آنونس

گونئي آذربايجان آزادليق حركاتي­نين ايمكانلاريندان دوزگون يارارلانمالي­ييق!

birlik

 

آمستردام بياناتي­نين 5 جي ايلدؤنومو موناسيبتيله:

گونئي آذربايجان آزادليق حركاتي­نین ايمكانلاريندان دوزگون يارارلانمالي­ييق!

وطن ديشيندا گونئي آذربايجان آزادليق حركاتي­نين فعال قوه­ لري، اونلارين بوينوندا اولان تاريخي وظيفه­ نين آغيرليغيني دويمادان، بو رسالتي يئرينه يئتيره بيلمزلر. ايللردن بري بو رسالتين بيرينجي و اساسي حلقه­ سي، ميللي حركاتي، اولدوغو كيمي وطن ديشيندا تمثيل ائتمكدير. ايچريده آغير شراييط­ده جريان ائدن آزادليق موجاديله­ سي، غرب دموكراتيك اؤلكه­ لريندن عيبارت دونيا سياستينده آپاريجي توپلوملاردا، اؤزونون گوونه بيلدي­يي، لئقئتيم تمثيلچي قورروما ماليك اولمالي­دير.

 

بو باخيمدان 5 ايل اؤنجه بوتون سياسي قووه ­لرين فعال موداخيله­ لري و هر طرفلي مسئوليت حيسي نتيجه­ سينده آپاريلان ميللي ديالوگون طبيعي نتيجه­ سي كيمي، "آمستردام بياناتي" قبول اولوندو. (12 دئكابر / 21 آذر 2009، آمستردام) بو بيانات وطندن كناردا قبول اولسا دا، مقبوليتي، بو سندي دارتيشان و قبول ائدنلردن داها گئنيش بير دايره ­ني احاطه ­سينه آلدي. بو سند هله بو گونه كيمي هم اؤز آكتوئل­لي­ييني و هم گئنيش ميللي حيمايه ­سيني قورويوب ساخلاميشدير.

 

 

 

آمستردام بياناتي، اونون مضمونوندا اولان عقلانيت و اونو قبول ائدنلرين سياسي شعور و ميللي مسئوليت حيسلريندن دوغان سازيش مدنيتي­نين يوكسك­لي­يي­نين عياني ثبوتودور. مع الاسف بو نائيليت، سياسي پلاتفورم سويه ­سينده قالدي و اونو سؤزدن عمله كئچيرمك قصدلري، بير- بيري­نين آردينجا مغلوبيته اوغرادي.

 

آمستردام بياناتي­نين روحونو، فرقلي فورماتلاردا ياشاتماق اولار، آمما اوغور قازانا بيلن و ميللي حركاتين حاق و عدالت مئساژيني، دونيا ايجتيماعتينه بير آغيزدان چاتديرماق كيمي واجيب بير ايشه نائيل اولماق اوچون، آشاغيداكي شرطر لزوملو ساييليرلار:

 

  1. بوتون سياسي فيكيرلر و سليقه ­لري اؤزونده ائحتيوا ائتمك،

  2. بير-بيريله رقابت يا اينتريقا موناسيبتلرينده بولونان فرقلي جريانلار كيمي يوخ، اونيك(تك) اولماق.

 

 

 

آمستردام بياناتي­ني، سؤزدن عمله كئچيرمك اوچون بئله بير تمثيلچي اورقان لازيمدير. بو تاريخي ضرورته رغمن، بو گونلرده سؤزقونوسو اولان، "پارلامئنت"، يالنيز و يالنيز، بونا بنزر كئچميش اوغورسوز تجروبه ­­لرين تكراري اولا بيلر.

 

گونئي آذربايجان دموكراتيك بيرلي­يي (بيرليك)، هر بير فورمدا و هر هانسي سويه­ ده تشكيلاتلانماغي دستكله­ دي­يي حالدا، گرگن هر طرفلي ديالوگ و راضيلاشمالارلا باشلانميش بير پراسئس­ين نتيجه سي كيمي، عموم ملي كاراكتئرلي و بوتون ميللي حركات آديندان دانيشا بيلن بير تمثيلچي اورقان­ين يارانماسي­ني بير تاريخي ضرورت حئساب ائدير. بونونلا بئله، بيز، آيري- آيري فيكيرلر و سليقه­ صاحيبلري­نين، اؤز دوزگون تشكيلاتلانما جهدلريني­نين آديني بئله بير "ميللي تمثيلچي­ليك اورقاني" آدينا بنزتمك جهدلريني يئرسيز و لزومسوز حئساب ائديريك. ميللي حركاتين بوتون قوللاريني، بوتون سياسي پلاتفورملاريني و هر بير سليقه ­ني اؤزونده ائحتيوا ائتمه ­ين قوروملارا "پارلامئنت" يا "جبهه" آدي وئرمك، دوزگون سئچيم اولا بيلمز. بو تشكيلاتلارا چتير ماهيتلي اورتاق و ميللي تشكيلاتلارين آديني وئرمه­ نين هئچ قانوني بير منعي اولماسا دا، بو ايش، اخلاقي باخيمدان دوزگون آدديم ساييلا بيلمز و گله ­جكده دوزگون اساسدا عموم ميللي بيرلشمه ­لره خاص اولان، امكانلاري توكلتمك رولو اوينايا بيلر.

 

بيز اينديكي دورومدا، هر گوندن آرتيق تشكيلاتماق ضرورتيني دانمادان، هر بير تشكيلاتين آديني، "كونقرس"، "جبهه"، "پارلامئنت" و بو كيمي رئال­ليغي عكس ائتديرمه ­ين شيشيرديلميش آدلار قويماغي، لزومسوز و يئرسيز سانيريق.

 

گونئي آذربايجان دموكراتيك بيرلي­يي (بيرليك) ين ايجرا هئيتي

 

2014-11-11