ديالوق و پولميك

"وطن خاریجینده پارلامنت" سورولار آلتیندا:بابک آزاد ایله سؤیله‌شی

 

بیرلیک-مئدیا: سون زامانلار "پارلامنت" مسئله‌سی گونئی آذربایجان میللی حرکتی‌نین گونده‌مینه گلمیشدیر. بیر سیرالارینا گؤره اومود وئریجی بیر آددیم، بیر سیرالارینا گؤره ایسه غیری دموکراتیک بیر آددیم ساییلاراق باشقا بیر اومودسوزلوغون باشلانغیجیدیر. پارلامنتین قورولماسینا دایر وئریلن بیلدیری ایله ایشتراکچی‌لارین سونرادان سؤیله‌دیکلری آراسیندا اولان ضیدیت ده بو مسئله‌نی جیدی سورولارلا قارشی- قارشی‌یا قویموشدور. بو اوزدن بیرلیک تشکیلاتی‌نین مئدیا اورقانی اولاراق پارلامنت مسئله‌سی ایله باغلی ایستر کوپنهاگئنده ایشتیراک ائدنلر، ایستر تنقیدی فیکری اولان میللی فعاللارلا سؤیله‌شی آپارماغا چالیشاجاغیق.

ایلک سؤیله‌شی اولاراق بابک بَی آزاد ایله آپاردیغیمیز سؤیله‌شینی عزیز اوخوجولارلا پایلاشیریق:

 

سوال: سياسي تشکيلات آنلاييشيني نئجه ايضاح ائدردينيز؟

جاواب: هر بير توپلومدا هر هانسي بير سياسي تشکيلات، وطنداشلارين بير حيصه‌سينين ايستکلرينی تمثيل ائدير و بو ايستک‌لره چاتماق اوچون چاليشير سياسي قودرته گله. يعني، دؤولت ايداره‌چيليک اورقانلاريندا يئر توتا.

 

سوال: دئموکراتيک جمعيتده سياسي تشکيلاتلارين اؤزلليک‌لري ندير؟

جاواب: دئموکراتيک توپلومدا هر هانسي بير دئموکراتيک سياسي تشکيلات سياسي دَيرلرين چوخلوغونا اينانير. اونا گؤره ده ديگر رقيب تشکيلاتلارا ديريليک حاقينی رسميته تانييير و اؤز هدفلرينه چاتماق اوچون سياسي ديالوق و آزاد سئچيملردن فايدالانير.

 

سوال: همين اؤزلليکلر غئيري-دئموکراتيک جمعيتده نئجه اولور؟

جاواب: هر بير توپلومدا هر هانسي بير غئيري-دئموکراتيک تشکيلات سياسي دَيرلرين چوخلوغونا اينانمير. ائله اونا گؤره ده سياست مئيدانيندا آنجاق آغ-قارا رنگي تانييير. بو، او معنادادير کي، هر کس يوز فايز او تشکيلاتين طرفداري اولماسا، يوز فايز اونون عليه‌ينه‌دير. بو نؤوع تشکيلات سياسي قودرته چاتماق اوچون رقيب تشکيلاتلاري مئيداندان چيخارماغا چاليشير. حتّي اگر لازيم اولسا، خاريجي قوووه‌لر و يا داخيلده حربي قوووه‌لرله امکداشليق ائديب سياسي قودرتي الده ائتمه‌يه چاليشير.

 

سوال: وطن خاريجينده گونئي آذربايجان پارلامئنتي نئجه بير تشکيلاتدير؟

جاواب: بيلديگينيز کيمي، 1945-ده گونئي آذربايجاندا آزاد سئچيملر نتيجه‌سينده ميللي حؤکومت يارانميشدير و حتّي قادينلار سس‌وئرمه حاقينا ماليک اولموشدورلار. بيزيم ميللي حؤکومت بير اجنبي حربي قوووه‌نين واسيطه‌سي ايله وحشيجه‌سينه آرادان آپاريلميشدير. اصلينده وطنين خاريجينده گونئي آذربايجان پارلامئنتي بيزيم 1945-ده يارانان ميللي مجليسين واريثي و داوامچيسي ساييلير.

 

سوال: پارلامئنت کونکرئت اولاراق هانسي پروبلئملري چؤزمه‌ليدير؟

جاواب: پارلامئنت اصلينده ائده بيلر گونئي آذربايجان تشکيلاتلارينين و شخصلرينين فعاليتلري آراسيندا هماهنگ‌ليک ياراديب، ايراندا و دونيا ميقياسيندا گونئي آذربايجانين يئگانه سؤزچو اورقاني ساييلا.

