ديالوق و پولميك

علیرضا اردبیللی: اساس شفافلیق و آیدینلیقدیر

 

 

علیرضا بَی اردبیللی ایله "پارلامنت" مسئله‌سی حاقیندا سؤیله‌شی

 

  • ·      سياسي تشكيلاتدان تعريفينيز نهدير؟


سياسي تشكيلات، يعني فرقلي فيكيرلي آداملارين، اورتاق آمالي يولوندا، واحيد ايراده‌ني، استراتژي و تاكتيكلره چئويرن و فعاليتلرين دواملي­ليغيني و پلانلار اوزرينده آپاريلماسيني تأمين ائدن استروكتور.

بو حاقدا آرتيرماق اولار كي، تشكيلات بير ايدئولوژي يا حتي سياسي پروقراما اينانلارين ييغيناجاغي دئيیل. يالنيز و يالنيز سياسي بير پروقرامي حياته كئچيرنلرين اورگانيدير. سياسي تشكيلاتين بو موصاحيبه­نين قونوسو ايله ايلگي­لي­اولان باشقا اٶزللي­يي، بوردا، اورتاق فيكيرلرين تمل و بيرلشديريجي فاكتور اولماسيدير. يعني هم "ساده سياسي تشكيلات" و هم "اوست قوروم" كاراكتئرلي يا "چتير تشكيلات"، هر ايكيسي، اورتاق فيكيرلرين اساسيندا قورولور و فعاليت ائدير.

 

بو ايكي تيپلي تشكيلاتين حاقيندا بير آز آرتيق آچيقلاما وئره بيلرسيز؟

"ساده تشكيلات"، يالنيز اٶز عوضولريندن عيبارت اولدوغو حالدا، "چتير تشكيلات" يا "اوست قوروم"، باشقا ساده تشكيلاتلار و او تشكيلاتلار هابئله هئچ بير تشكيلاتا عوضو اولمايانلاردان يارانير. عرب سٶزو ايله "جبهه" دئديیيميز، تشكيلات نٶوعي، ائله بو تيپلي تشكيلاتدير. بير ميثاللا بو ايكي تيپلي تشكيلاتين فرقينی داها آيدين گٶسترمك اولار، ايدمان (ایسپورت) ساحه­سينده، هم ايدمان كلوبلاري و تيملري اولور، هم ده "ميللي تيم"لر. فنرباغچا اگر ساده بير تشكيلاتا بنزه­ييرسه، "توركيه ميلي فوتبال تيمي"، اوست قوروم ساييلا بيلر.

 

  • ·      دموكراتيك توپلومدا سياسي تشكيلاتين اٶزلليكلري نهلردير؟ هابئله، همن اٶزللكيلر، غئيري دموكراتيك جمعيتده نئجه اولور؟


هم دموكراتيك هم غيري دموكراتيك توپلوملاردا، سياسي تشكيلات، دَيیشيكليك ياراتماق آراجي (واسيطه­سي)دير. فرق بوردادير كي، توپلوم دموكراتيك اولاندا، سياسي تشكيلات جمعيتين لئقال(یاسال) و نورمال بير بٶلومو اولور و دَییشيكليك، سياسي سيستيمين ايچيندن آپاريلير.

 

آمما غيري دموكراتيك توپلومدا، دَیيشيك­ليك ياراتماق پئشينده اولان موخاليفتچي تشكيلات، غيري لئقال سايیلير و سياسي سيستمين ديشيندان، اونو دَیيشمك يا دئويرمك ايسته‌یير. بو توپلوملاردا، موخالفت جرگه ­سي­نين سياسي تشكيلاتلاري، ايقتيداردان،  "خالق دوشمني"، "ياد عاميلي"، "دين دوشمني" و بو كيمي ائتيكئتلر آليرلار.

 

سياسي تشكيلاتين، دموكراتيك دونيادا يئريني موعينلشديرن، برابر حقوقلو وطنداشلارين سسي‌دير. بوتون سياسي تشكيلاتلارين طالعي سئچکي ایله چٶزولور. يعني تشكيلات عوضولري‌نين ايراده‌سيله يارانير و آزاد وطنداشلارين سس‌لري اساسيندا يئري معلوم اولور. بو باخيمدان، آزاد سئچکي، ضرابخانه چكيجي كيمي، هر سياسي پارتيا و سياسي بلوكون گوجونو و سياسي قودرتدن پايي­ني موعينلشديرير.

 

همين تشكيلاتلارين سياسي حاكميتدن ده پايي، سس حاقينا ماليك اولان وطنداشلارين سسلري اساسيندا معينله‌شير و وطنداشلار اونلارين ايناملاريني دوغرولدان پارتيايا ايناملاريندا دورورلار و.... بوتون بونلار بيزيم محروم اولدوغوموز دموكراتيك سياسي حيات قايدالاريديرلار.

سياسي حاكيميتين قيمتي ده بير معنالي اولاراق خالقين ريفاهي‌ني گٶسترن اينديكاتورلارلا: ايقتيصادي آرتيم، اينفلاسيا، ايش‌سيزليك، عموم داخيلي گلير، جيني‌ايندكسي اساسيندا سوسيال عدالت  Gini Coefficient، دونيا ميقاسيندا موقاييسه اولان تحصيلات سيستمي‌نين نتيجه‌لري و بو كيمي گٶستريجي‌لرله وئريلير.

·      غيري دمكراتيك توپلومدا بو بالانسلار نئجه الده اولور يا اولمور؟

سياست جاذبه­ سيز بير ايشدير. يالنيز ايده‌آليستلر و اٶز ايده‌آللاري‌نين رئال‌لاشماسينين، نه قدر چتين اولماسيني بيلمه‌ينلر و بيلديكلري حالدا، بو چتينليكدن قورخمايانلار بو ايشه جذب اولورلار.

بونلارين ايشي، بيابانلاردا قوطب­نماسيز، يول گئدن كاروانلارا بنزه‌يير، مقصدي بيليرلر آمما نه يول و نه مقصده چاتيب- چاتماياجاقلاري حاقدا بير گارانتي‌لري يوخدور. اومودسوزلوق و اومود آراسيندا دائمي تردد، اينسانلارين ايراده‌لريني ايمتاحانا چكير. برابر يولا دوشن كاروانين، مقصده چاتيب چاتماياجاغي و اَن ياخشي حالدا هانسي تركيبده مقصده چاتماسي دائمي بير سوآل كيمي قالير.

