سايير حركتلر

سيمين صبري: تورک ديلينده فمينيزم ادبياتي ياراديلماليدير


گونئيلي پسيخیاتر و گونئي آذربايجان ميللي دئموکراتيک بيرليگي تشکيلاتينين سؤزجوسو سيمين صبري حساب ائدير کي، ايران آذربايجانيندا فمينيست دوشونجه‌نين ياييلماسي تورکجه فمينيزمين تشويق ائديلمه‌سيندن آسيليدير. ايراندا ميللي مدني حرکتله و قادين حرکاتي آراسينداکي علاقه‌لر حاقيندا آمئريکانين سسينه موصاحيبه وئرن فعال دئيير کي، قادين حاقلارينين تامين اولونماسينا ميللي مدني موباريزه‌نين ترکيب حيصه‌سي کيمي باخيلماليدير.

خانيم صبري ايراندا تانينميش قادين حوقوقلاري مودافيعه‌چيلرينين غئيري-فارس قادين فعاللاريني آدلانديرماق اوچون ايستيفاده ائتديکلري تئرمينولوگيياني تنقيد ائدير: "اونلار تورکلر يا ديگر غئيري-فارس جمعيتلرده قادين حاقلاري اوغروندا فعاليت گؤسترنلري ائتنيک قادين فعاللاري، فارس فعاللار يا فارس ديلينده فعاليت آپارانلاري ايسه غئيري-ائتنيک قادين فعاللاري اولاراق تقديم ائدير. بو دوزگون آدلانديرما دئييل. فارس قادين فعالي ايله تورک يا کورد قادين فعالي آراسيندا نه فرق وار کي؟ ندن بيري ائتنيک او بيري ايسه غئيري-ائتنيک آدلانير؟" 

پسيخياترين سؤزلرينه گؤره، بئله آدلانديرمالاردا فارسلارين دا بير ائتنيک قروپ اولماسي کؤلگه آلتيندا قالير، هابئله فارس کيمليگي اوست کيمليک و ايرانين اساس کيمليگي کيمي تقديم ائديلير.

سيمين صبري عئيني زاماندا بعضي فارس قادين حوقوقلاري فعاللارينين غئيري-فارس خالقلارين پروبلئملري ايله باغلي ياناشمالاريني موثبت قييمتلنديرير. اونون دئديکلرينه گؤره، "ايراندا قادينلار ضربه گؤرموش و ازيلميش طبقه‌لردن بيري اولدوقلاري اوچون بعضي قادين فعاللاري آيري‌سئچکيلييه معروض قالان غئيري-فارس جمعيتلرين ده درديني آنلاييرلار، بونا گؤره ده حاقي داها تئز قبول ائده بيليرلر."

"آنجاق اونلار بيزي عئيني سويه‌ده گؤرمه‌لي، بيزي اؤز آديميزلا تانيماليديرلار. هر کس اؤز کيمليگي ايله اورتادا اولماليدير، کيمسه او بيرينه ائو صاحيبي کيمي باخماماليدير،" دئيه نروژده ياشايان گونئيلي فعال علاوه ائديب.

ديل و گوج آراسينداکي موناسيبته توخونان خانيم صبرينين فيکرينجه بير ديلده فمينيزم ادبياتي يارانماسا، او ديلده دانيشان جمعيت ده بو گؤروشلري منيمسه‌يه بيلمز.

"ايران چرچيوه‌سينده ياشايان تورکلر اوچون تورکجه‌ده فمينيزم ادبياتي ياراديب، هابئله دونيادا بو ساحه‌ده يازيلان اثرلري تورکجه‌يه چئويرمک لازيمدير،" دئيه او وورغولاييب.

 

http://www.amerikaninsesi.org/content/article/1751442.html   بو لینکدن موصاحیبه نین سس فایلینی دا دینله یه بیلرسینیز