 

سوال: سون زامانلاردا کوپئنهاگئنده باش توتموش تشبّوثدن سونرا بو آدديم و عوموميتله، پارلامئنت ياراتما ايدئياسينا قارشي تنقيدي فيکريلر سؤيلنمکده‌دير. بو تنقيدي باخيشلار حاقدا سيزين فيکرينيزي اؤيرنمک ايسترديک.

جاواب: هئچ بير سياسي فعاليت، حتّي دونيانين آزاد اؤلکه‌لرينده يوز فايز عيب‌سيز دئييل. بئله اولان حالدا ايکي رفتار طرزي گؤزه گؤرونور. بعضيلري آنجاق کناردا اوتوروب گؤرولن عملده عيب آختارير، نتيجه‌ده سبب اولورلار منفي انرژي يارادالار، اينسانلار بير-بيري ايله امکداشليقدان چکينه‌لر. ايکينجي رفتار طرزي بوندان عيبارتدير کي، اينسان عيب آختارما يئرينه، مسئوليت حيس ائديب قوللارين چيرمالاياراق مئيدانا گيره‌رک ديگر فعاللارلا بيرليکده بير کوللئکتيو ايشين نتيجه‌سينده چاليشير نؤقصانلاري آرادان آپارا.

 

سوال: بعضي‌لرينه گؤره، وطن خاريجينده پارلامئنت اوچون سئچيم ايمکانسيزليغي، بو تيپ پارلامانلاري تمثيل بؤحراني ایله اؤزلشديرير. بير اوزدن ده "پارلامئنتي ميلّت سئچير" دئيه‌رک، تنقيد ائدير. سيز بو حاقدا نه دوشونورسونوز؟

جاواب: سورگونده پارلامئنتين يارانيب فعاليت ائتمه‌سي ايکي طرفلي رابيطه‌دير. پارلامئنت بو رابيطه نين تمثيل اورقاني ساييلير، او بيري طرفي بيزلريک کي، او قدر ميللي شوعوروموز اولا کي، پارلامئنتين ضروريتين حيس ائديب اونا دستک اولاق. طبيعيدير، سياستده ده بير رياضي منطيق حسابي وار. آيديندير کي، اگر پارلامئنت ايدئياسيندان کيفايت قدر حيمايت اولونمايا، بو زامان پارلامئنت تمثيل بؤحراني ايله اوزبه‌اوز اولا. من سيزين آد چکديگينيز ايمکانسيزليغي ياخشي آنلايا بيلمه‌ديم، آنجاق بئله دوشونورم کي، اونون يارانماسينا ايستيثنايي ايمکان لازيم دئييل. خوصوصن، ايندي بيز اينتئرنئت عصرينده ياشاييريق. اينسانلار اينفورماسييا تئخنولوگياسيندان فايدالانيب ويرتوال(مجازی) دونيادا فعاليتلرين فورمالاشديريرلار. سيز سوالينيزين ايکينجي حيصه‌سينده قئيد ائديرسينيز کي، پارلامئنتي ميلت سئچر. بلي، بو دوغرودور، آما اگر ميلتين سئچيم حاقي اولا و آزاد سئچيمه ايمکان يارانا. سورگونده پارلامئنتين اساس وظيفه‌سي بوندان عيبارتدير کي، ميلتيميزه آزاد شکيلده سئچيم حاقي وئريله. اگر، بو نؤوع شراييط يارانا، سورگونده پارلامئتين اولماسي معناسيز اولور.

 

سوال: "خاريجده فعاليت ائدنلرين بير چوخو ايله مصلحت ائديلمه‌‌مه‌سی" سؤيله‌نن باشقا بير تنقيددير. محدود اينسانلارين ايشتيراکي ايله کئچيريلن بو ايجلاس دوغرو آدديم ساييلا بيلرمي؟

جاواب: البته، کوپئنهاگئنده کئچيريلن ايجلاس پارلامئنتين يارانماسينا بير نؤوع باشلاييش نؤقظه‌سي ساييلير.بو ايجلاسدا بير مسئول هئيتي يارانيب، دئمک اولار، بير ايش قروپو يارانيب و بو ايش قروپو چاليشاجاق دئموکراتيک پرينسيپلري اساس گؤتوروب، چوخ سايدا ميللي فعاللارين ايشتيراکي ايله پارلامئنتين يارانماسينا زمين يارادا. البته، سيز بونو نظره آلماليسينيز کي، بو پارلامئنت سورگونده يارانير و ايرانين مرکزي حؤکومتي اونو اؤز وارليغينا ضيد بيلير. ائله بونا گؤره ده، ايران حؤکومتينه عاييد اولان اينفورماسييا واسيطه‌لري، او جومله‌دن، آذري‌ها سايتي بو ايجلاسين ايشتيراکچيلارينی تورکيه‌نين جاسوسلاري کيمي تقديم ائتميشدير. بيلديگينيز کيمي، ايرانين داخيلينده خاريجي اؤلکه‌لره جاسوسلوقدا ايتّيهاملانان آداملار حتّي اعداملا جزالانا بيلرلر. حتّي ايران رئژيمي بعضي موخاليفلرينه بو ايتّيهامي ووروب خاريجي اؤلکه‌لرده اونلارا تئررور ائديب. بو آيدين فاکتي نظره آلاراق باشا دوشمه‌لي‌یيک کي، ايران رئژيمين تئررور باسقيسي حقيقي دونيادا اينسانلارين بير يئره ييغيشيب ايجلاس کئچيرمه‌سي محدودلاشير. هر حالدا من کوپئنهاگئنده يارانان مسئول هئيتدن خواهيش ائديرم کي،سورگونده پارلامئنت يارانما پروسئسينده چاليشا کي ميللي فعاللار چوخ سايدا ايشتيراک ائده‌لر.