يالنيز مقصد بلليدير. آمما نئجه بو مقصده دوغرو، اَن قيصا يوللا آدديملاماق و بو حاقدا آرايا گلن فيكير آيري­ليقلاريني تنظيم ائديجي مئكانيزملردن خبر يوخدور.

بئله بير حالدا، هانسي سياسي تشكيلاتين و سياسي ليدر يا سياسي آكتيويستين، دَيري و يئري، موباحيثه قونوسونا چئويريلير. ياش، سياسي تجروبه و خصوصيله زيندانلار و ايشكنجه ­لره دٶزموش سياسي فعال­لار و كاريزماتيك شخصيتلر، قابيل ناطيق­لر و بو كيمي اساسلاردا، سئچيلن حركتچي‌لار، ليدر كيمي تانينيرلار.

 

سس‌وئرمك صانديقلاري­­نين تنظيمله­ييجي و ضرابخانا چكيجي كيمي، هر تشكيلات و شخصيتين دَيري و يئريني معين‌لشديرن رولونو، هئچ باشقا عاميل عوض ائده بيلمير و غيري دموكراتيك­ محيطلرده فعاليت ائدن سياسي جريانلار، بو طرفسیز و دموكراتيك عاميل­ين يئريني دولدورماقدا، چوخ بٶيوك چتينليكلره معروض قاليرلار. سانكي سيز محكمه پراسئسيندن، "مونصوفلر هيئتي"نين رولونو سيلميش اولورسوز. نورمال محكمه سيستيمينده، طرفلر دانيشيرلار و استدلال ائديرلر و سونوجدا، مونصوفلر هيئتي نتيجه­ني موعينلشديرير. سس‌وئرمه صانديقلارينين قضاوتيندن محروم اولان سياسي سيستم، ائله بير ناقيص محكمه­ يه بنزه ­يير.

اگر بو گون گونئي آذربايجاندا، دموكراتيك سئچکي­لر كئچيريلسه، هم غاليب سياسي ايراده بليرلنر و هم سايير سياسي قووه­لرين چكيسي، موعين اولار. آمما بو گون دموكراتيك بير حيات، ميللي حاكميت و وطنداش حاكميتي­نين اولماديغي شراييطده، هانسي قووه­نين نه آغیرلیق­ صاحيبي اولوب-اولماديغي­ني بيلمك مومكون دئيیل. بو ايسه، اينتريقالار(دسیسه، حیله) و بوش ايديعالارا زمين يارادير و ساده تشكيلاتلارين يارانماسي مومكون اولسا دا، ايكينجي تيپلي، يا چتير تشكيلاتلارين يارانماسيني موركب بير پروسئسه چئويرير.

 

  • ·      وطن‌ديشيندا گونئي آذربايجان پارلامنتي نئجه بیر تشكيلاتدير؟

بو آد، فرقلي محتوالارلا دولدورماسی مومکون اولان بیر قابا بنزه‌ییر. بو سببدن من بو آد اوزَرینده دايانميرام. يعني گونئي آذربايجان قورتولوش موجاديله­سي­نين ديش قولونون ياراتماق ايسته­دييي تشكيلات يوخاريدا ايضاح ائتدي­ييم، ايكينجي تيپلي تشكيلاتدير. ايندي بو تشكيلات هم "جبهه" آدلانا بيلر، هم "پارلامنت" و هم باشقا آدلار داشييا بيلر.

  • ·      بو مضمون، ندن عيبارتدير؟

مقصد، گونئي آذربايجان ديشيندا، ميللي قوروتولوش حركتي‌ني تمثيل ائدن لئقتيم قوروم صاحيبي اولماقدير.

كيسيجنره منسوب معروف بير سٶز وار: "آوروپا؟ آوروپا ايله دانيشاق؟ لوطفا بير آد و تلفون نومره­سيني منه وئرين!"

 بو معنادا گونئي آذربايجان قورتولوش موجاديله­سي ايچريده نه قدر گئنيش اولسا دا، ديشاريدا دونيا ايجتيماعيتي ایله ايلگي­لنمك و دونيا ايله اٶز آراسيندا كٶرپولر سالماق اوچون، "آد و آدرس" صاحيبي اولماليدير. بو ايش ايكي يوللا حياته كئچه بيلر: يا هئچ باشقا سياسي گوجله موقاييسه ائدیله بيلمه­ين، بير قدر قدرت آمما "ساده" سياسي تشكيلات يا بوتون سياسي تشكيلاتلار و سياسي فعال­لارين ايراده­سي و خئير دوعاسيله يارانميش، بير "چتير" تشكيلات.

  • ·      يقين دئمك ايسته‌ییرسينیز كي، بيرينجي تيپلي تشكيلات مومكون دئيیل و ايكينجي واريانت(گزینه) اوزره ايش گئتمه­ليدير. ائله‌مي؟

تماميله دوغروردور!

  • ·      بو مقصده نائيل اولماقدا، هانسي پروبلئملر واردير؟

 بئله بير قورومون يارانماسي و اوغور قازانماسي اوچون اوچ شرط اولماليدير:

  1.     يارانميش بو قوروم، دونيادا گونئي آذربايجان تمثيلچي‌سي كيمي تانينسين
  2.    گونئي آذربايجاندا ميللي حركتي‌نین ديش تمچيلچي‌سي كيمي قبول اولسون
  3.    گونئي ديشيندا ميلي حركاتين سٶزچوسو  كيمي صلاحيتللي سانيلسين.

 

بو 3 شرطين ايلك ايكيسي پروبلئم ياراتمير. دونيا ايجتيماعيتي بيزيم بير آغيزلا دانيشماغيميزي ايسته‌یير و ايچري‌نين يئگانه آرزوسو، بيزيم ديشاريدا اورتاق ديل تاپماميزدير.

پروبلئم، ائله بيزيم فعاليت ائتديييميز موحيط، يعني وطن ديشيندادير. بوردا اولان سياسي قووه­لر، اٶنجه سٶيله ­دييم سببلردن، اورتاق ديل تاپماقدا چتینلیک چكيرلر.

 

  • ·      سون هفته ­لرده، كوپنهاگئن­ده، باش توتموش تشبوثدن سونرا، بو آدديم و عموميتله پارلامنت ياراتماق ايده­سينه قارشي تنقيدي فيكيرلر سسلنميشدير.  بوتنقيدي باخيشلار حاققیندا سیزین فیکرینیزی اؤیرنمک ایستردیک.

