينيرلارينا سيخناشماييب دوروم­لارينا قانع اولمايان قادين­لاري محكوم ائله­مك، كسين دوشونجه يئترسيزلييي­دير”.

سون فصل­لرده، ويرجينييا ياشاديغي دؤورون قادين يازارلاريندان دانيشير. داها قادين­لار يالنيز روماندا دئييل، ايسته­ديك­لري هر بير قونودا يازا بيليرلر.جين هاريسون يونان­دان يازير، وئرنون لي ايسه ائستئتيكادان.                                                          بو دوروم ويرجينييانين سئوينجينه سبب اولسا دا ؛ قانع اولدوغو دئمك دئييل. بونو كيتابين سونوندا گنج قادين­لارا اؤز توتاراق بيلديرير: ” منجه سيزلرين جهلي اوتانمالي­دير…تاريخده  اولمايان­لار كيمي ياشاييب­سينيز…بلكه دئييرسينيز دونيانين  توم اينسان­لاريني بيز  دوغورموشوق، هئچ اولماسا 6 ياشلارينادك بئجرميشيق تربييه وئرميشيق و بونلار بيليم قازانماق­ فرصتيني آليب بيزدن. دانميرام آمما آنالارينيزا باخاندا سيزلره يول داها آچيقدير. 1866-دان سيزلر اوچون آكادئمي­لر وار.1880-دان وارينيزا تام ايختيارينيز اولوب (بوتاريخدن اؤنجه قادين­لار اؤز وارلارينا ايختيارسيزيميش­لار) ، 1919-دان  راي وئرمك حقينيزي آلميشسينيز و ايل­لردير كي بير چوخ ايش­لر اوزه­رينيزه آچيقدير… بو بهانه­لر چوخدان باياغي­لاشيب…

هه! قادين­لار؛ دورومونوز چوخ اوتانماليدير هله ده”. (بونو ويرجينييا 70 ايل بوندان اؤنجه دئميش سه ده…) هه…قادين­لار هله ده…


www.anlam.biz