 

سوال: کئچميشده ياخينلاشديريجي و يا اوزلاشديريجي رول اويناماميش اينسانلارين بو ايشده ايشتيراکي و موداخيله‌سينين، سيزجه، نئجه بير تاثيري اولاجاقدير؟

جاواب: منيم فيرکيمجه، اگر موثبت تاثيري گؤزله‌ييريک، بونو نظره آلماليييق کي، موثبت تاثير اينسانلارين تخصوصوندن آسيليدير. من اومود ائديرم کي، بو پارلامئنتين يارانما پروسئسينده ايش بيلن اينسانلار فعالجاسينا ايشتيراک ائده‌لر.

 

سوال: سيزجه، پارلامئنتين قورولماسيندا قوزئي آذربايجانليلارين رول اويناماسي موثبتدير، يوخسا منفي تاثير ائده بيلر؟

جاواب: بو پارلامئنتين عوضولري و تشکيلاتچيلاري آنجاق گونئي آذربايجانليلار اولماليديرلار. طبيعيدير، قوزئي آذربايجانليلار و يا ديگر ميلّت‌لرين بو پارلامئنتدن معنوي و تبليغاتي يارديملاري موثبت حالدير.

 

سوال: توپلانانلار آراسيندا يئني نسيل و قادينلاردان بیر نفرین ده اولماماسي حاقيندا فيکرينيز نه‌دير؟ سيزجه، دعوتلي‌لرين سئچيميني ائدنلرين بللي مئعياري اولموشمو؟

جاواب: گونئي آذربايجاندا جمعيتين اکثريتين جاوانلار تشکيل ائديرلر و قادينلار دا ميلُي ظولمدن علاوه،جينسي ظولمه معروض قاليرلار. اونلار دا توپلومون ياريسين تشکيل ائديرلر. ائله بونا گؤره ده يئني نسيل و قادينلارين بو نؤوع توپلانتيلاردا ايشتيراکي واجيبدير. آما، بو توپلانتينين بير اؤزلليگي ده وار، او دا بوندان عيابرتدير کي، پارلامئنتين يارانماسينا گرک ائله آداملار سئچيله‌لر کي، يوکسک سويّه‌ده تشکيلاتچيليق قابيليتلري اولا. منيم فيکريمجه، کوپئنهاگئنده ييغيشانلارين اساس مقصدي بير ايش قروپو ياراتما اولوب و اونا گؤره ده آداملاري سئچنده اونلارين تشکيلاتچيليق قابليتلري اساس رول اويناييب. منيم فيرکيمجه، گونئي آذربايجانين پارلامئنتينده گرک کي يئني نسيل و قادينلارين نوماينده‌لري فعال ايشتيراک ائده‌لر.

 

سوال: کوپئنهاگئنده ايشتيراک ائدنلرين بير سيراسي پارلامئنت قورولماييب، تشبوث قروپو ياراديليب دئييرلر. بير حالدا کي وئريلن بياناتدا "15 مارت 2014-جو ايلده دانيمارکانين پايتاختي کوپئنهاگئن شهرينده توپلاشان گونئي آذربايجان سياسي موهاجيرلري، گونئي آذربايجان مووققتي موهاجير پارلامئنتينين ياراديلماسيني ائعلان ائديرلر. و گونئي آذربايجان دؤولتينين حوقوقي ایستاتوسونون موعين ائديلمه‌سي مسئوليتيني موهاجير پارلامئنتي اؤز اوزرينه گؤتورور" دئيه يازميشلار. بئله دئييلسه، سيزجه، نييه خبره دوزه‌ليش ائديلمه‌ييب تکذیبیه وئرميرلر؟ بو بياناتلا سونراکي دانيشيقلار آراسيندا ضيديت دئييلمي؟