دئمك اولار، بو فيكيرلرين چوخونو اوخويوب، دينله‌ميشم. بورایا كيمي سٶيله­نن فيكيرلري 3 يئره بٶلمك اولار:

 

  1. كئچميش يوللارين ميراثي اولان، آرتيق اونودولموش حئساب اولان اينتيريقالارين عكس صداسي. بللي اولدوغو كيمي، اوزون ايللردن باشلایان ياخين فعاليتلري­نين موثبت نتيجه­لري و تجروبه­لي ­ايله ياني سيرا، بير سيرا نئقاتيو تجروبه­لر، آجي خاطيره­لر و اوغورسوز چابالار دا، ذهن­لر ده آنبار اولوب قالير. اگر موثبت تجروبه­لر و اوغور دوغموش اورتاق پلانلار، اينسانلاردا بير- بيرلرينه قارشي رغبت ياراديرسا، باشقا تيپلي تجروبه­لر، اينامسيزليق و دافعه انرژيسي يارادير. بير سيرا بعضا چوخ كسکين تنقيدلر، بو سببلر يعني پارلامنت مسئله­سيله اصلا ايلگي­سيز اولان موتيولردن دوغان تنقيدلردير و بو "پارلامنت"، اسکي چيبانلارين دئشيلمه­سينه بير فورصت يا بير بهانه­دير.

    "دونيا آذربايجانلي­لار كونگرئسي (داك)" كيمي تانيديغيميز چوخ ائنيش- يوخوشلو يوللارين كئچميش يولچولاري‌نين، بو ساحه­­ده آغير بير يوك داشیييرلار. هميشه اويون قايدالاري چرچيوه­لرينده قالماميش آيريلمالار و ضيديتلردن يارانانلار و بو پروسئسلردن تأثيرسيز قالماميش كئچميشلرده "داك"منسوبلاري كيمي تانينان اينسانلارين بير سيراسي، حالا آرالاريندا اولوب كئچنلري، آرشيوه وئرمه­ييب، هر بير فورصتده اسکي حسابلاري چوروتمه­يي گونده­لييه چيخارماغا جهد ائديرلر.

     
    بو حاقدا، من مسئله­نين تاريخي و تفروعاتيله تانيش اولماديغما گٶره بوندان زياده كونكرت بير سٶز سٶيله­يه بيلمه­رم.
  2. سورگونده گونئي آذربايجان پارلامنتي سورونو ايله ايلگيلي سٶيلنميش بير سيرا فيكيرلر، ائله بير قايناقلاردان گلير كي، بو گونه كيمي اونلاردان ميللي حركت حاقيندا، منفي تبليغاتدان باشقا بير سٶز ائيشيدن اولماميشدير. بونلارين بعضي­لري اولا بيلر استالين دٶورونون كمونيستلري­نين اسکي فيتوالاري و "توضيح المسائل"لريله ميللي حركته باخيب، بو حركتين او ايدئولوژيك چرچيوه­يه سيغان ائلمنتار ايستكلريني قبول دا ائتسينلر. تجروبه گٶسترير كي،  بونلار هانسي زمان و هانسي مكاندا بولوندوقلاري حاقدا دقيق دوزگون بير آنلاييشا صاحيب دئيیللر. بو آدرسلردن و سايير غيري دموكراتيك عونوانلاردان، پارلامنت حاقيندا يازيلان سؤزلر منفي اولسادا، تارتيشماغا گلمز.
  3. يوخاريداكي سٶزلرين ديشيندا، سون هفته­لرده، سورگونده گونئي آذربايجان پارلامنتي حاقيندا، جيدي و پرينسيپال فيكيرلر اورتايا قويولموشدور. بو سٶزلرين آغيرليغي، ميلي حركتين سيرالاريندا دموكراسي آنلاييشي­نين اينكيشافي و سياسي يئتکينلي­يين تظاهورو كيمي دَيرلنديريلمه­ليدير. من موصاحيبه­ميزين داواميندا بو فيكيرلره توخوناجاغام.

 

 

  • ·      بیر سیرالارینا گؤره وطن‌دیشیندا پارلامنت اوچون سئچیم ایمکانسیزلیغی، بو تیپ پارلئمانلاری تمثیل بؤحرانی اوزلشدیرر. بو اوزدن ده  طرفین "پارلامنتي ميللت سئچر" دئییب تنقید ائدیرلر. سیز بو حاقدا نئجه دوشونورسونوز؟

 

منجه بوراكيمي اولان موباحيثه­لر، بو ايفاده­نين معناسيندان باشلامالي ­ايدي. گونئي آذربايجان ميللي حركتي­نين وطن‌ديشيندا تمثيل­ائدن بير اوست قوروم، آديني "پارلامنت" قوياركن، اٶلكه­لري ايداره ائدن قانون وئريجي اورقان اولماق مودعاسيندا اولا بيلمز. بو ايديعاني ائدن ده يوخدور.

ايسوئچده، بعضي ايدمان­ فعاليتلرينده، مسئول شخصي "ژنرال" Cupgeneral آدلانديريرلار.   يا دونيانین اَن بٶيوك هوميناتر يارديم تشكيلاتلاريندان اولان The Salvation Army (رستگارليق يا نيجات اوردوسو) واردير كي، بوتون تشكيلات فورومونو حربي اوردولاردان آلميشدير و مسئول شخصلري ده، ژنرال، آفيسر و بو كيمي آدلانديريرلار. ايندي بو تشكيلاتلارا دئمك كي، بو قويدوغونوز آد موناسيب دئيیل و اونلاري ايتتيهام ائتمك كي، سيز "ژنرال" نه اولدوغونو بيلميرسيز، دوزگون دئيیل. هر ايكي مييثال­دا، حرب و اوردو عالمي­نين، ديسيپلين و دمير تشكيلات اولمالاريندا مٶوجود اولان بير كاراكتئره سٶيكنمك قصدي واردير.

 

كوپئنهاگئن ده توپلانيب، ياراتديقلاري اورقانا "پارلامنت" آديني قويانلار حاقيندا دا همن سٶزلري دئمك اولار. طبيعي كي، اونلار دا، يوخاريداكي ميثال­لاردا ايشله­نن "ژنرال" كيمي،  "پارلامنت"ين نه اولماسيني بيليرلر و بو دوستلار دا، بو آد آلتيندا فعاليت ائتمه­ده معين بير مثبت معنا گٶرورلر.

سيزين سوآلا گلديكده، دوغرودور "پارلامنتي" ميللت سئچر، آمما "جبهه" ده موحاريبه­ده اولار، "جيناح"دا و "مٶوقع"ده اصلينده حربي اوردودا اولان شئي­لرديرلر. آمما بيز بوتون ديللرده، نورمال سياسي تئرمينلر كيمي، بو سٶزلري قوللانيريق. بو منطيق­له بو دوستلارين "پارلامنت" آديني سئچمكلري، بو تشكيلاتين ميللت طرفيندن سئچيلدي­يي­ني ايدديعا ائتمك معناسي وئرمير.

 

·      خاريجده فعاليت ائدنلرين بير چوخو ايله  مصلحتلشمه‌مک باشقا سؤیله‌نن بیر تنقیددیر. محدود اینسانلارین ایشتیراکی ایله کئچیریلن بو اوتوروم دوغرو آددیم ساییلا بیلرمی؟  

 

بوردا ايكي مسئله ­ني من آييرماق ايستيرم:

بير: هامي ­اوچون موداخيله ايمكاني،
ايكي: هامي­نين ايشتيراكي يا حتي موداخيله ­سي.

بو ايكي شرطدن، يالنيز بيرينجي تأمين اولا بيلر. يعني آچيق بير بياناتدا عموم گونئي آذربايجانلي­لارين فيكيرلريني سوروب اونلاردان بو حاقدا هر بير اٶنري ايسته­ مك اولار. بو شرط گرك تأمين اولسون. آمما عملده هامي­نين قاتيلماسي­دا مومكون دئيیل. بيلريك كي، حتي دونيانين اُن گليشميش دموكراتيك توپلوملاريندا بئله، "هامي" موباحيثه­يه قاتيلماز. كوپئنهاگئن توپلانتي­سيندا بو شرط تأمين اولماميشدي. يعني هامي اوچون نه اينكي موداخيله ايمكاني، اونلارين خبرلري بئله يوخ ­ايدي. بو تنقيد، تماميله يئرينده­دير. هر بير اوست قوروم يا چتير تشكيلات اونون قوروجولاريني تمثيل ائده بيلر و كوپئنهاگئن توپلانتي­سيندا، وطن ديشيندا فعاليت ائدن گونئيلي قووه­لرين چوخ كيچيك بير قيسمي قاتیليردي و يارانميش قوروم­دا، حقوقي آنلامدا يالنيز اونلاري تمثيل ائدير. سيز، آمستردام توپلانتي­سينا قاتيلان 300 نفري، بو توپلانتي­دا ايشتيراك ائدن آز سايي­لا موقاييسه ائدركن، بو  ايشين محدود ميقياسلي اولماسيني موشاهيده ائده بيلرسيز.

  • يعني دئمك ايسته‌یيرسينیز كي، گرك بئله بير توپلانتي بوتون قووه ­لرين يا معين بير سايي­دا قاتيليمجي­لارين ايشتيراكيلا اولسون؟

يوخ! اساس شفافليق­ و آيدینليقدير. گرك  بوتون سياسي قووه­لره ايشتيراك ائتمك شانسي تأمين اولسون. منجه گرك بو مسئله آچيق موذاكيره مٶوضوعسو اولسون، سونرا عملده هاميني بير تاوان آلتينا ييغماق مومكون اولان ايش دئيیل.

  • ·      بس سيزين اٶنري­نين كوپئنهاگئن ده باش توتموش ايشله هانسي اساس فرقي واردير؟

اساس فرق بورددير كي، منيم اٶنريمده، هامي­نين موباحيثه ­لرده موداخيله شانسي اولور. عملده هامي بو حاقيندان ايستيفاده ائتمه­سه ده، بو "شانس"ين اولماسي، پروسئسه باشقا بير لئقئتيمليک وئرير.

 

·      كئچميشده ياخينلاشديريجي ویا اوزلاشدیریجی رول اويناماميش اينسانلارين بو ايشده ایشتیراک و موداخيله‌سي سیزجه نئچه بیر تاثیری اولاجاقدیر؟

 

كوپئنهاگئن توپلانتي­سي، آز سايي­دا قاتيليمچي ایله باش توتماسي، بوحاقدا دا اٶز منفي تأثيريني بوراخميشدي. يعني سيز دئين، ياخينلاشديريجي و اوزلاشديريجي رول اويناماغا قادير اولان قووه­لرين ده بوش يئري حيس اولونوردو.

·        اٶنجه دئدينیز كي، هر قوروم، حقوقي معنادا، يالنيز اٶز عوضولريني تمثيل ائده بيلر، بس 10، 20 يا 30 نفري تمثيل ائدن بير قورومون آديني "پارلامنت" قويماقدا نه مقصد اولا بيلر؟
هر كس بير آد قويماني بير جور باشا دوشه بيلر. بير مقصد بو اولا بيلر كي، بير قوروم اٶز اوزرينه اخلاقي بير مسئوليت گٶتوروب بير "پارلامنت" كيمي، ميلتين سٶزچوسو اولسون و پارتی اولاراق يوخ عموم ميللي سياسي آدديملار آتسين. اگر بو قوروم بو ايشه نائيل اولا بيلسه  يئنه ده "حقوقي استاتوس" قازانا بيلمز، آمما موفق اولدوغو حالدا، اوز ميللتي­نين خئير دوعاسي و معنوي حيمايه­سيني قازانا بيلر. بيز ادبي يا مدني شخصيتلره ده سس وئرميريك و اونلارين ايشلريني به­ينديكده، اونلارا سايقي و محبتله ياناشيريق. بير بٶيوك اديب يا داهي موسيقي­چي، حقوقي استاتوس صاحيبي اولمور يا گئنيش خالق كوتله­سي و بوتون توپلومون سئوگي­سيني و سايقي­سيني قازانا بيلير.