جاواب: من فيکير ائديرم، سيز حاقليسينيز. بو ضيديتلي مقاملا علاقه‌دار ايضاحات وئريلمه‌ليدير. بو جاماعات آراسيندا چاش-باش يارادير. هر حالدا بو ايجلاس واسيطه‌سي ايله بير تشبّوث قروپو ياراديليب کي گونئي آذربايجانين پارلامئنتينين يارانماسينا زمين يارانا. من کونکرئت اولاراق بو باره‌ده دئيه بيلرم کي، فریدون بَی پرويزنيا ايله تئلئفون واسيطه‌سي ايله دانيشديم، او، خاطيرلاتدي کي، ياخين گله‌جکده پارلامانين يارانماسي ايله علاقه‌دار بير گئنيش ايجلاس کئچيريله‌جک و مندن ده خواهيش ائتدي کي، بو ايجلاسدا فعال ايشتيراک ائدم.

 

سوال: بعضيلرينه گؤره، ميللي حرکتين خاريجده‌کي قولوندا پارلامئنت قوراجاق بير سياسي يئتکينليک يوخدور. دوغرودان دا، خاريجده‌کي سياسي آکتيويستلرين بير-بيري ايله علاقه‌لرينين نئجه‌ليگي سياسي يئتکين‌ليگين اولماماسيني دئمه‌يه بير سبب ساييلارمی؟

جاواب: طبيعيدير، خاريجده ياشايان آکتيويستلر آراسيندا ياخين امکداشليق و کوللئکتيو ايشين اولماماغي ميلتيميزين اوستونده منفي تاثير بوراخير. آما من بو فيکيرله راضي دئييلم کي، خاريجده ياشايان ميللي فعاللارين پارلامئنت ياراتماغا سياسي يئتکينليگي يوخدور. ايجازه وئرين بونو عملده تجروبه نيشان وئرسين.

 

سوال: خاريجده پارلامئنت مسله‌سينده هانسي اوغورسوزلوق و اوغورلو تجروبه‌لر واردير؟

جواب: بيزيم ايچيميزده گونئي آذربايجان پارلامئنتيني ياراتماق هميشه آکتوال اولوب. اگر اونون يارانماسينا ذهني زمين اولسا دا، ماددي زمين اولماميشدير. هر حالدا دانيمارکادا ييغيشانلار بو ايدئيانين حياتا کئچيريلمه‌سينه چاليشيبلار بير ماددي زمين يارادالار. اوغورسوزلوقدان دانيشاندا دئيه بيلرم اوزون زامان بو ايدئياني حياتا کئچيرمه‌يه بير موعين ماددي آدديم آتيلماميشدير. اوغوردان دانيشاندا ايسه دئيه بيلرم، بو ايدئيانين حياتا کئچيريلمه‌سينه بعضيلري جيدي چابالارا باشلاييبلار.

 

سوال: اوغورسوزلوقلارين سببلري نه اولموشدور؟

جاواب: عاليملرين نظرينه گؤره، غئيري-دئموکراتيک اؤلکه‌لرده ياشايان اينسانلار دئموکراتيک رفتارا بيگانه اولورلار. ائله بونا گؤره اونلارين آراسيندا کوللئکتيو و دئموکراتيک ايش آپارما چتين اولور. هر حالدا من اينانيرام کي، ميللي فعاللار بو طيلیسمي سينديريب کوللئکتيو و دئموکراتيک ايش بيرليگينه نايل اولاجاقلار.

سوال: سيزجه، تاريخي بير اوغور قازانماق اوچون نه‌لر ائديلمه‌ليدير؟

جاواب: قديم بير فيلوسوفون نظرينه گؤره، هر بير اينسانين دهشتلي دوشمني اؤز بيلگيسيزليگيدير. ائله اونا گؤره ده، اوغور قازانماق اوچون اؤز سياسي بيلگيميزي و توپلومون سياسي بيلگيسينی آرتيرماليييق.

 

سوال: سيزجه، پارلامئنت ايشلرينين دوزگون ايره‌لي گئتمه‌سي و اوغورلو نتيجه‌لنمه‌سي اوچون هانسي فردي قابيليتلر و يا هانسي پرنسيپلره دايانماق لازيمدير؟

جواب: گونئي آذربايجان پارلامئنتينين يارانماسي اوغروندا فعاليت گؤسترن ميللي فعاللارين اکثريتي دونيانين آزاد اؤلکه‌لرينده ياشاييرلار. منيم فيکريمجه، گرک بيز سياستده پراقماتيک اولاق و آزاد اؤلکه‌لرين تجروبه‌لريندن فايدالاناق. من دوزگون فورمادا پارلامئنتين يارانماسيندا فردلرين تخصوصو، يني، ايش قابيليتي، ديالوق و آزاد سئچيمين اهميتلي رول اويناديغيني گؤرورم.