 

  • ·      سیزجه پارلامنتین قورولماسیندا قوزئی آذربایجانلیلارین روللارینین اولماسی موثبتدیرمی یا منفی تاثیر گؤستره بیلر؟  

بو يئني بير مسئله دئيیل. دونياني دوشمن حئساب ائديب، ايران چرچيوه­سيني دوزگون و دونياني فاسد بيلن بير غيري دموكراتيك تفكور آلتيندا ياشاميش گونئي آذربايجانلي­لار دا بو پارانويايا(پارانویا: شکاکیت) دوچار اولماق گؤسترگه‌لری(علامت، نشانه) آز دئيیل. بو سببدن گويا هميشه "خاريجي" اَلي بيزي كونترول آلتينا آلماق ايسته‌یير و فيتنه­ايله مشغولدور!

طبيعي بير حال كيمي، گونئي آذربايجان آدينا يارانميش هر بير سياسي تشكيلات، بو آدا دا صاديق قالمالي يعني اٶز پلاتفورمو و سياستيني اٶز سوژه­سي اطرافيندا ياراتمالي و آپارماليدير. بو طبييعي­ حالدان، ايران سياستنه خاص اولان "خاريجي فوبيا"يا آلوده اولماغاچوخ يول واردير.

من ساده­جه بير فاكتي خاطيرلاديم: وطن ديشيندا سياسي قووه­لر آراسيندا گٶزه چارپان بير سايي­دا "قوزئيلي-گونئيلي" عائيله­لر وارديرلار. بو عائيله­لرين غرب دونياسيندا آنادان اولوب، بويا باشا چاتان اوشاقلاري، كيمديرلر؟ قوزئيلي يا گونئيلي؟ يادينيزا ساليم كي بو "خاريجوفوبي"ني يارادانلار ائله اٶزلري خارجي قووه­لرين اَلي ایله ايران حاكميتينه چاتميش رئژيملر و آداملارديرلار!

باشقا بير فاكت: بيز ياشاديغيميز ايسوئچ كيمي دموكراتيك باتي اٶلكه­لرينده چاليشيريق كي بو اٶلكه­لرين اينستيتوتلاري و شخصيتلريله ايش بيرلي­يي قوراق. ايندي بوردا قوزئي آذربايجان، باتي اٶلكه­لريندن بيزه اوزاقمي؟

 

  • ·      بس سيز بو قونودا بير پروبلئمين يارانماسيني مٶحتمل حئساب ائتميرسينیزمی؟

من بئله دئمه­ديم. دئمک ایسته‌ییرم، پروبلئملر هر طرفدن بيلر. بونلاري محض "قوزئي" منشأييندن يا قوزئي­لي­لردن گٶرمك نه دوزگوندور، نه ده بير تجروبه­يه سٶيكه‌نير. بيزيم وطن‌ديشينداكي فعاليتلريميزين قارشيسينا آتيلان داشلارين چوخو نه قوزئي، نه فارس و نه باشقا بير طرفدن اولمووشدور.

  • ·      توپلانانلار آراسیندا یئنی نسیل، قادینلاردان هر هانسی بیرینین اولماماسی حاققیندا فیکرینیز ندیر؟ سیزجه دعوتلی‌لرین سئچیمینی ائدنلرین بللی معیاری اولموشمو؟

كوپئنهاگئن توپلانتي­سينا دعوت اولموش تك بير خانيم، سون دقیقه‌ده پروبلئمله اوزله‌شيب، گله بیلمه‌میشدی و  توپلانتي­يا قاتيلميشلار آراسيندا گنج دوستلاردان اولسالار دا، اونلارين هئچ بيريسي سئچيلميش هيئته داخيل اولماديلار. بو پروبلئملرين هر ايكسي جيديدير و بو يا اوخشار هر بير فعاليت پلانيندا مطلق چٶزولمه­ليديلر.

  • ·      كوپنهاگئنده‌ ایشتیراک ائدنلرین بیر سیراسی "پارلامنت" قورولماییب، تشبوث قوروپو یارادیلیب دئییرلر. بیر حالداکی وئریلن بیاناتدا " 15 مارت 2014-نجو ايلده دانيمارکانين پايتاختي کوپنهاگئن شهرينده توپلاشان گونئي آذربايجان سياسي موهاجيرلري گونئي آذربايجان مووقتي موهاجير پارلامنتينين ياراديلماسيني ائعلان ائدير و گونئي آذربايجان دؤولتينين حوقوقي ایستاتوسونو موعين ائديلمه‌سي مسئوليتيني ده موهاجير پارلامنتي اؤز اوزرينه گؤتورور"  دئیه یازمیشلار. بئله‌دیرسه سیزجه ندن خبرلره دوزه‌لیش ائدیلیب ویا تکذیبیه وئریلمه‌دی؟ بو بیاتاتلا سونراکی دانیشیقلار آراسیندا ضدیت دئییلمی؟

 

تأسسوف كي، واخت آزليغيندان، ايشلرده بير آز تله­سمه واريدي.  اوردا جيدي بير فيكر وارايدي كي، بو توپلانتي يالنيز و يالنيز تشبوث توپلانتي­سي اولا بيلر. بو فيكرين آغيرليغي باعيث اولدوكي، ايش بيتميش اعلام اولماسين و ماي آيي­نين سونونا بير يئني توپلانتي چاغيريلسين. سيزين ايشاره ائتدي­ييز ضيديت ده بوردان يارانميش اولا بيلر.

 

يعني (1) پارلامنتين يارانماسيیلا ايشين باشلانماسي فيكيريني دستكله­ينلر  و  او بيري طرفدن (2) كوپئنهاگئن توپلانتي­سيندان يالنيز بير تشبوث قوروپو يارانماسيني ايسته­ينلر، هره­سي اٶز تفسيريني وئريرلر. سيزين سوآلدا اولان مودعا، فورمال اولاراق دوزدور. يعني بو قورومون يارانماسي قبول اولموشدور.

 

  • ·      "پارلامنت" هر شئیدن اؤنجه حقوقی بیر اورقاندیر و حقوقی بیر اورقاندا یازیلارا اساسن دانیشماق داها منطیقلیدیر. گؤرونور یا اوخومادان ایمضالانمش یا دا تنقیدلرین چوخلوغو ایمضالایانلاری، ایمضالادیقلاری متنه قارشی دانیشماغا مجبور ائتمیش. سیزجه باشقا سبب ده اولا بیلرمی؟

سوآلينيزدا اولان منطيق دقيقدير. طبيعي كي، بير تشكيلات، حتي آدي "پارلامنت" اولماسا بئله، يازيلي سندلر اساسيندا تعريف اولونور و كوپئنهاگئن­توپلانتي­سيندا قبول اولونموش و آلتينا ايمضا آتيلميش سندده، پارلامنتين يارانماسي اعلان اولونور. بو ايكي روايت­ين (كتبي و شيفاهي) آرايا چيخماسي­نين سببي ايشاره ائتدي­ييم كيمي، بو حاقدا اولان فيكير آييريليغيدير.

 

  • ·      بوردا بير يئرلي سورون دا بودور كي، كوپئنهاگئن­ توپلانتي­سيني، يالنيز تشبوث توپلانتي­سي كيمي گٶرمك ايسته­ينلر، ندن فرقلي بير قرارلا راضي اولدولار؟

اصلينده بو سورویا دقيق جاوابي اونلار اٶزلري وئره بيلرلر. من بيله‌ني، كيمسه ايسته­ميردي كي، "يوخ دئين" و "ايشي كورلايان" كيمي دامغالار آلتيندا قالسين.

  • ·      بیر سیرالارینا گؤره میللی حرکتین خاریجده‌کی قولوندا، پارلامنت قوراجاق بیر سیاسی بلوغ (اولقونلوق) یوخدور. دوغرودان دا خاریجده‌کی سیاسی آکتیویستلرین بیر- بیری ایله علاقه‌لرینین نئجه‌لیگی، سیاسی بلوغون اولماماسینی دئمه‌یه بیر سبب ساییلارمی؟

 

منجه بو مودعا دوزگون دئيیل. اگر وضعيت ايده‌آل اولماسا دا (كي رئال حياتدا هئچ واخت ايده‌آل اولمور)، اَن آزيندان آمستردام توپلانتي­سي (12 دئكابر 2009) بو حاقدا بيزه اوميد وئرير.

 

  • ·      اوغوسوزلوقلارين سبب‌لري نه‌لر اولموشدور؟

 

اٶنجه بير سيرا سببلره توخوندوم. آرتيريب دئمك اولار كي، آراميزدا تشكيلات تئوريسي كاسيبليغي واردير.

ميثال اوچون يوخاريدا شرح ائتديييم، ساده و چتير تشكيلات تيپلري، دونيادا تانينميش و ائلمنتار(ابتدایی) بير مسئله اولسادا، بيزيم آرامييزدا نه تئوريك مدل­لر كيمي و نه عملده اوغور قازانميش مثبت تجروبه­لر كيمي بیلینن دئيیل.

منجه بو تئوري كاسيبليغي، بير سيرا اوغورسوزلوقلاريميزي ايضاح ائده بيلر.

  • بو نئجه باش وئرميشدير؟ كونكرت اٶرنه ­يي­نيز وارمي؟


آمستردامين اوغوروندان دانيشديم. بو تاريخي اوغورون اَلده اولدووغو توپلانتيدان نه آز نه چوخ، دوز آلتي آي سونرا (12 ايون 2010 تاريخينده) بروكسئل توپلانتي­سي كئچيريلدي. بو 6 آيليق فاصيله، آمستردام توپلانتي­سي­نين سئچدييي 50 نفرليك "كورديناسيا قوروپو"ندان(کوردیناسیا: هماهنگی)، 20 نفر جواريندا ايش گٶرمه حاضير اولانلارين هاميسي، مونتظم توپلانتي­لاري كئچيريرديلر. نهايت بو پروسئس بروكسئل­ده داياندي.

  • ·      داياندي يا مغلوبيته اوغرادي؟

يوخ، منجه ساده جه داياندي. ايجازه وئرين آچيقلاييم. بوردا يئني تشكيلات ياراندي و او گونه كيمي تشكيلات چرچيوه سينده فعاليت ائتمه­ين دوستلارين چوخو بو تاريخدن تشكيلاتچي­ليق تجروبه­لريني باشلاديلار. بو ايش اٶز- اؤزلويونده مثبت بير ايش ايدي. آمما آمستردام پروسئسي­نين نتيجه ­سي كيمي سانيلا بيلمزدي و آمستردامدا باشلانميش پروسئسين دوام ائده بيلمه­مه­سي بير مغلوبيت ايدي.

  • بو مسئله ­نين تشكيلات تئوريسي كاسييبليغينا نه دخلي واردير؟

بيزيم ايسته­دييميز و آمستردام توپلانتي­سي­نين 50 نفرليك كورديناسيا قوروپونا وئردييي ماندات(اختیارات)، يئني بير "ساده تشكيلات" ياراتماق دئييلدي. بيزيم مقصد، بير "اوست قوروم" و بوتون سياسي تشكيلاتلار و سياسي قووه­لري اورتاق تشكيلاتيني ياراتماق ايدي، آمما بئله اولمادي. سانكي بير "ميللي تيم" ياراتماق فيكريله ايشه باشلاديق و "يئني بير تيم" ياراندي.

  • ·      بو او تشبوث اوچون اوغورسوزلوق دئییلمی؟ یعنی اوست قوروم یئرینه یئنی بیر قوروم، آما اوست‌قوروم آدیلا اورتایا چیخمیش. تاسسوفله بورایا قدر قورولانلارین آدلاری ایله ماهیتلری آراسیندا بؤبوک بیر فرق وار. پارتی آدی ایله قورولور، آمما گؤزله‌نیلن بیر پارتی ایشینی گؤرمور. جبهه آدی ایله قورولوب، جبهه ایشله‌وی داشیمیر. بو دفعه ده پارلامنت-دن اورتادا ساده‌جه بیر آد اولاجاقمی؟

البته بروكسئلده باش وئرن بو حاديثه، بو معنادا هم اوغورسوزلوق ايدي و هم  اٶزوندن گله­جك اوچون خوشا گلمز بير ايز قويدو. اينسانلارين وطن ديشيندا گونئي آديندان دانيشماغا هم مشروعيتي و هم قابليتي اولان بير اوست‌قوروم ياراتماق نامينه 6 آي موذاكيرده و پلانلاشديرما و سندلر حاضيرلاماسيندان سونرا، بير نئچه نفرين كندي سياسي تشكيلاتي يارادماق وسوسه ­سينه تسليم اولماسي و "امير بازاري" باهاسينا بير دستمال صاحيبي اولمالاري، طبيعي كي، اوغورسوزلوق سايلير. آمما اگر بوتون پروسئسي نظره آلمايييب بو "كندي سياسي تشكيلات"ين يارانماسيني، عمومي پروسئس­دن تجريد ائتسك، بو مجرد حاديثه مثبت بير ايشدير.

  • ·      بوردا هانسي سا آچيق ايراده واريدي يوخسا عملده بئله اولدو؟

هر توپلانتينين قورولدوغو آدرس و اونو چاغيرانلارين كيم اولماسي و بوتون ايشلرين نئجه قورولماسي، قاتيليمجي­لارين تركيبينه تأثير قويور. بروكسئلده ده بو عاميل­لر اٶز تأثيريني بوراخميشدي. ايشتيراكچيلارين آراسيندا ان آزيندان آكتيو قاتيليمجيلارين داكچيلاردان عيبارت بير حيصه­سي، كي گويا هر فورصت­ده يئني بير "داك" يارادماق ايسته­ييرلر. بروكسئلده ده، بونلار، فرقلي سياسي تاوانلاردان بير تاوان آلتينا ييغيلب، گونئي آذربايجاني وطن ديشيندا تمثيل ائده بيلن لئقيتيم "ميللي تيم" يارادماق يئرينه، ايشين اورتاسيندا،  "كندي تيم"لريني يارادماق وسوسه­سينه تسليم اولدولار.

  • ·      اونلار بروكسئلده بو حاقدا آچيق دانيشديلار، يوخسا ايشلرين گئديشاتي بئله اولدو؟

آچيقجاسينا دئديلر: بيز بوردا چوخلوغوق و بيز قرار وئريريك! اٶنجه ايشاره ايئتديييم كيمي، بو آتديم يعني يئني بير تشكيلات يارادماق، اٶزو اٶزونده مثبت ايدي آمما "ميللي تيم"ياراتماق آدينا جماعتي توپلاييب، اويونون اورتاسيندا "كندي تيم" ياراتماق قصدي ائتمك، دوزگون دئيیلدي.

  • ·      اونلارين بو "ساده تشكيلات" آنلاييشي­ني گٶسترن ايفاده­لردي ده واريدي يا بو سيزين استنباطينيزدير؟

بوردا دا، آچيقجاسينا رسمي ايجلاس واختندا دئيیرديلر كي، بورا ايستيقلالچي­لارين تشكيلاتي و پارلماني­دير (!) باشقالاري­ دا اٶز پارلامنتلريني قورسونلار!!!

قويون آچيق دانيشاق. بو بروكسئل يا كوپئنهاگئن توپلانتي­سينا مخصوص بير فئنومن دئيیل.  دوستلارين بير سيراسي­نين تانيديقلاري تکجه شابلون بودور. يعني فرقلي آداملارين قاتيلماسيني حتي يالوار ياخارلا تأمين ائديب، سونرا همن آداملاري امكداش يوخ، حذف اولمالي "رقيب" گٶرمك و نتيجه­ده بير-بيري­نين آردیيلا اوغورسوزلوقلارا ايمضا آتميش اينتريقالارلا بير-بيرلريني حذف ائتمكله مشغول اولان هموژن(بیر جینسدن اولان) قوروپلار ياراتماق. كوپئنهاگئن توپلانتي­سيندا بو فيكرين نوماينده­لري آز دئيیلديلر.

  • ·      يعني يئني هموژن و بير رنگلي ساده تيپلي  تشكيلات ياراتماق ايسته‌یيرديلر؟

دقيقا. دئدي­ييم كيمي، آجيقجاسينا "بو بيز ايستيقلالچي­لارين پارلامنتيدير، باشقالاري­دا اٶز پارلامنتلريني قورسونلار" چاغيريشي، رسمي ايجلاسدا سسلندي.

  • ·      بو فيكرين ايرادي نه­دير؟

اصلينده بروكسئلده اولدوغو كيمي، بوردا دا، هر فيكرين اٶز تشكيلاتيني ياراتماقدا منفي هئچ بير شئي يوخدور،آمما 2 باشقا ايراد واردير:

1. اگر بير فيكيرين صاحیبلري ( ايستيقلالچي، بوتؤوچو­، فدرالچی يا باشقا آدلا) اٶزلرينه يئني تشكيلات ياراتماق ايسته‌یيرلرسه، بو اساسدا دا چاغيريش ائتمه­ليديرلر.

2. گونئي آذربايجاني وطن‌ديشيندا تمثيل ائده بيلن لئقئتيم قوروپ، يالنيز بير فيكرين طرفدالاريندان اولا بيلمز.

* بو پروسئس يعني اوست‌قوروم (يا ميللي تيم) ياراتماق آدينا جماعتي توپلاييب، اٶز كندي تشكيلاتلاريني (يا تيم‌لريني) ياراتمالارين نتيجه­سي نه اولور؟

معلوم اولان بير سيرا دوستلار اوچون، تشكيلاتلانماق، بيليارد اويونونا بنزه­ين بير اويون اولموشدور. اؤنجه شارلاري (توپلاري) توپارلاييب، سونرا اونلاري داغيتماغا و ماسا اوستوندن چيخارماغا باشلاماق. نهايت ماسادا شارلاري يوخ ائدندن سونرا، بيرده شارلاري بير يئره توپارلاماق و ...   بروكسئلده اگر ايجلاسدا بير سيرالار ديشلاندي، سونرا بو هموژن نظره گلن قوروپ آراسيندا ديشلاما باشلادي...

 

  • ·      سیز کوپنهاگئنده اولوب آما بیاناتی ایمضالامادینیز. بونون سببی نه ایدی؟

 

بيز (من و سعيد بَي عزيزي) او توپلانتيني تشبوث توپلانتي­سي اعلان ائتمك و بوتون ميللی حركته موراجيعت ائتمك ايسته‌یيرديك. بو ايسته­يي يازيلي بير بند كيمي يازيب و توپلانتي­يا اوخودوق. سعيد بَي، اؤز يازيسيني سندلره علاوه اولماق اوچون ديوانا وئردي.

 

  • ·      منطیقله باخیلارسا خاریجده یارانان پارلامنت هئچ بیر زامان دایمی اولا بیلمز. چونکی بیر گون گونئیده پارلامنتین قورولماسی ایله خاریجده‌کی پارلامنت دایمی قالماسی آنلامسیز اولار. بیاناتدا "موقتی پارلامنت" یازیلمیشدیر. بو موقتی حاقیندا دا ایمضالایانلار فرقلی سؤزلر دئییرلر. :مووقتی" سؤزجویو، بو پارلامنتین گونئیده قورولمادیغی و گونئیده پارلامنت قورولانا قدر سوره‌ بیله‌جه‌یی‌ سببیندن دولایی یازیلدیمی یوخسا ایکی آی سونرا گئنیشلتمک ایسته‌دیکلری پارلامنتی دایمی ائتمک اوچونمو؟

 

بيرينجي استنباط دوزدور. يعني اگر دوستلارين فيكرلري دَيشيلمه­ سه ائله ايكي آيدان سونراكي تشكيلات­دا "موقتي" صيفتي­ني آدي­نين تركيبينده داشیياجاقدير.

 

  • ·      بو آرادا مسئله‌یه خئیریه ایشی کیمی چاغیریش وئرنلر وار. " 100 ایلدیر بیزه ظولم اولور. دای بیز یاخشی پیس قورموشوق. گلین میللتیمیزی قورتارماق اوچون بیزیمله اولون" کیمی چاغیریشلار حاققیندا فیکرینیز ندیر؟

 

بيزيم موخاليفت ائتمه­يميزين بير يٶنو، اٶنجه ايشاره ايئتدي­ييم پرينسيپيال(اوصولی) سببلر ايدي. علاوه بير آرقومئنتيميز(آرقومئنت: استدلال) پراقماتيستي بير مولاحيظه­ ايدي. ميللي حركتين پراكسيسي(رویه) گٶسترير كي، "گلين بيزه قوشولون!" چاغيريشيي هميشه جاوابسيز قالير. بو پراكسيس اساسيندا، كيمسه، پيشمك پروسئسينده ايشتيراك ائتمه­دييي آشي ايچمير! بيز بو ايكي آرقومئنتي كوپئنهاگئن توپلانتي­سيندا دفعه­لر و هر دفعه بير طرزله تكرار ائتديك.

 

  • ·      سیزجه تاريخي بير اوغور قازانماق اوچون نه­لر ائديلمه­ليدير؟

تمثيلچي­ليك ميسياسيني(میسیا: رسالت) اٶز- اؤزرينه گٶتورن كاماندانين (تيمين) تركيبي اويغون و دوشونولموش اولماليدير كي، هم ايشين عٶهده­سيندن لياقتله گلسين، هم بير- بيرلريله ايش بيرلييي آپارا بيلسينلر و هم داخيل­ و خاريجده ميلي حركاتين آكتورلاري­نين سايقي­لاريني قازانيب ساخلايا بيلسينلر. كئچميشده مين بير اينتريقالاردا، بير-بيرلرينندن اينجي‌ميش دوستلار اوچون بو ايش چتين اولا بيلر.

كاماندا اٶز فعاليتيني پروفئسیونال بير سويیه‌ده قورماقلا، اٶزونو، آلترناتيوي اولمايان (ائكسكلوزيو) بير ييغما كيمي دوغرولتماليدير. يعني يارانميش قوروم ايشيني ائله يوكسك قورماليدير كي، هامي اونلارين ايشلري­نين حقيقتا گركلي اولماسينا اينانسين.

بو اوست قورومدان هئچ بير فيكري ديشلاماغا يول وئريلمه­مه­لیدير و اوست‌قورومو، كندي ساده قوروما چئويريب، اٶزللشديرلمه­سينه يول وئريلمه­مه­لي­دير.

 

  • ·      سیزجه پارلامنت ایشلرینین دوزگون ایره‌لی گئتمه‌سی و اوغورلو نتیجه‌لنمه‌سی اوچون هانسي فردي قابليتلر صاحيبلرينین اولماسی گرکلی ویا هانسی  پرنيسيپلره دايانماق لازيمدير؟

 

ميسياني اٶز بوينونا آلماق ايسته‌ين، شخصلر و قوروملار آز اولماميشلار: پروبلئم بو دور: كيمسه، كيمسه­نين بو ايشه اولان صلاحيتني قبول ائتمير.

غيري دموكراتيك رژيملره قارشي موباريزه آپاران حركتده عادتا زيندانا دوشوب، آغير عذابلارا دٶزوب سينمايان سيمالار يا آغ ساققالار و علمي درجه­لريیله سئچيلنلر، حركتين يٶنتجي و بالانسلاشديريجي عاميللري اولورلار.

 

 

  • ·      بورا كيمي موصاحيبه­ميزي اوخويانلار، اگر بو مصاحيبه­ده، سيزين كوپئنهاگئن توپلانتي­سيني كسينليكله قيناماق يا قبول ائتمه­نيزي گٶزله­ميش اولسالار، مأيوس قالميشلار!

اولا بيلر. اينسان چوخ واخت گٶزله­د­يیي دئییل، باشقا بير نتيجه­يه چاتير. منيم كوپئنهاگئن پروسئسينه تنقيديم آز دئيیل. آمما باشقالاري­نين آغ-قارا تنقيدلريندن فرقلي اولا بيلر.

 

منجه تنقيد گرك جيدي و يئرينده اولسون. بير سيرا تنقيدلر دئديييم كيمي، كوپئنهاگئن­دن چوخ قاباقكي موناسيبتلره قاييدير. حتي بعضي­لري بو توپلانتي­يا قاتيلماغا حاضيرلاشيرديلار كي، اورایا دعوت اولماديقلاري اوچون تنقيد توپخانالاريني ايشه سالديلار.

بير سيرا تنقيدلر، غيري رئال شرطردن عزيمت ائدير. من اينانيرام كي هئچ تشكيلات و دونياين هئچ بير يئرينده و هئچ زامان ايده‌آل بير شراييط ده يارانمير. هميشه بوتون بٶيوك ايشلر و تاريخي آدديملار، زمان و مكانين تحميل ائتدييي رئالليقلارلا محدودلاشير. بيز گونئي آذربايجان قورتولوش حركتي­نين تشكيلاتلانماسيني ائله بير اَل چاتماز شرطلرله محدودلاشديرماغيميزلا بير شئي اَلده ائده بيلمه­ريك.

 

منجه اگر بوتون دوستلار، "ساده تشكيلات" و "اوست قوروم" آراسيندا اولان فرقلري گٶرسه­لر و عملده بو ايكي بام‌باشقا تشكيلاتي بير-بيرينه قاتماسالار، يولا چيخماق اولار.